އިނގިރޭސި ޕްރިމިއާ ލީގުގައި ބުދަ ދުވަހުގެރޭ ކުޅުނު މެޗުން ބްރައިޓަން އަތުން ހަނިގޮތަކަށް މެންޗެސްޓާ ސިޓީ މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން ސިޓީ މޮޅުވީ 1-0 ގެ ނަތީޖާއަކުންނެވެ. މި މޮޅާއެކު ސިޓީން ވަނީ އެއްވެސް މުބާރާތެއްގައި މެޗަކުން ބަލިނުވެ 14 މެޗު ހަމަކޮށްފައެވެ.

މި މެޗުގައި ފެނިގެންދިޔަ ހަމައެކަނި ލަނޑު ސިޓީން ކާމިޔާބުކޮށްފައިވަނީ ފުރަތަމަ ހާފު ނިމެން މިނެޓަކަށް ވެފައި ވަނިކޮށެވެ. ކެވިން ޑި ބްރޭނާ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ޒުވާން މިޑްފީލްޑަރު ފިލް ފޯޑެންއެވެ. އޭގެ ފަހުން ލީޑު ފުޅާކުރަން ސިޓީގެ ފޯވާޑް ރިޔާދު މާރޭޒަށް ރަނގަޅު ފުރުސަތެއް ލިބުނުއިރު، އެ ހަމަލާ ދިޔައީ ގޯލާ އަމާޒުނުވެއެވެ. އަދި އެ ޓީމުގެ މިޑްފީލްޑަރު އިލްކާއީ ގުންޑޮގާނަށްވެސް ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ބްރައިޓަނުގެ ގޯލްކީޕަރު ވަނީ މަތަކޮށްފައެވެ.

މި މެޗުގައި ނަތީޖާ އެއްވަރުކުރަން ބްރައިޓަނަށް އެންމެ ހުސް ފުރުސަތެއް ލިބުނީ އެ ޓީމުގެ އެލެކްސިސް މެކްސް އެލިސްޓާއަށެވެ. އެކަމަކު އޭނާ ފޮނުވާލި ހަމަލާ ދިޔައީ ގޯލުގެ ހުރަސް ދަނޑި މަތިން ބޭރަށެވެ. އަދި މެޗުގެ އިތުރު ވަގުތުގައި ސިޓީއަށް ޕެނަލްޓީއެއް ލިބުނު ނަމަވެސް، ސިޓީގެ ފޯވާޑް ރަހީމް ސްޓާލިން ފޮނުވާލި ޕެނަލްޓީ ދިޔައީ ގޯލާ އަމާޒުނުވެއެވެ. މިއީ އޭރިއާ ތެރެއިން ސިޓީގެ ޑި ބްރޭނާއަށް ބްރައިޓަނުގެ ރޮބާޓް ސަންޗޭޒް ކުރި ފައުލަކަށް ރެފުރީ ދިން ޕެނަލްޓީއެކެވެ.

މި މޮޅާއެކު ސިޓީ އޮތީ ތާވަލުގެ ތިންވަނައިގައި ކުޅުނު 16 މެޗުން ލިބުނު 32 ޕޮއިންޓާއެކުއެވެ. އެއްވަނައިގައި އޮތް މެންޗެސްޓާ ޔުނައިޓެޑަށް 17 މެޗުން 36 ޕޮއިންޓް ލިބިފައިވާއިރު، ދެވަނައިގައި އޮތް އެންމެ ފަހުގެ ޗެމްޕިއަން ލިވަޕޫލަށް 17 މެޗުން ވަނީ 33 ޕޮއިންޓް ލިބިފައެވެ. އަދި ބުދަ ދުވަހުގެރޭ ސިޓީ އަތުން ބަލިވި ބްރައިޓަން އޮތީ ތާވަލުގެ 17 ވަނައިގައި 18 މެޗުން 14 ޕޮއިންޓާއެކުއެވެ.

މީގެ އިތުރުން ލީގުގައި ބުދަ ދުވަހުގެރޭ ކުޅުނު މެޗުން ޓޮޓެންހަމް ހޮޓްސްޕާ އެއްވަރުވީ ފުލަމާ ވާދަކޮށް 1-1 ގެ ނަތީޖާއަކުންނެވެ. މިއީ 2009 ވަނަ އަހަރުގެ ޑިސެމްބަރު މަހަށްފަހު ޕްރިމިއާ ލީގުގައި މި ދެ ޓީމު އެއްވަރުވި ފުރަތަމަ މެޗެވެ.

ޓޮޓެންހަމުގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީވެސް އެ ޓީމުންނެވެ. އެގޮތުން މެޗުގެ 25 ވަނަ މިނެޓުގައި ސާޖިއޯ ރެގީލޯން ހުރަސްކޮށްދިން ބޯޅައަކުން ޓޮޓެންހަމަށް ލީޑު ނަގައިދިނީ އިތުބާރު ފޯވާޑް ހެރީ ކޭންއެވެ. އެކަމަކު މެޗުގެ 74 ވަނަ މިނެޓުގައި ފުލަމުން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އިވާން ކަވަލެއިރޯއެވެ.

މި ނަތީޖާއާއެކު ޓޮޓެންހަމް އޮތީ ތާވަލުގެ ހަވަނައިގައި ކުޅުނު 17 މެޗުން ލިބުނު 30 ޕޮއިންޓާއެކުއެވެ. އަދި ޓޮޓެންހަމާ އެއްވަރުކުރި ފުލަމް އޮތީ ތާވަލުގެ ފުލުން ތިންވަނައިގައި 16 މެޗުން 12 ޕޮއިންޓާއެކުއެވެ.