ބޭރު ކުޅުންތެރިންނާއެކު ޕްރީ-ސީޒަނެއް ނުލިބުމަކީ ބޮޑު ގެއްލުމެއް: މޯހަން
14 ޖެނުއަރީ 2021 | ބުރާސްފަތި 14:00އެންމެ ފަހުން ކުޅުނު މެޗުތަކުން އީގަލްސް އާއި ގްރީން ސްޓްރީޓްސްވެސް ވަނީ ލީގުގެ ފުރަތަމަ މޮޅު ހޯދާފައި
ކުލަބު އީގަލްސްގެ ކޯޗު މުޙައްމަދު ޝިޔާޒް (މޯހަން)
ކުލަބު އީގަލްސްއާ ދާދި ފަހުން ގުޅުނު ބޭރު ކުޅުންތެރިންނާއެކު ޕްރީ-ސީޒަނެއް ނުލިބުމަކީ ވަރަށް ބޮޑު ގެއްލުމެއް ކަމަށް އެ ޓީމުގެ ކޯޗު މުޙައްމަދު ޝިޔާޒް (މޯހަން) ބުނެފިއެވެ.
ދިރާގު ދިވެހި ޕްރިމިއާ ލީގުގައި މިހާތަނަށް އީގަލްސްއިން ފަސް މެޗު ކުޅެފައިވާއިރު، އެ ޓީމު މޮޅުވެފައިވަނީ އެންމެ މެޗަކުންނެވެ. އެއާއެކު އެ ޓީމު އޮތީ ތާވަލުގެ ފުލުން ދެވަނައިގައި ފަސް މެޗުން ހަތަރު ޕޮއިންޓާއެކުއެވެ.
މި ސީޒަން އީގަލްސްއިން ފަށާފައިވަނީ ހުސް ދިވެހި ކުޅުންތެރިންނާއެކުއެވެ. އީގަލްސްއިން މި ސީޒަނުގައި ގެނައި ފުރަތަމަ ބިދޭސީ ކުޅުންތެރިޔަކީ އެ ޓީމުގެ ގޯލުކީޕަރު މޮންޓެނީގްރޯގެ މިލާން ޔެލޮވަކެވެ. އޭގެ ފަހުން އީގަލްސްއިން ވަނީ ޔަމަނުގެ ގައުމީ ޓީމަށް ކުޅެފައިވާ މިޑްފީލްޑަރު އޮސާމާ އަންބާރާއި މިސްރުގެ ފޯވާޑް މުޙައްމަދު އޮސާމާ އެ ޓީމަށް ގެނެސްފައެވެ.
ލީގުގައި ހުކުރު ދުވަހުގެރޭ ކުލަބު ގްރީން ސްޓްރީޓްސްއާ ދެކޮޅަށް ނުކުތުމުގެ ކުރިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މޯހަން ބުނީ އެ ޓީމާ ގުޅުނު ބޭރު ކުޅުންތެރިންނާއެކު ޕްރީ-ސީޒަނެއް ނުލިބުމަކީ ވަރަށް ބޮޑު ގެއްލުމެއް ކަމަށާއި، ހާއްސަކޮށް އެޓޭކަށް ދާއިރު، އެޓޭކުގައި ތިބޭ ކުޅުންތެރިންނާ އެ ކުޅުންތެރިންގެ ކޮމްބިނޭޝަން ދިމާނުވުމުގެ މައްސަލަ ފާހަގަވެފައިވާ ކަމަށެވެ. އެހެންކަމުން މިދިޔަ ދުވަސްތަކުގައި އެކަންކަން ރަނގަޅު ކުރުމަށް ވަރަށް ބޮޑަށް މަސައްކަތް ކޮށްފައިވާނެ ކަމަށާއި، އެކަމަކު ކުޅުންތެރިންގެ ކޮމްބިނޭޝަން އެއްކޮށް ދިމާކުރުމަށް ދުވަސް ނަގާނެ ކަމަށްވެސް މޯހަން ބުންޏެވެ.
އީގަލްސް މެޗުގެ ކުރިން ގްރީން ސްޓްރީޓްސްގެ ކޯޗު އަލީ ނިސްތާރު މުޙައްމަދު ބުނީ ލީގުގައި އެންމެ ފަހުން ކުޅުނު ތިން މެޗުން ބަލިވެފައިނުވާއިރު، އެ ސިލްސިލާ ދެމެހެއްޓުމަކީ އެ ޓީމުން އެންމެ އިސްކަންދޭނެ އެއް ކަންތައް ކަމަށެވެ. އަދި ތާވަލުގެ އެންމެ ކުރީގައި އޮތް ތިން ކަލަބާ ދެމެދު އޮތީ ވަރަށް ކުޑަ ފަރަގެއް ކަމަށާއި، ޓީމުގެ ނަތީޖާތައް ދާ ގޮތުން ގަދަ ހަތަރަކަށް އެރުމުގެ ފުރުސަތު ވަރަށް ބޮޑު ކަމަށްވެސް ނިސްތާރު ބުންޏެވެ.
ނިސްތާރު އިތުރަށް ބުނީ އީގަލްސް އަކީ ޒުވާން ކުޅުންތެރިންނަށް ވަރަށް ބޮޑު އިސްކަމެއް ދޭ ޓީމެއް ކަމަށާއި، ހަމަ އެފަދައިން ގްރީން ސްޓްރީޓްސްގައިވެސް އޮތީ ވަރަށް ޒުވާން ސްކޮޑެއް ކަމަށެވެ. އެކަމަކު އީގަލްސްއާ ވަރަށް ފަހުން ބިދޭސީ ކުޅުންތެރިން ގުޅުނު ކަމަށާއި، އެއާއެކު މިހާރު އޮތީ ސީޒަން ފެށިއިރު އޮތް އީގަލްސްއެއް ނޫން ކަމަށްވެސް ނިސްތާރު ބުންޏެވެ.
ލީގުގައި އެންމެ ފަހުން ކުޅުނު މެޗުތަކުން އީގަލްސް އާއި ގްރީން ސްޓްރީޓްސްވެސް ވަނީ ލީގުގެ ފުރަތަމަ މޮޅު ހޯދާފައެވެ. ލީގު ތާވަލުގައި ގްރީން ސްޓްރީޓްސް އޮތީ އީގަލްސްއަށްވުރެ ކުރީގައި، ތާވަލުގެ ހަވަނައިގައެވެ. އެގޮތުން ގްރީން ސްޓްރީޓްސްއަށް ވަނީ މިހާތަނަށް ކުޅުނު ފަސް މެޗުން ފަސް ޕޮއިންޓް ލިބިފައެވެ.
ދިރާގު ދިވެހި ޕްރިމިއާ ލީގުގައި އީގަލްސް އާއި ގްރީން ސްޓްރީޓްސް ބައްދަލުކުރާ މެޗު ފަށާނީ ހުކުރު ދުވަހުގެރޭ 21:00 ގައެވެ.
