ތިންވަނަ ޑިވިޝަން ފުޓްބޯޅަ މުބާރާތުގެ ގުރު އަންގާރަ ދުވަހު ނަގައިފިއެވެ.

މިދިޔަ މަހުގެ 24 ގައި އެފްއޭއެމުން ތިންވަނަ ޑިވިޝަން ފުޓްބޯޅަ މުބާރާތުގައި ބައިވެރިވުމުގެ ފުރުސަތު ހުޅުވާލީ މި މަހުގެ ފަސްވަނަ ދުވަހުގެ ނިޔަލަށެވެ. މި މުއްދަތުގައި 22 ޓީމެއް މުބާރާތުގައި ބައިވެރިވާން ފޯމު ހުށަހަޅާފައި ވިޔަސް ގިނަ ޓީމުތަކެއްގެ ލިޔެކިޔުންތައް ހަމަކުރުމުގައި ދަތިތަކެއް ހުރުމުން ދެ ފަހަރެއްގެ މަތިން މުއްދަތު އިތުރުކޮށްދިނެވެ. އެ މުއްދަތުގައި 16 ޓީމަކުން ލިޔެކިއުންތައް ހުށަހެޅި ނަމަވެސް، އަމިއްލަ ސަބަބުތަކާ ހުރެ އެއް ޓީމުން ވަނީ މުބާރާތާ ވަކިވާން ނިންމާފައެވެ.

އެހެންކަމުން އަންނަ ފެބްރުއަރީ މަހުގެ ހަތަރުވަނަ ދުވަހު ފަށާ މި މުބާރާތުގައި ވާދަކުރާނީ 15 ޓީމެވެ. ތިންވަނަ ޑިވިޝަނުގެ ގުރު ނެގިއިރު، މުބާރާތް ކުރިއަށްދާނީ ހަތަރު ގްރޫޕަކަށް ބަހާލައިގެންނެވެ. އެގޮތުން ފުރަތަމަ ތިން ގްރޫޕުގެ ތެރެއިން ކޮންމެ ގްރޫޕެއްގައި ހަތަރު ޓީމު ހިމެނޭއިރު، ފަހު ގްރޫޕުގައި ހިމެނެނީ ތިން ޓީމެވެ.

ގްރޫޕް ސްޓޭޖަށްފަހު ސެމީފައިނަލަށް ކޮންމެ ގްރޫޕަކުންވެސް އެންމެ މޮޅު ޓީމު ދަތުރުކުރާއިރު، ފައިނަލް މެޗު ކުޅުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ތާވަލުކޮށްފައިވަނީ މާޗު މަހުގެ ނުވަވަނަ ދުވަހުއެވެ.

މި މުބާރާތުގެ ގުރު ނެގިއިރު، މުބާރާތަށް ތައްޔާރުވުމަށް ގިނަ ޓީމުތަކުން މިހާރު އަންނަނީ ފަރިތަކުރަމުންނެވެ. އަދި މުބާރާތުގައި ވާދަކުރާ ޓީމުތަކަށް ކުޅުންތެރިން ރަޖިސްޓްރީކުރުން މި މަހުގެ 26 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.

މި އަހަރު ތިންވަނަ ޑިވިޝަން ފުޓްބޯޅަ މުބާރާތް ބޭއްވުމަށް އެފްއޭއެމުން ނިންމިއިރު، މިދިޔަ ދެ އަހަރުވެސް މި މުބާރާތް ބާއްވާފައެއް ނުވެއެވެ. އެންމެ ފަހުން މި މުބާރާތް 2018 ވަނަ އަހަރު ބޭއްވިއިރު، އެ ފަހަރު ޗެމްޕިއަންކަން ހޯދީ ރޮކް ސްޓްރީޓްސް ސްޕޯޓްސް ކުލަބެވެ.