އދ އާއި ރާއްޖޭގެ ސަރުކާރާއި ދެމެދު އެއްބަސްވުމެއްގައި ސޮއިކޮށްފި
21 ޖެނުއަރީ 2021 | ބުރާސްފަތި 12:51އަންހެނުންނާއި ކުދިންނަށް ކުރިމަތިވާ އަނިޔާއާއި ފަގީރުކަމުން އަރައިގަތުމަށް އެހީތެރިވެދޭނެ
އެއްބަސްވުމުގައި ސޮއިކުރި ރަސްމިއްޔާތުގެ ތެރެއިން
އަންހެނުންނާއި ކުޑަ ކުދިން ރައްކާތެރިކުރުމާއި ބެހޭ ޕްރޮޖެކްޓެއް ކުރިއަށް ގެންދިއުމަށް, އދ އާއި ރާއްޖޭގެ ސަރުކާރާއި ދެމެދު އެއްބަސްވުމުގައި ސޮއިކޮށްފިއެވެ.
''ޑިޖިޓަލައިޒިންގ އެންޑް ސްޓްރީމިންގ ސޯޝިއަލް ސަރވިސަސް އެންޑް ކްރިއޭޓިން އަ ޔުނިފައިޑް ފްލެޓްފޯމް ފޯ ނޭޝަނަލް ކެއަރ'' ޕްރޮޖެކްޓް ކުރިއަށް ގެންދިއުމަށް ރާއްޖޭގެ ފަރާތުން އެއްބަސްވުމުގައި ސޮއިކުރެއްވީ ފޮރިން މިނިސްޓަރު އަބްދުﷲ ޝާހިދު އަދި އދ.ގެ ފަރާތުން ސޮއިކުރެއްވީ އދ.ގެ ރެސިޑެންސް ކޯޑިނޭޓަރ ކެތްރިން ހޭސްވެލް އެވެ.
މިޕްރޮޖެކްޓްގެ މައިގަނޑު މަގުސަދަކީ މިހާރު ކުރިމަތިވެފައިވާ ކޮވިޑް-19ގެ ޕެންޑަމިކް ފަދަ ހާލަތްތަކުގައި އަންހެނުންނާއި ކުދިންނަށް ކުރިމަތިވާ އަނިޔާއާއި ފަގީރުކަމުން އަރައިގަތުމަށް އެހީތެރިކަން ފޯރުކޮށްދިނުމެވެ. އަދި އިޖުތިމާއީ ރައްކާތެރިކަން ފޯރުކޮށްދިނުމެވެ.
މިޕްރޮޖެކްޓްގެ ދަށުން ސަސްޓެއިނަބަލް ޑިވެލޮޕްމެންޓް ގޯލްސްއަށް ވާސިލްވުމަށް އެހީތެރިވެދޭއިރު، ޖިންސީ ތަފާތުކުރުންތަކާއި، އަންހެނުން ކުރިއަރުވައި ބާރުވެރިކުރުވުމުގެ އިތުރުން އަންހެނުން ބާރުވެރި ކުރުމަށް މަސައްކަތް ކުރާ މުއައްސަސާތަކަށް އެހީތެރިކަން ފޯރުކޮށްދޭނެއެވެ. އަދި ވަޒީފާގެ ފުރުސަތުތައް ހޯދައިދިނުމާއި، މިހާރަށްވުރެ، އަންހެނުންނަށް ދިމާވާ ސިއްހީ މައްސަލަތަކަށް ހައްލު ހޯދައިދިނުމަށް ފަރުވާގެ ނިޒާމު އިތުރަށް ހަރުދަނާ ކުރާނެއެވެ.
ބުރާސްފަތި ދުވަހު ފޮރިން މިނިސްޓްރީގައި ބޭއްވި މިސޮއިކުރުމުގެ ރަސްމިއްޔާތުގައި ފޮރިން މިނިސްޓަރު ޝާހިދު ވިދާޅުވީ މީގެ ކުރިން އަޅާނުލެވި ދޫކޮށްލެވިފައިވާ ދާއިރާތަކަށް މިސަރުކާރުން މިހާރު ވަރަށް ގާތުން ބަލަމުންދާ ކަމަށާއި، މީހުންނަށްވެސް ވަރަށް ބޮޑު އެހީތެރިކަމެއް ސަރުކާރުން ފޯރުކޮށްދެމުންދާ ކަމަށެވެ. އަދި މިމަސައްކަތްތަކަށް މިހާރު ބޮޑު ހަރަދެއް ހޭދަކޮށްފައިވާކަންވެސް މިނިސްޓަރު ފާހަގަކުރެއްވިއެވެ.
މީގެ އިތުރުން އދ.ގެ ރެސިޑެންސް ކޯޑިނޭޓަރ ކެތްރިން ވިދާޅުވީ މިޕްރޮޖެކްޓްގެ ދަށުން ކުރަމުންދާ ހުރިހާ މަސައްކަތްތަކަށް އދ.ގެ ފަރާތުން ފުރިހަމަ އެއްބާރުލުން ލިބޭނެ ކަމަށާއި، މިޕްރޮޖެކްޓް މަސައްކަތްތައް ކުރިއަށްދާ ގޮތް ވަރަށް ގާތުން ބަލަމުންދާނެ ކަމަށެވެ. އަދި މިހާރަށްވުރެ ރަނގަޅު ސޯޝަލް ޕްރޮޓެކްޝަން ސިސްޓަމެއް ތަރައްގީ ކުރާނެކަމަށް އެކަމަނާ ވިދާޅުވިއެވެ.
އދ.ގެ ކޮވިޑް ރެސްޕޮންސް ފަންޑުން ކުރިއަށް ގެންދާ މިޕްރޮޖެކްޓަށް 452,500.00 (ހަތަރު ލައްކަ ފަންސާސްދެހާސް ފައްސަތޭކަ) އެމެރިކާ ޑޮލަރު ކަނޑައަޅާފައިވެއެވެ.
