ސްޕެއިންގެ ފަތުރުވެރިކަމާބެހޭ އިންޑަސްޓްރީގެ ސަރުކާރުގެ ކުންފުނި ސަޖިޓޫރުއާއެކު ޓޫރިޒަމް މިނިސްޓްރީން މަޝްވަރާކޮށްފި
25 ޖެނުއަރީ 2021 | ހޯމަ 06:39ސަޖިޓޫރުގެ މަސައްކަތުގެ ތަޖުރިބާއަށް ބިނާކޮށް ގިނަކަންތައްތަކެއް ރާއްޖޭގައި ތަންފީޒުކުރުމުގެ ފުރުސަތު އެބައޮތް
ބައްދަލުކުރެއްވުމުގެ ތެރެއިން
ސްޕެއިންގެ ފަތުރުވެރިކަމާބެހޭ އިންޑަސްޓްރީގެ ސަރުކާރުގެ ކުންފުންޏެއް ކަމަށްވާ ސަޖިޓޫރުއާއެކު ޓޫރިޒަމް މިނިސްޓްރީން މަޝްވަރާ ކޮށްފިއެވެ.
ޓޫރިޒަމް މިނިސްޓްރީން ބުނީ އެ ކުންފުނީގެ ރައީސް އެންރިކް މާރޓިނެޒް މަރިން އާއި ޑިރެކްޓަރ އޮފް ޓޫރިޒަމް ރިސާރޗް ޑިވެލޮޕްމަންޓް އެންޑް އިނޮވޭޝަން ކާރލޯސް ރޮމާރިއޯއާ ޓޫރިޒަމް މިނިސްޓަރ އަބްދުﷲ މައުސޫމް ބައްދަލުކުރައްވާފައިވާ ކަމަށެވެ.
މި ބައްދަލުވުމުގައި ސަޖިޓޫރުގެ ފަރާތުން ސްޕެއިންގެ ފަތުރުވެރިކަން ތަރައްޤީކުރަން ގެންގުޅޭ ސިޔާސަތުތަކާއި، ފަތުރުވެރިކަން ކުރިއެރުވުމަށް އެކުންފުނިން ކުރަމުންގެންދާ މަސައްކަތުގެ މަޢުލޫމާތު ޙިއްޞާކޮށްފައިވާކަމަށް ވެސް އެ މިނިސްޓްރީން ބުންޏެވެ. ވަކިން ޚާއްޞަކޮށް ފަތުރުވެރިކަން ކުރިއެރުވުމުގައި ރިސާރޗާއި ކޮމިއުނިކޭޝަން އެންޑް އިންފޮމޭޝަން ޓެކްނޮލޮޖީ ބޭނުން ކުރެވިދާނެ، އަދި ބޭނުން ކުރަމުންދާ ގޮތްތަކުގެ މަޢުލޫމާތު ޙިއްޞާކޮށްފައިވެއެވެ.
މިނިސްޓަރ މައުސޫމްގެ ވާހަކަފުޅުގައި ރާއްޖޭގެ އުތުރާއި ދެކުނުގެ ފަތުރުވެރިކަން ފުޅާކޮށް ތަރައްޤީކުރުމުގެ މަސައްކަތް ކުރަމުންދާ ކަމަށާއި އެކަމުގައި ސަޖިޓޫރުގެ މަސައްކަތުގެ ތަޖުރިބާއަށް ބިނާކޮށް ގިނަ ކަންތައްތަކެއް ރާއްޖޭގައި ތަންފީޒު ކުރުމުގެ ފުރުސަތު އޮތްކަމަށް ފާހަގަކުރެއްވިއެވެ.
ސަޖިޓޫރަކީ ރިސާރޗާއި ޓެކްނޮލޮޖީގެ ކުރިއެރުން ބޭނުންކޮށްގެން ފަތުރުވެރިކަން ޒަމާނާ އެއްގޮތަށް ކުރިއަރުވައި، ދުނިޔޭގެ ފަތުރުވެރިކަމުގެ ވާދަވެރިކަމުގެ ތެރޭގައި ސްޕެއިން އަކީ މަޤުބޫލު މަންޒިލެއްގެ ގޮތުގައި ދެމެހެއްޓުމުގެ މަސައްކަތް ކުރުމަށް އުފައްދާފައިވާ ސަރުކާރު ކުންފުޏެކެވެ.
މި ބައްދަލުވުން ބޭއްވީ ޔޫ.އެން.ޑަބްލިއު.އޯ.ގެ 113 ވަނަ ވަނަ ކައުންސިލް ބައްދަލުވުމަށް ޓޫރިޒަމް މިނިސްޓަރ ސްޕެއިންއަށް ކުރެއްވި ދަތުރުފުޅާ ގުޅުވައިގެން 21 ޖަނަވަރީގައި ސަޖިޓޫރުގެ އޮފީހުގައެވެ.
