ދިވެރިރާއްޖޭގެ ގައުމީ ޔުނިވަރސިޓީ (އެމްއެންޔޫ) އާއި ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް) އާ ދެމެދު ލައިބްރަރީ ލޯން ޚިދުމަތް ދިނުމަށް އެއްބަސްވުމެއްގައި ސޮއިކޮށްފިއެވެ.
މިއެއްބަސްވުމުގެ ދަށުން ދެ ޔުނިވަރސިޓީގެ ދަރިވަރުންނަށާއި މުވައްޒަފުންނަށް އެއް ޔުނިވަރސިޓީގެ ލައިބްރަރީ އިން ނުލިބޭ ޚިދުމަތްތައް އަނެއް ލައިބްރަރީ އިން ހޯދޭނެއެވެ.
އެމްއެންޔޫގައި ބުރާސްފަތި ދުވަހު ބޭއްވި ރަސްމިއްޔާތެއްގައި މިއެއްބަސްވުމުގައި އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލަރ ޑރ. މުހައްމަދު ޝަރީފް އަހުމަދެވެ. އައިޔޫއެމްގެ ފަރާތުން ސޮއިކުރެއްވީ އެ ޔުނިވަރސިޓީގެ ވައިސް ޗާންސެލަރ ޑރ. އިބްރާހިމް ޒަކަރިއްޔާ މޫސާ އެވެ.
އެއްބަސްވުމާއި ގުޅޭ ގޮތުން އެމްއެންޔޫގައި ވައިސް ޗާންސެލަރ ޑރ. މުހައްމަދު ޝަރީފް ވިދާޅުވީ ޔުނިވަރސިޓީގެ ލައިބްރަރީގައި ވަސީލަތްތައް ގިނަ ނަމަވެސް ދެ ޔުނިވަރސިޓީއަކުން ގުޅިގެން މަސައްކަތް ކުރުމުން ދަރިވަރުންނަށް އޭގެ ގިނަ ފައިދާތަކެއް ކުރާނެ ކަމަށެވެ. އަދި ދަރިވަރުންނަށް ވަރަށް ބޮޑު ލުއި ފަސޭހަކަމެއް ލިބިގެންދާނެކަން ޝަރީފް ފާހަގަކުރެއްވިއެވެ.
މީގެ އިތުރުން އައިޔޫއެމްގެ ވައިސް ޗާންސެލަރ ޑރ. އިބްރާހިމް ޒަކަރިޔާ މޫސާ ވިދާޅުވީ ކުރިއަށް އޮތްތަނުުގައި ދެ ޔުނިވަރސިޓީން ގުޅިގެން ގިނަ މަސައްކަތްތައް ކުރާނެ ކަމަށެވެ. އެގޮތުން ދެ ޔުނިވަރސިޓީގެ ދެމެދު އޮންލައިން ޑޭޓާބޭސް ޝެއަރ ކުރުމަކީ ކުރެވޭ އުންމީދެއް ކަމަށެވެ.
