ފެލިވަރަށް ލިބުނު ހެވީލޯޑް ވެހިކަލާއިއެކު ސްޓޯރޭޖަށް ލުޔެއް ލިބިގެންދާނެ - ފައުޒީ
ފެލިވަރުގައި މަސްކިރައި ބަރުކުރުމުގައި ދިމާވެފައިވާ ގޮންޖެހުންތަކަށް ކުޑަ ހައްލެއް ލިބިގެންދާނެ
މިފްކޯގެ ސީއީއޯ އިސްމާއިލް ފައުޒީ
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ހިންގަމުންދާ ފެލިވަރު ފިޝަރީޒް ކޮމްޕްލެކްސްއަށް ލިބުނު ހެވީ ލޯޑް ވެހިކަލާއިއެކު ފެލިވަރުގެ ސްޓޯރޭޖަށް ދިމާވެފައިވާ ގޮންޖެހުމަށް ކޮންމެސްވަރެއްގެ ލުޔެއް ލިބިގެންދާނެ ކަމަށް މިފްކޯގެ ސީއީއޯ އިސްމާއިލް ފައުޒީ ވިދާޅުވެއްޖެއެވެ.
ރާއްޖެއެމްވީއަށް މައުލޫމާތުދެއްވަމުން ފައުޒީ ވިދާޅުވީ ފެލިވަރަށް މިގެނައި ހެވީލޯޑް ވެހިކަލްގައި 40 ފޫޓްގެ ކޮންޓެއިނަރު ފަސޭހަކަމާއިއެކު އުފުލޭނެ ކަމަށެވެ. އަދި މިއާއިއެކު ކުރިން ހުރި އުދަނގޫތަކަށް ކޮންމެވެސް ވަރެއްގެ ހައްލެއް ލިބިގެންދާނެކަމަށް ފައުޒީ ވަނީ ވިދާޅުވެފައެވެ.
ފައުޒީ ވިދާޅުވީ، ފެލިވަރުގައި މަސްކިރައި ބަރުކުރުމުގައި ދިމާވެފައިވާ ގޮންޖެހުންތަކަށް ކުޑަ ހައްލެއް ލިބިގެންދާނެ ކަމަށާއި މަސް ކިރުމަށްފަހު ސްޓޯކުރުމަށްވެސް މީގެ ސަބަބުން ކުޑަ ލުޔެއް ލިބިގެންދާނެ ކަމަށެވެ. ފައުޒީ ވަނީ ފެލިވަރުން މަސް ކިރުމުގައި ދިމާވާ ގޮންޖެހުންތަކުގެ ސަބަބުން މަސް އުފުލުމަށް މާލެއިން ހެވީލޯޑް ވެހިކަލް ގެންގޮސް ކޮންޓެއިނަރު އުފުލަން ޖެހޭކަން ފާހަގަކޮށްފައެވެ. އެހެންކަމުން ފެލިވަރަށް މި ލިބުނު ވެހިކަލާއިއެކު މިކަމަށް ހައްލެއް ލިބި، މަސް ކޮންޓެއިނަރުތައް ފަސޭހަކަމާއިއެކު ލޯޑް ކުރެވޭނެ ކަމަށް ފައުޒީ ވިދާޅުވިއެވެ.
ގިނަ އަދަދެއްގެ މަސް އެއްފަހަރާ ކިރައި ސްޓޯ ކުރަން ޖެހުމުން އަދިވެސް ގޮންޖެހުންތަކާއި ކުރިމަތިލާންޖެހޭނެ ކަމަށާއި އެހެން ނަމަވެސް މޯލްޑިވްސް ސްޓޭޓް ޝިޕިންއާއި ގުޅިގެން ފެލިވަރުގައި 30 ކޮންޓެއިނަރު އޮޕަރޭޓް ކުރަން ނިންމާފައިވާކަމަށް ފައުޒީ ވިދާޅުވިއެވެ. ފައުޒީ ވިދާޅުވީ މިއިން ކޮންމެ ކޮންޓެއިނަރެއްގައި 25 ޓަނުގެ މަސް އުފުލޭނެ ކަމަށެވެ.
ފައުޒީ ވަނީ މިއާއިއެކު މަސް ކިރުމަށް މަސްވެރިން ކިއުގައި ތިބެންޖެހޭ ޖެހުމަށް ކޮންމެސް ވަރެއްގެ ލުޔެއް ލިބިގެންދާނެ ކަމަށް ވިދާޅުވެފައެވެ. އަދި ދަޅުގައި މަސް ބަންދުކުރުމަށް ފަހު ކޮންޓެއިނަރުތައް އުފުލުމަށް ލުއި ލިބިގެންދާނެ ކަމަށްވެސް ފައުޒީ ވިދާޅުވިއެވެ.
ފެލިވަރަށް މިގެނައި ހެވީލޯޑް ވެހިކަލްގައި މަތިމައްޗަށް ފަސް ކޮންޓެއިނަރު ބެހެއްޓުމުގެ ބާރު ހުންނައިރު، މިއާއިއެކު ސްޓޯރޭޖަށް ލިބިގެންދާ ލުއިގެ އިތުރުން، ފެލިވަރުގެ ސްޓޯރޭޖް އިތުރުކުރުމުގެ މަސައްކަތްތައް މިފްކޯއިން ދަނީ ކުރަމުންނެވެ.
