ލެސްޓާ ދެވަނައަށް، ޗެލްސީއަށް މުހިންމު މޮޅެއް

އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ސައުތެމްޓަން ބަލިކޮށް ލީގު ތާވަލުގެ ދެވަނައަށް ލެސްޓާ ސިޓީ ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ލެސްޓާ މޮޅުވީ ސައުތެމްޓަން އަތުން 2-0 ގެ ނަތީޖާއަކުންނެވެ.

މި މެޗަށް ސައުތެމްޓަނުން ނުކުތީ ކޮވިޑް-19 ގެ ސަބަބުންނާއި، އަނިޔާގެ ސަބަބުން އެ ޓީމުގެ ބައެއް މުހިންމު ކުޅުންތެރިން ނުލައެވެ. މި މެޗުގައި ލެސްޓާއިން ގިނަ ހަމަލާތަކެއް ފޮނުވާލިއިރު، އެ ޓީމުން މެޗުގައި ލީޑު ނަގާފައިވަނީ ފުރަތަމަ ހާފުގައެވެ. އެގޮތުން މެޗުގެ 37 ވަނަ މިނެޓުގައި ލެސްޓާއަށް ލީޑު ނަގައިދިނީ ޖޭމްސް މެޑިސަންއެވެ. އަދި މެޗުގައި ލެސްޓާއިން ލީޑު ފުޅާކޮށްފައިވަނީ އިތުރު ވަގުތުގައި ހާވީ ބާންސް ކާމިޔާބުކުރި ލަނޑުންނެވެ.

މި މޮޅާއެކު ލެސްޓާ ތާވަލުގެ ދެވަނައަށް ޖެހިލީ ކުޅުނު 18 މެޗުން ލިބުނު 35 ޕޮއިންޓާއެކުއެވެ. ކުރިން ދެވަނައިގައި އޮތް އެންމެ ފަހުގެ ޗެމްޕިއަން ލިވަޕޫލް މި ވަގުތު ތިންވަނައިގައި އޮތީ 17 މެޗުން 33 ޕޮއިންޓާއެކުއެވެ. ލީގުގައި އާދިއްތަ ދުވަހުގެރޭ ލިވަޕޫލުން އަމިއްލަ ދަނޑުގައި ތާވަލުގެ އެއްވަނައިގައި އޮތް މެންޗެސްޓާ ޔުނައިޓެޑާ ދެކޮޅަށް ނުކުންނައިރު، އެ މެޗުގެ ނަތީޖާ ނުކުންނަ ގޮތަކުން ލީގުގެ މަގާމުތަކަށް ބަދަލުއަންނާނެއެވެ. ޔުނައިޓެޑް އެއްވަނައިގައި އޮތީ 17 މެޗުން 36 ޕޮއިންޓާއެކުއެވެ.

މީގެ އިތުރުން ލީގުގައި ހޮނިހިރު ދުވަހުގެރޭ ކުޅުނު މެޗުން ޗެލްސީ މޮޅުވީ ރަށުން ބޭރުގައި ފުލަމް އަތުން 1-0 ގެ ނަތީޖާއަކުންނެވެ. މި މެޗުގެ ކުރިން ޗެލްސީން ލީގުގައި އެންމެ ފަހުން ކުޅުނު ތިން މެޗުންވެސް މޮޅެއް ހޯދިފައެއް ނުވެއެވެ.

މި މެޗުގައި ފުލަމަށް މައްސަލަތަކެއް ދިމާވީ ފުރަތަމަ ހާފު ނިމެން މިނެޓަކަށް ވެފައި ވަނިކޮށް އެ ޓީމުގެ އެންޓޯނީ ރޮބިންސަނަށް ސީދާ ރަތް ކާޑެއް ދެއްކުމުންނެވެ. އޭނާއަށް ރަތް ކާޑު ދެއްކީ ޗެލްސީގެ ކެޕްޓަން ސެޒާ އަޒްޕިލިކިއުޓޭއަށް ކުރި ނުރައްކާތެރި ފައުލަކާ ގުޅިގެންނެވެ.

އެއާއެކު ފުލަމުން އެއް ކުޅުންތެރިއަކު މަދުކޮށް ދެވަނަ ހާފު ކުޅުނުއިރު، ޗެލްސީން މެޗުގައި ލީޑު ނަގާފައިވަނީ 78 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ މޭސަން މައުންޓެވެ. އަދި އޭގެ ފަހުން މެޗުގެ ފަހު ކޮޅުގައި ޗެލްސީގެ ޓިމޯ ވާނާއަށް ލަނޑެއް ޖަހަން ހުސް ދެ ފުރުސަތެއް ލިބި ވަނީ ބޭކާރުވެފައެވެ.

މި ނަތީޖާއާއެކު ޗެލްސީ ލީގުގެ ހަތްވަނައިގައި އޮތީ 18 މެޗުން 29 ޕޮއިންޓާއެކުއެވެ. އަދި ޗެލްސީ އަތުން ބަލިވި ފުލަމް އޮތީ ތާވަލުގެ ފުލުން ތިންވަނައިގައި 17 މެޗުން 12 ޕޮއިންޓާއެކުއެވެ.