ފާއިތުވި ޑިސެމްބަރު މަހު ޖަލަށްލާން ހުކުމްކުރި މީހުންގެ އަދަދު މައްޗަށް
59 މީހުން ޖަލުން ދޫކޮށްލާފައިވާއިރު 32 މީހަކު ޖަލުން ދޫކޮށްލުމަށް ވަނީ ހުކުމް ކޮށްފައި
ނޮވެމްބަރު އަދި ޑިސެމްބަރު މަހުވެސް ޖަލަށް ލާފައިވަނީ 56 މީހުން
2020 ވަނަ އަހަރުގެ ނޮވެމްބަރު މަހާއި އަޅާބަލާއިރު ފާއިތުވި ޑިސެމްބަރު މަހު އެކިއެކި މައްސަލަތަކާއި ގުޅިގެން ޖަލަށް ލުމަށް ހުކުމް ކޮށްފައިވާ މީހުންގެ އަދަދު މައްޗަށް ގޮސްފައިވާކަމަށް މޯލްޑިވްސް ކަރެކްޝަނަލް ސަރވިސްގެ ތަފާސްހިސާބުތަކުން ދައްކައިފިއެވެ.
ކަރެކްޝަނަލް ސަރވިސް އާއްމު ކޮށްފައިވާ ތަފާސްހިސާބުތައް ދައްކާގޮތުން ނޮވެމްބަރު މަހު ޖަލަށްލުމަށް ހުކުމް ކޮށްފައިވަނީ 24 މީހުންނަށެވެ. ނަމަވެސް ޑިސެމްބަރު މަހު މި އަދަދު ވަނީ 38އަށް އަރާފައެވެ.
ޖަލަށް ލާފައިވާ މީހުންގެ އަދަދަށް ބަލާއިރު ނޮވެމްބަރު އަދި ޑިސެމްބަރު މަހުވެސް ޖަލަށް ލާފައިވަނީ 56 މީހުންނެވެ. މީގެ އިތުރުން ޑިސެމްބަރު މަހު ގިނަ އަދަދެއްގެ މީހުން ޖަލުން ދޫކޮށްލާފައިވާކަމަށް ތަފާސްހިސާބުތަކުން ދައްކައެވެ. އެގޮތުން 59 މީހުން ޖަލުން ދޫކޮށްލާފައިވާއިރު 32 މީހަކު ޖަލުން ދޫކޮށްލުމަށް ވަނީ ހުކުމް ކޮށްފައެވެ.
ޑިސެމްބަރު މަހު އެންމެ ގިނަ އަދަދެއްގެ މީހުން ޖަލަށް ލާފައިވަނީ މަސްތުވާތަކެތީގެ މައްސަލަތަކުގައެވެ. މިބާވަތުގެ މައްސަލަތަކުގައި ޖަލަށް ލާފައިވަނީ 39.4 އިންސައްތަ މީހުންނެވެ.
މީގެ އިތުރުން 23.6 މީހުން ވައްކަމާއި ފޭރުމުގެ މައްސަލަ ތަކުގައި ޖަލަށް ލާފައިވާއިރު ކޮރަޕްޝަނާ، އަމުރަށް ނުކިޔަމަންތެރިވުމުގެ އިތުރުން ކުޑަކުދިންނަށް ޖިންސީ ގޯނާ ކުރުމުގެ ކުށުގައިވެސް މީހުން ވަނީ ޖަލަށް ލާފައެވެ.
މޯލްޑިވްސް ކަރެކްޝަނަލް ސަރވިސްއިން ބުނީ މާފުށި ޖަލުން 2271 ފޯން ކޯލާއި، މާލެ ޖަލުން 224 ފޯން ކޯލް، އައްސޭރި ޖަލުން 352 ކޯލްގެ އިތުރުން ހުޅުމާލެ ޖަލުން 295 ފޯން ކޯލް ގައިދީންނަށް ފަހިކޮށްދިންކަމަށެވެ. މީގެ ތެރޭގައި އާއިލާ މީހުންގެ ފޯން ކޯލް، ވަކީލުންގެ ފޯނު ކޯލުގެ އިތުރުން އެހެނިހެން ކޯލްތައްވެސް ހިމެނެއެވެ.
އެކިއެކި މައްސަލަތަކާއި ގުޅިގެން ޖަލަށް ލުމަށް ހުކުމް ކޮށްފައިވާ މީހުންގެ އަދަދު އިތުރު ވެފައިވާއިރު ޖަލުތަކުގެ އާބާދީ ބޮޑު ވުމަކީ ހައްލެއް ބޭނުންވެފައިވާ ބޮޑު މައްސަލައެކެވެ. އެގޮތުން ހޯމް މިނިސްޓަރ އިމްރާން އަބްދުﷲ މީގެ ކުރިން ވިދާޅުވެފައި ވަނީ ޖަލުތަކަށް ދިމާވެފައިވާ އެންމެ ބޮޑު ގޮންޖެހުމަކީ ޖަލުތައް ފުރި، ޖާގައަށް ވުރެ ޤައިދީން އިތުރުވާ މައްސަލަކަމަށެވެ.
