ރާއްޖެއައި ފަތުރުވެރިންގެ 23.2 އިންސައްތަ ހިއްސާކުރަނީ ރަޝިއާއިން
ރަޝިއާއިން ރާއްޖެ އައިސްފައި ވަނީ 17,671 ފަތުރުވެރިން
ރާއްޖެއަށް އައި ފަތުރުވެރިންތަކެއް ވެލާނާ އިންޓަނޭޝަނަލް އެއަރޕޯޓްގައި
އަހަރުގެ މިހާތަނަށް ރާއްޖެއައިސްފައިވާ ފަތުރުވެރިންގެ 23.2 އިންސައްތަ ހިއްސާކުރަނީ ރަޝިއާގެ ފަތުރުވެރިންކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިސްޓްރީން އާންމުކުރި އެންމެ ފަހުގެ ތަފާސްހިސާބުތައް ދައްކާގޮތުން 26 ޖެނުއަރީގެ ނިޔަލަށް 17,671 ފަތުރުވެރިން ވަނީ ރަޝިއާއިން ރާއްޖެ އައިސްފައެވެ.
މީގެ އިތުރުން ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައިވާ ގައުމުތަކުގެ ތެރެއިން، އިންޑިއާއިން އައި 15,509 ފަތުރުވެރިން ހިއްސާކުރަނީ 20.4 އިންސައްތައެވެ. އަދި ޔޫކްރެއިން ރާއްޖެއައި 6,216 ފަތުރުވެރިން 8.2 އިންސައްތަ ހިއްސާކުރާއިރު، ކަޒަކިސްތާނުން އައި 3,730 ފަތުރުވެރިން ހިއްސާކުރަނީ 4.9 އިންސައްތައެވެ. ފްރާންސުން ރާއްޖެއައި 3,094 ފަތުރުވެރިން ހިއްސާ ކުރަނީ 4.1 އިންސައްތައެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރުމޭނިއާއިން ރާއްޖެއައި 2,890 ފަތުރުވެރިން ހިއްސާކުރަނީ 3.8 އިންސައްތައެވެ. ޖަރުމަނުން 3.6 އިންސައްތަ ހިއްސާކުރާއިރު، އެގައުމުން ރާއްޖެ އައިސްފައި ވަނީ 2,722 ފަތުރުވެރިންނެވެ. އިނގިރޭސިވިލާތުން އައި 2,242 ފަތުރުވެރިން 2.9 އިންސައްތަ ހިއްސާކުރާއިރު، އެމެރިކާއިން އައި 1,629 ފަތުރުވެރިން ހިއްސާކުރަނީ 2.1 އިންސައްތައެވެ. އަދި ޔޫކްރެއިނުން 1.9 އިންސައްތަ ހިއްސާކުރާއިރު، އެގައުމުން ރާއްޖެ އައިސްފައި ވަނީ 1,475 ފަތުރުވެރިންނެވެ.
ކޮވިޑް-19ގެ ސަބަބުން ގައުމުތަކުގެ ބޯޑަރު ބަންދުކޮށް ދަތުރުފަތުރުކުރުމުގައި ދިމާވެފައިވާ ގޮންޖެހުންތަކާއިއެކު ރާއްޖެ އަންނަ ފަތުރުވެރިންގެ އަދަދު ދަށްވެފައި ވީނަަމަވެސް އަހަރުގެ ފުރަތަމަ 26 ދުވަހު ރާއްޖެއަށް 76,057 ފަތުރުވެރިން ވަނީ އައިސްފައެވެ. ދުވާލެއްގެ މައްޗަށް ރާއްޖެ އަންނަ ފަތުރުވެރިންގެ އަދަދު އެވްރެޖުކޮށް 2,925 ގައި އުޅޭއިރު، ފަތުރުވެރިން ރާއްޖޭގައި ހޭދަކުރަނީ އެވްރެޖުކޮށް 9.3 ދުވަހެވެ.
މިނިސްޓްރީގެ ތަފާސްހިސާބުތައް ދައްކާގޮތުން 2020 ވަނަ އަހަރުގެ ޖެނުއަރީ މަހުގެ އެއް ވަަނަ ދުވަހުން 26 ވަނަ ދުވަހަށް 150,385 ފަތުރުވެރިން ވަނީ ރާއްޖެއައިސްފައެވެ. މިއީ މި އަހަރުގެ މިހާތަނަށް ރާއްޖެ އައިސްފައިވާ 76،057 ފަތުުރުވެރިންނާއި އަޅާބަލާއިރު، 49.5 އިންސައްތަ އިތުރު އަދަދެކެވެ.
