ކަޝްމީރުގެ ޕާކިސްތާނާވީ ފަޅީގައި ޗައިނާއިން މަގު ހަދާތީ އެކަމުގެ ނުރުހުން!

ޖަމްމު ކަޝްމީރުގެ ޕާކިސްތާނާވީ ފަޅީގައި ޗައިނާއިން 33 ކިލޯމީޓަރުގެ މަގެއް ހަދަމުން އަންނާތީ އެކަމާ ޖަމްމު ކަޝްމީރުގެ ރައްޔިތުން ނުރުހުން ފާޅުކޮށްފިއެވެ.

ރިޕޯޓްތައް ބުނާ ގޮތުން ކަޝްމީރުގެ ޕާކިސްތާނާވީ ފަޅީގައި ޗައިނާ ސަރުކާރުގެ އެހީގައި ހަދަމުން އަންނަ 33 ކިލޯމީޓަރުގެ ބޮޑު މަގު ހެދުމަށް ކަޝްމީރު ރައްޔިތުން ވަނީ ދެކޮޅު ހަދާފައެވެ. އެގޮތުން ކަޝްމީރުގެ ރައްޔިތުން ބުނަމުން އަންނަނީ ޗައިނާއިން ބޮޑު މަގެއް ހެދުމުގެ ބޭނުމަކީ ކަޝްމީރުގައި ޗައިނާގެ މިލިޓަރީ ބޭސްއެއް ހެދުމަށް ކަމަށެވެ.

މި މައްސަލަ ހޫނުވީ ޕާކިސްތާނުގެ މީޑިއާއަކުން ޖަމްމު ކަޝްމީރުގައި ޗައިނާ ސަރުކާރުގެ ހިލޭ އެހީގެ ދަށުން މަގެއް ހަދަމުން އަންނައިރު، ޕާކިސްތާނު ސަރުކާރުން ކަޝްމީރުން ބިމެއް ޗައިނާ ސަރުކާރަށް ދޭން ނިންމާފައިވާކަން ފަޅާ އަރުވާލި ހިސާބުންނެވެ.

ކަޝްމީރު ރައްޔިތުން ނުރުހުން ފާޅުކޮށް މުޒާހަރާ ކުރަމުން އަންނައިރު، މުޒާހަރާގެ ބައިވެރިން ގޮވަމުން އަންނަނީ އިތުރު ހަނގުރާމައަކަށް ދިޔުމަށް ބޭނުންނުވާ ކަމަށެވެ.

ކަޝްމީރުގައި ޗައިނާ ސަރުކާރުގެ ހިލޭ އެހީގެ ދަށުން 33 ކިލޯމީޓަރުގެ މަގެއް ހަދަމުން އަންނައިރު ޗައިނާ ސަރުކާރުން އަންނަނީ ޕާކިސްތާނުގައި ތަރައްގީގެ ގިނަ މަޝްރޫޢުތަކެއް ކުރިޔަށް ގެންދަމުންނެވެ.