އިރާނުން "އަސްލެއް ނެތް" ދައުވާތައް ކޮށްފައިވާ އެމެރިކާ ރައްޔިތުން ދޫކޮށްލުމަށް އެމެރިކާ އިން ގޮވާލައިިފި
އެމެރިކާ އިން މިހެން ބުނިއިރު ހަމަ އެދުވަހު އިރާނުން ވަނީ އެމެރިކާ ރައްޔިތަކަށް 10 އަހަރުގެ ޖަލު ހުކުމެއް އިއްވާފަ
1980 އިން ފެށިގެން އެމެރިކާ އާއި އިރާނާ ދެމެދު ޑިޕްލޮމެޓިކް ގުޅުމެއް ނެތް
އިރާނުގެ ގައުމީ ސަލާމަތަށްޓަކައި ކަމަށް ބުނެ ބަންދުކޮށް "އަސްލެއް ނެތް" ދައުވާތައް ކޮށްފައިވާ އެމެރިކާ ރައްޔިތުން މިހާރުން މިހާރަށް ދޫކޮށްލުމަށް އެމެރިކާ އިން އިރާނަށް ގޮވާލައިފިއެވެ.
އާާދީއްތަ ދުވަހު އެމެރިކާ އިން މިހެން ބުނިއިރު އިރާނުން ވަނީ އެމެރިކާ ރައްޔިތަކު 10 އަހަރަށް ޖަަލަށް ލުމަށް ހުކުމްކޮށްފައެވެ. އެމީހާ ޖަލަށް ލުމަށް ހުކުމްކޮށްފައި ވަނީ އިރާނަށް އެތެރެވެ، "ސިއްރުން" މައުލޫމާުތު ހޯދުމުގެ ކުށުގައެވެ.
އެމެރިކާގެ ސްޓޭޭޓް ޑިޕާޓްމަންޓުން އާދީއްތަ ދުވަހު ނެރުނު ބަޔާނެއްގައި ބުނީ "އިރާނުން ނުހައްގުން ހައްޔަރުކޮށް ބަންދުކޮށްފައިވާ އެމެރިކާ ރައްޔިތުން މިހާރުން މިހާރަށް ދޫކޮށްލާ އެމީހުންގެ އާއިލާތަކާއި ހަވާލު ކުރުމަށް ގޮވާލާ "ކަމަށެވެ. އެމެރިކާ އިން ނެރުނު ބަޔާނުގައި ވަކި މީހަކު ދޫކޮށްލުމަށް ގޮވާލާފައި ނުވެއެވެ.
އާދީއްތަ ދުވަހު ޖަލަށް ލުމަށް ހުކުމްކޮށްފައިވާ އެމެރިކާ މީހާގެ ތަފްސީލީ މައުލޫމާތު އިރާނުގެ ދައުލަތުން ހާމަކޮށްފައިނުވާއިރު އިރާނުގެ އޮފިޝަލަކާ ހަވާލާދީ މީޑިއާތައް ބުނެފައި ވަނީ އެމީހާއަކީ ޑުއަލް ސިޓިޒެންޝިޕް އޮތް މީހެއް ކަމަށެެވެ. އަދި އެމީހާ އަށް އިއްވައިފައިވާ ހުކުމް އިސްތިއުނާފްކޮށްފައިވާ ކަމަށް ވެސް ރިޕޯޓްތައް ބުނެއެވެ.
އިރާނުގެ ސެންޓާ ފޯ ހިއުމަން ރައިޓްސް އިން ބުނެފައި ވަނީ އާދީއްތަ ދުވަހު އިރާނުން ހުކުމް ޖަލަށް ލުމަށް ހުކުމް އިއްވައިފައި ވަނީ ޗައިނީސް ދަރިކޮޅަށް ނިސްބަތްވާ އުމުރުން 37 އަހަރުގެ، ޔުނިވާސިޓީއެއްގެ ޕްރޮފެސަރެއް ކަމަށެވެ.
މިދިޔަ ޖެނުއަރީގައި އިރާނުގެ ޗީފް ޕްރޮސިކިއުޓަރު ވިދާޅުވެފައި ވަނީ އިރާނުގެ ޖަލުތަކުގައި 70 އަށް ވުރެ ގިނަ "ޖާސޫސޫން" ހުކުމް ތަންފީޒު ކުރަމުންދާ ކަމަށެވެ.
