އެތުލެޓިކޯއަށް އެއްވަނައިގައި ހަތަރު ޕޮއިންޓުގެ ލީޑެއް

ސްޕެނިޝް ލީގުގައި އަންގާރަ ދުވަހުގެރޭ ސެވިއްޔާ ބަލިކޮށް އެތުލެޓިކޯ މެޑްރިޑުން ތާވަލުގެ އެއްވަނައިގައި ހަތަރު ޕޮއިންޓުގެ ލީޑެއް ނަގައިފިއެވެ.

އަމިއްލަ ދަނޑުގައި ކުޅުނު މެޗުން އެތުލެޓިކޯ މޮޅުވީ 2-0 ގެ ނަތީޖާއަކުންނެވެ.

މި މެޗުގައި އެތުލެޓިކޯއިން މޮޅު ކުޅުމެއް ދެއްކިއިރު، މެޗުގެ 17 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ޑިފެންޑަރު ކިއެރަން ޓްރިޕިއާ ދިން ބޯޅައަކުން މި ލަނޑު އެތުލެޓިކޯއަށް ކާމިޔާބުކޮށްދިނީ ފޯވާޑް އެންހެލް ކޮރެއާއެވެ. އޭގެ ފަހުން މެޗުގައި ނަތީޖާ އެއްވަރުކުމަށް ސެވިއްޔާއަށްވެސް ރަނގަޅު ފުރުސަތުތަކެއް ލިބުނުއިރު، އެތުލެޓިކޯގެ ފޯވާޑް ލުއިސް ސުއަރޭޒަށްވެސް ވަނީ ލީޑު ފުޅާކުރަން ރަނގަޅު ފުރުސަތެއް ލިބި ބޭކާރުވެފައެވެ.

އެކަމަކު މެޗުގެ 76 ވަނަ މިނެޓުގައި އެތުލެޓިކޯއިން ވަނީ ލީޑު ފުޅާކޮށްފައެވެ. މިޑްފީލްޑަރު މާކޮސް ލޮރެންޓޭ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މިޑްފީލްޑަރު ސައުލް ނިގުއޭޒެވެ.

މި މޮޅާއެކު އެތުލެޓިކޯ އެއްވަނައިގައި އޮތީ ކުޅުނު 16 މެޗުން ލިބުނު 41 ޕޮއިންޓާއެކުއެވެ. އެންމެ ގާތުގައި އޮތް އެންމެ ފަހުގެ ޗެމްޕިއަން ރެއާލް މެޑްރިޑަށް 18 މެޗުން 37 ޕޮއިންޓް ލިބިފައިވާއިރު، ތިންވަނައިގައި އޮތް ބާސެލޯނާއަށް 18 މެޗުން ލިބިފައިވަނީ 34 ޕޮއިންޓެވެ.