ދިރާގު ދިވެހި ޕްރިމިއާ ލީގުގެ ތާވަލު މިހާރު އޮތް ގޮތުން ސުޕަ ޔުނައިޓެޑް ސްޕޯޓްސް (ސަސް) އާ ދެކޮޅަށް ކުޅޭ މެޗުން މޮޅުވުން މަޖުބޫރު ކަމަށް ޔުނައިޓެޑް ވިކްޓަރީ (ޔޫވީ) ގެ ކޯޗު މުޙައްމަދު އާދަމް ބުނެފިއެވެ.

ލީގުގައި މިހާތަނަށް މޮޅެއް ނުލިބި އޮތް ހަމައެކަނި ޓީމަކީ ޔޫވީއެވެ. އެއާއެކު ޔޫވީ އޮތީ ތާވަލުގެ ފުލުގައި ކުޅުނު ފަސް މެޗުން ލިބުނު އެންމެ ދެ ޕޮއިންޓާއެކުއެވެ.

ލީގުގައި ހޮނިހިރު ދުވަހުގެރޭ ސަސްއާ ދެކޮޅަށް ނުކުތުމުގެ ކުރިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން އާދަމް ބުނީ އެ ޓީމުގައި އަނިޔާގެ މައްސަލަތައް ގިނަކަމުގެ ވާހަކަ އެތައް ފަހަރަކު ދެއްކިއްޖެ ކަމަށާއި، އެކަމަކު އެ ވާހަކަތައް ނުދައްކައި ޓީމުގައި ތިބި އެހެން ކުޅުންތެރިން ލައިގެންވެސް މިކަން ކުރެވިދާނެކަން އެންމެ ފަހުން ކުޅުނު ކުލަބު އީގަލްސް މެޗުން އެނގުނު ކަމަށެވެ.

އަދި އެ ކަންތައްތައް ހައްލުކުރަން ކުރެވޭނެ މަގެއް ހޯދަމުން އަންނަ ކަމަށާއި، އެކަންތައްތައް ހައްލުނުކޮށް ކުރިއަށް ނުދެވޭނެކަން 100 އިންސައްތަ ޔަގީން ކަމަށްވެސް ވަނީ ބުނެފައެވެ. އާދަމް ބުނީ ސަސް މެޗަކީ އެ ޓީމަށް ވަރަށް މުހިއްމު މެޗެއް ކަމަށާއި، އެގޮތުން ލީގުގެ ތާވަލު މިހާރު އޮތް ގޮތުން އެ މެޗަކީ ނުނަގާ ނުވާނެ މެޗެއް ކަމަށެވެ.

މި ފަހަރު މުޅިން އަލަށް ފުރަތަމަ ޑިވިޝަނުގައި ސަސްއިން ވާދަކުރަމުން އަންނައިރު، ލީގުގައި މިހާތަނަށް އެ ޓީމު ބަލިވީ އެންމެ ފަހުން ކުޅުނު މެޗުން ވަރުގަދަ މާޒިޔާ ސްޕޯޓްސް އެންޑް ރެކްރިއޭޝަން އަތުންނެވެ.

ޔޫވީ މެޗުގެ ކުރިން ސަސްގެ ކޯޗު އަޙްމަދު ނާޝިދު (ނާދު) ބުނީ އެ ޓީމުގެ ތަމްރީނުތައް ފެށުނުއިރުއްސުރެން އެކުވެރިކަމުގެ މެޗުތަކުންވެސް ބަލިވެފައި ވަނީ މާޒިޔާ އަތުން އެކަނި ކަމަށާއި، އެހެންކަމުން ކުރިއަށް ހުރި މެޗުތަކުގައި މިދިޔަ މެޗުގެ ސަބަބުން އަސަރެއް ނުކުރާނެ ކަމަށް އުންމީދުކުރާ ކަމަށެވެ. އަދި ޔޫވީ މެޗަކީ މޮޅުނުވެވޭވަރުގެ މެޗެއް ނޫން ކަމަށާއި، އެންމެ ފަހުން މާޒިޔާއާ ދެކޮޅަށް ކުޅުނު މެޗުގެ ފަހު ހާފުގައި ދެއްކި ކުޅުން ދައްކައިފިނަމަ، ޔުވީ މެޗުގައި ނަތީޖާ ނެރެވޭނެ ކަމަށް ލަފާކުރެވޭ ކަމަށްވެސް ނާދު ބުންޏެވެ.

ލީގުގައި މިހާތަނަށް ސަސް އެންމެ މެޗަކުން ބަލިވެފައިވާއިރު، އެ ޓީމު އޮތީ ތާވަލުގެ ހަވަނައިގައި ފަސް މެޗުން ހަ ޕޮއިންޓާއެކުއެވެ. ދިރާގު ދިވެހި ޕްރިމިއާ ލީގުގައި ޔޫވީ އާއި ސަސް ބައްދަލުކުރާ މެޗު ފަށާނީ ހޮނިހިރު ދުވަހުގެރޭ 21:00 ގައެވެ.