އެޗްޕީއޭއަށް ސިޔާސީ ޕާޓީތައް ކޮންޓްރޯލްކުރުމުގެ ބާރު ސަރުކާރުން ވަނީ ދީފައި - އިދިކޮޅު
ޖަލްސާ 40 މިނެޓު ލަސްވީ އެމްޑީޕީގެ ސަރުކާރު މެމްބަރުންގެ ސަބަބުންކަމަށް ޝިޔާމް ވިދާޅުވި
ނައިފަރު ދާއިރަ މެމްބަރު އަހުމަދު ޝިޔާމް
އެޗްޕީއަށް ސިޔާސީ ޕާޓީތައް ކޮންޓްރޯލްކުރުމުގެ ބާރު ސަރުކާރުން ދީފައިވާކަމަށް އިދިކޮޅު ޕީޕީއެމްގެ ނައިބު ރައީސް އަދި ނައިފަރު ދާއިރަ މެމްބަރު އަހުމަދު ޝިޔާމް ވިދާޅުވެއްޖެއެވެ.
ލޯކަލް ކައުންސިލް އިންތިޚާބު ބާއްވާ ތާރީޚު އަވަސްކުރުމަށް ހުރި ގާނޫނީ ހުރަސްތައް ނައްތާލުމަށް ހުށަހެޅިފައިވާ ބިލަށް ބަހުސްކުރައްވަމުން ނައިފަރު ދާއިރަ މެމްބަރު އަހުމަދު ޝިޔާމް ވަނީ މި ބިލްގެ މަސައްކަތް އަވަސްކުރައްވާ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީއިން ރިޕޯޓް އެކުލަވާލުން އަވަސްކުރެއްވީތީ ޝުކުރުއަދާކުރައްވާފައެވެ. މި ބިލްގެ މަސައްކަތް ލަސްކުރުމަށް ސަރުކާރުގެ ބައެއް މެމްބަރުން މަސައްކަތްކުރާކަމަށް ޝިޔާމް ވިދާޅުވިއެވެ. އެގޮތުން މިއަދުގެ ޖަލްސާ 40 މިނެޓު ލަސްވީ އެމްޑީޕީގެ ސަރުކާރު މެމްބަރުންގެ ސަބަބުންކަމަށް ޝިޔާމް ވިދާޅުވެފައެވެ. މި ސަބަބައްޓަކައި އޭނާ ވަނީ އެ މެމްބަރުންގެ އިޚްލާސްތެރިކަމާއި މެދު ސުވާލު އުފައްދަވާފައެވެ.
ނައިފަރު ދާއިރަ މެމްބަރު އަހުމަދު ޝިޔާމް ވަނީ ހެލްތް ޕްރޮޓެކްޝަން އޭޖެންސީ (އެޗްޕީއޭ) އަކީ ސަރުކާރުން ސިޔާސީ ޕާޓީތައް ކޮންޓްރޯލްކުރުމުގެ ބާރު ދީފައިވާ ތަނެއްކަމުގައި ވިދާޅުވެފައެވެ. އެގޮތުން ސަރުކާރުގެ ކޯލިޝަންގައި ހިމެނޭ މެމްބަރުންނަށް ތަރައްޤީގެ މަޝްރޫޢުތައް އިފްތިތާޙްކުރުމައި އެކި އެކި ނަންނަމުގައި ރަށްރަށަށް ކަރަންޓީން ނުވެވި ދެވޭއިރު، އިދިކޮޅު ކޯލިޝަނަށް މި ހައްޤުން މަހުރޫމްވެފައިވާކަމަށް އޭނާ ވިދާޅުވިއެވެ.
މެމްބަރު ޝިޔާމް ވަނީ މިކަމުގައި އިންސާފު ހޯދުމަށް މެދުކެނޑުމެއްނެތި މަސައްކަތް ކުރާނެކަަމަށް ވިދާޅުވެފައެވެ. އޭނާވަނީ އިދިކޮޅު މައި ލީޑަރު އަދި ކުރީގެ ރައީސް އަބްދުﷲ ޔާމީން ޖަލުގައި އޮއްވާ ވާދަވެރި އިންސާފްވެރި އިންތިޚާބެއް ރާއްޖޭގައި ނުބޭއްވޭނެކަމަށް ވިދާޅުވެފައެވެ.
