ނަވަލްނީ ދޫކޮށްލުމަށް ގޮވާލައި އެމެރިކާއާއި ޔޫރަޕްގެ ޤައުމުތަކުގެ ޕްރެޝަރ ރަޝިއާއަށް

ރަޝިޔާގެ އިދިކޮޅު ލީޑަރު އެލެކްސީ ނަވަލްނީ ދޫކޮށްލުމަށް ގޮވާލައި އެމެރިކާއާއި ޔޫރަޕްގެ ބައެއް ޤައުމުތަކުން ރަޝިއާއަށް ޕްރެޝަރ ކުރަން ފަށައިފިއެވެ.

އެމެރިކާގެ ސެކެޓަރީ އޮފް ސްޓޭޓް މައިކް ޕޮމްޕެއޯއާ ޙަވާލާދީ ބޭރުގެ މީޑިއާތަކުން ރިޕޯޓް ކޮށްފައިވާ ގޮތުން ނަވަލްނީ ހައްޔަރުކޮށްފައިވަނީ އިދިކޮޅުގެ އަޑުކަނޑުވައިލުމުގެ ގޮތުންނެވެ. އަދި ވަގުތުން ޝަރުޠަކާ ނުލައި ނަވަލްނީ ދޫކޮށްލަން ޖެހޭކަމަށް ޕޮމްޕެއޯ ވިދާޅުވެފައިވެއެވެ.

ޕޮމްޕެއޯ އިތުރަށް ވިދާޅުވީ، ހިތްވަރު ހުރި ވެރިއެއްނަމަ އިދިކޮޅުގެ އަޑު އިއްވުމަށް ފަސްޖެހިވަޑައިނުގަންނަވާނެ ކަމަށާއި، އަދި ޤާނޫނާއި ޤަވާއިދުތަކާ ޚިލާފަށް މީހުން ހައްޔަރު ވެސް ނުކުރާނެ ކަމަށެވެ.

އޭގެ އިތުރުން، އިންތިޚާބީ ރައީސް ޖޯ ބައިޑެންގެ ނޭޝަނަލް ސެކިއުރިޓީ އެޑްވައިސަރ ޖޭކް ސަލަވަންއާއި، ޔޫރަޕިއަން ކައުންސިލުގެ ރައީސް ޗާރލްސް މައިކަލްގެ އިތުރުން، ފްރާންސާއި އިޓަލީ ފަދަ ޤައުމުތަކުގެ ލީޑަރުން ވެސް ވަނީ ނަވަލްނީ ދޫކޮށްލުމަށް ގޮވައިލައްވާފައެވެ.

ސިއްޙީ ފަރުވާއަށް ޖަރުމަނަށް ވަޑައިގަތުމަށްފަހު ރަޝިޔާގެ އިދިކޮޅު ލީޑަރު އެލެކްސީ ނަވަލްނީ އަނބުރާ ޤައުމަށް ވަޑައިގެންފައިވަނީ ހޯމަ ދުވަހުގެ ވަގުތެއްގައެވެ. ނަވަލްނީ ޤައުމަށް ވަޑައިގަތުމާއެކު، އެ ޤައުމުގެ ފުލުހުން ވަނީ އޭނާ ހައްޔަރު ކޮށްފައެވެ. އެގޮތުން ނަވަލްނީ ރަޝިއާއަށް ވަޑައިގެންފައި މިވަނީ ވެސް ހައްޔަރުކުރާނެ ކަމުގެ އިންޒާރު ރަޝިއާގެ ޕްރިޒަން ސަރވިސްއިން ދީފައިވާ ދަނޑިވަޅެއްގައެވެ.

ނަަވަލްނީގެ ސްޕޯކްސްމަން ކިރާ ޔަރްމީޝް ވިދާޅުވީ ފުލުހުންގެ ބެލުމުގެ ދަށަށް ނަވަލްނީ ގެންދިޔަ ސަބަބު ފުލުހުން ހާމަކޮށްފައި ނުވާކަމަށާއި ނަވަލްނީގެ ވަކީލު އެމީހުންނާ އެކުގައި ދިއުމުގެ ހުއްދަ ވެސް ދީފައި ނުވާކަމަށެވެ. އަދި އެކަމާ ދެކޮޅަށް ނަވަލްނީގެ ގިނަ އަދަދެއްގެ ސަޕޯޓަރުން ވަނީ އަޑުއުފުލައި އިހުތިޖާޖު ކޮށްފައެވެ.

ހައްޔަރުކުރާނެ ކަމުގެ އިންޒާރު ދީފައިވަނިކޮށް ނަވަލްނީ އެނބުރި ޤައުމަށް ވަޑައިގަތުމަކީ އެ ޤައުމުގެ ރައީސް ވްލަޑިމިއަރ ޕުޓިންގެ ސަރުކާރަށް ކުރައްވާ ޗެލެންޖެއްގެ ގޮތުގައި ބޭރުގެ މީޑިއާތަކުން ވަނީ ސިފަ ކޮށްފައެވެ. އެގޮތުން މޮސްކޯގެ ޕްރިޒަން ސަރވިސް އިން މިހާރުވެސް ވަނީ ޕެރޯލްގެ ޤަވާއިދުތަކާ ނަވަލްނީ ޚިލާފުވެވަޑައިގެންފައިވާ ކަމަށް ބުނެ، އޭގެ ނަތީޖާއެއްގެ ގޮތުން 3 އަހަރާއި 6 މަސް ދުވަހުގެ ޖަލު ޙުކުމެއް އައިސްދާނެ ކަމަށް ބުނެފައެވެ.

ރަޝިއާ ސަރުކާރުގެ ކޮރަޕްޝަނާ ދެކޮޅަށް އަޑު އުފުއްލަވަމުން ގެންދަވާ ނަވަލްނީގެ ސިއްހީ ހާލުކޮޅު ގޯސްވީ އޮގަސްޓު މަހުގެ 20 ވަނަ ދުވަހު ސައިބީރިޔާ އިން މޮސްކޯއަށް ދަތުރު ކުރަމުން ދިޔަ ފްލައިޓެއްގެ ތެރެއިން ސައިފޮދެއް ހިއްޕެވި ފަހުންނެވެ. އިދިކޮޅުން ތުހުމަތުކުރާ ގޮތުގައި ނަވަލްނީ އަށް ވިހަ ދިނުމުގެ ފަހަތުގައި ވަނީ ރަޝިޔާ ސަރުކާރެވެ. އެކަމަކު ސަރުކާރުން ވަނީ އެ ވާހަކަތައް ދޮގުކޮށްފައެވެ.

ޖަރުމަނުގެ ހޮސްޕިޓަލުގައި 32 ދުވަސް ވަންދެން ފަރުވާ ހޯއްދެވުމަށްފަހު ނަވަލްނީ ހޮސްޕިޓަލުން ދޫކޮށްލާފައިވަނީ މިދިޔަ އަހަރުގެ ސެޕްޓެމްބަރު މަހުގެ 20 ވަނަ ދުވަހުއެވެ. ނަވަލްނީ ހޮސްޕިޓަލުުން ދޫކޮށްލާފައިވާއިރު، އޮކްޓޯބަރު މަހުގެ 20 ހިސާބުގައި އާލާސްކަންފުޅުގެ ހުރިހާ އަލާމާތެއް ވެސް ފިލައިގެން ގޮސްފައިވާ ކަމަށް ރޮއިޓަރސްގައި ރިޕޯޓް ކޮށްފައިވެއެވެ.

އެއާއެކު ރަޝިއާގެ ސަރުކާރުން ވަނީ ނަވަލްނީ އަނބުރާ ޤައުމަށް ގެނައުމަށް ވަރަށް ބޮޑަށް ބާރު އަޅާފައެވެ. އެގޮތުން ނަވަލްނީއަކީ ޙުކުމެއްގެ ދަށުން ސަސްޕެންޝަނެއްގައި ހުންނެވި ބޭފުޅަކަށްވެފައިި، ޤައުމުން ބޭރުގައި ހުންނެވީ ސަސްޕެންޝަންގެ އުސޫލުތަކާ ޚިލާފަށް ކަމަށް ބުނެ ރަޝިއާގެ ޕްރިޒަން ސަރވިސް އިން ވަނީ ވަގުތުން ނަވަލްނީ އެނބުރި ޤައުމަށް ވަޑައިގަތުމަށް އަމުރު ކޮށްފައެވެ. އަދި އަނބުރާ ވަޑައިނުގަންނަވައިފި ނަމަ، ސަސްޕެންޝަން ޖަލު ޙުކުމަކަށް ބަދަލުވެގެން ދިއުން ގާތް ކަމަށް ޕްރިޒަން ސަރވިސް އިން އޭރު ބުނެފައިވެއެވެ.