ނަވަލްނީ ފުލުހުންގެ ބެލުމުގެ ދަށަށް ގެންގޮސްފި

ސިއްޙީ ފަރުވާއަށް ޖަރުމަނަށް ވަޑައިގަތުމަށްފަހު ރަޝިޔާގެ އިދިކޮޅު ލީޑަރު އެލެކްސީ ނަވަލްނީ އަނބުރާ ޤައުމަށް ވަޑައިގަތުމާއިއެކު ފުލުހުންގެ ބެލުމުގެ ދަށަށް ގެންގޮސްފިއެވެ.

ނަަވަލްނީގެ ސްޕޯކްސްމަން ކިރާ ޔަރްމީޝް ވިދާޅުވީ ފުލުހުންގެ ބެލުމުގެ ދަށަށް ނަވަލްނީ ގެންދިޔަ ސަބަބު ފުލުހުން ހާމަކޮށްފައި ނުވާކަމަށާއި ނަވަލްނީގެ ވަކީލު އެމީހުންނާއި އެކުގައި ދިއުމުގެ ހުއްދަވެސް ދީފައި ނުވާކަމަށެވެ.

ޖަރުމަނުގެ ހޮސްޕިޓަލުގައި 32 ދުވަސް ވަންދެން ފަރުވާ ހޯއްދެވުމަށްފަހު ނަވަލްނީ ހޮސްޕިޓަލުން ދޫކޮށްލާފައިވަނީ މިދިޔަ އަހަރުގެ ސެޕްޓެމްބަރު މަހުގެ 20 ވަނަ ދުވަހުއެވެ.

އެއާއެކު ރަޝިއާގެ ސަރުކާރުން ވަނީ ނަވަލްނީ އަނބުރާ ޤައުމަށް ގެނައުމަށް ވަރަށް ބޮޑަށް ބާރު އަޅާފައެވެ. އެގޮތުން ނަވަލްނީއަކީ މިހާރުވެސް ޙުކުމެއްގެ ދަށުން ސަސްޕެންޝަނެއްގައި ހުންނެވި ބޭފުޅަކަށްވެފައި، މިހާރު ޤައުމުން ބޭރުގައި ހުންނަވަނީ ސަސްޕެންޝަންގެ އުސޫލުތަކާ ޚިލާފަށް ކަމަށް ބުނެ ރަޝިއާގެ ޕްރިޒަން ސަރވިސް އިން ވަނީ ވަގުތުން ނަވަލްނީ އެނބުރި ޤައުމަށް ވަޑައިގަތުމަށް އަމުރު ކޮށްފައެވެ.

ގައުމަށް އެނބުރި ވަޑައިގަންވަމުން މީޑިއާތަކާއި ވާހަކަ ދައްކަވަމުން ނަވަލްނީ ވިދާޅުވީ، އެއްވެސް ކަމަކާ ޖެހިލުންވެވަޑައިނުގަންނަވާ ކަމަށެވެ. އަދި އެނބުރި ޤައުމަށް ވަޑައިގެންނެވޭތީ އުފާ ކުރައްވާ ކަމަށް ވެސް ނަވަލްނީ ވިދާޅުވިއެވެ.

އިންޒާރުތަކާއި އެކުވެސް ނަވަލްނީ އެނބުރި ޤައުމަށް ވަޑައިގަތުމަކީ އެ ޤައުމުގެ ރައީސް ވްލަޑިމިއަރ ޕުޓިންގެ ސަރުކާރަށް ކުރައްވާ ޗެލެންޖެއްގެ ގޮތުގައި ބޭރުގެ މީޑިއާތަކުން ވަނީ ސިފަ ކޮށްފައެވެ.

އެގޮތުން މޮސްކޯގެ ޕްރިޒަން ސަރވިސް އިން މިހާރުވެސް ވަނީ ޕެރޯލްގެ ޤަވާއިދުތަކާ ނަވަލްނީ ޚިލާފުވެވަޑައިގެންފައިވާ ކަމަށް ބުނެ، އޭގެ ނަތީޖާއެއްގެ ގޮތުން 3 އަހަރާއި 6 މަސް ދުވަހުގެ ޖަލު ޙުކުމެއް އައިސްދާނެ ކަމަށް ބުނެއެވެ.

އޭގެ އިތުރުން، ނަވަލްނީގެ މައްޗަށް ތުހުމަތު ކުރެވޭ އިތުރު މައްސަލަތަކެއް ވެސް ރަޝިއާގެ ތަހުޤީޤީ އިދާރާތަކުން ބަލަމުންދާއިރު، ސާބިތުވެއްޖެ ނަމަ މަދުވެގެން 10 އަހަރުގެ ޖަލު ޙުކުމް އަންނާނެ ކަމަށް ބެލެވޭކަމަށް ބޭރުގެ މީޑިއާތަކުން ރިޕޯޓް ކުރެއެވެ.

ނަވަލްނީ މިހާރުވެސް ސަސްޕެންޝަންގައި ހުންނެވީ ވައްކަމުގެ މައްސަލައަކާއި ގުޅިގެން ކަމަށް ވާއިރު އެއީ ސިޔާސީ ދައުވާއެއް ކަމަށް ނަވަލްނީ ތަކުރާރުކޮށް ވިދާޅުވެއެވެ.

އުމުރުން 44 އަހަރުގެ އެލެކްސީ ނަވަލްނީ އަށް މަޝްހޫރުކަން ލިބިގެން ދިޔައ،ީ 2012 ވަނަ އަހަރު ރައީސް ވްލަޑީމިއާ ޕުޓިން ތިން ވަނަ ދައުރަކަށް ހޮވިވަޑައިގަތުމުން ބޭއްވި މުޒާހަރާތަކުގައި އޭނާ ދެއްވި ފޯރި ގަދަ ތަގުރީރުތަކުގެ ސަބަބުންނެވެ.

ރަޝިއާ ސަރުކާރުގެ ކޮރަޕްޝަނާ ދެކޮޅަށް އަޑު އުފުއްލަވަމުން ގެންދަވާ ނަވަލްނީގެ ސިއްހީ ހާލުކޮޅު ގޯސްވީ އޮގަސްޓު މަހުގެ 20 ވަނަ ދުވަހު ސައިބީރިޔާ އިން މޮސްކޯ އަށް ދަތުރު ކުރަމުން ދިޔަ ފްލައިޓެއްގެ ތެރެއިން ސައިފޮދެއް ހިއްޕެވި ފަހުންނެވެ. އިދިކޮޅުން ތުހުމަތުކުރާ ގޮތުގައި ނަވަލްނީ އަށް ވިހަ ދިނުމުގެ ފަހަތުގައި ވަނީ ރަޝިޔާ ސަރުކާރުން ކަމަށްވާއިރު ސަރުކާރުން ވަނީ އެ ވާހަކަތައް ދޮގުކޮށްފައެވެ.