އިންފޮމޭޝަން ކޮމިޝަނަރަށް ހުށަހަޅާ އަހަރީ ރިޕޯޓު ފޮނުވުމަށް އަންގައިފި
11 ޖެނުއަރީ 2021 | ހޯމަ 21:01އަހަރީ ރިޕޯޓް އިންފޮމޭޝަން ކޮމިޝަނަރަށް ފޮނުވުމުގެ އެންމެ ފަހު ތާރީހަކީ ޖެނުއަރީ 31 ގެ 14:00
އިންފޮމޭޝަން ކޮމިޝަނަރ ހުސެއިން ފިޔާޒް މޫސާ
މަޢުލޫމާތު ހޯދައި ލިބިގަތުމުގެ ހައްގުގެ ގާނޫނުގައި ބަޔާންކުރާ "އަހަރީ ރިޕޯޓު" ދައުލަތުގެ އިދާރާތަކުން ތައްޔާރުކޮށް ފޮނުވުމަށް އިންފޮމޭޝަން ކޮމިޝަނަރުގެ އޮފީހުން އެދެފިއެވެ.
އެގޮތުން މަހޯލި ގާނޫނުގެ 42 ވަނަ މާއްދާގައި ލާޒިމްކުރާ މި ރިޕޯޓު ކޮންމެ އަހަރަކު ހުށަހެޅުމުގެ ޒިންމާއަކީ ގާނޫނުގައި ބަޔާންކޮށްފައިވާ ގޮތުގެ މަތީން އިދާރާތަކުގެ އިންފޮމޭޝަން އޮފިސަރުން ކުރައްވަންޖެހޭ ކަމަކަށް ވާއިރު، ފާއިތުވި އަހަރުގެ އަހަރީ ރިޕޯޓް ތައްޔާރުކޮށް އިންފޮމޭޝަން އޮފިސަރުންގެ އިސްނެގުމުގެ މަތީން ދައުލަތުގެ އިދާރާތަކުން، އިންފޮމޭޝަން ކޮމިޝަނަރަށް ފޮނުވުމަށް ބުނެ ދައުލަތުގެ އިދާރާތަކަށް ވަނީ ސިޓީއެއް ފޮނުވާފައިއެވެ.
ކޮމިޝަނުން ވަނީ ހަވާލާދެވިފައިވާ އާންމު ސިޓީގައި ބުނެފައިވާ ފޯމުގެ ބަދަލުގައި ވޭތުވެދިޔަ އަހަރުތަކެކޭ އެއްފަދައިން، މި އަހަރު ވެސް އިންފޮމޭޝަން އޮފިސަރުންގެ އިސްނެގުމުގެ މަތީން ދައުލަތުގެ އިދާރާތަކުން އިންފޮމޭޝަން ކޮމިޝަނަރަށް ފޮނުވަންޖެހޭ 2020 ވަނަ އަހަރުގެ ރިޕޯޓު ތައްޔާރުކޮށް ފޮނުވުމަށް އެދިފައެވެ.
މި ރިޕޯޓަކީ މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން މަޢުލޫމާތު ހޯދުމަށް އެދި ހުށަހަޅާ ހުށަހެޅުންތަކުގެ މައްޗަށް ބިނާކޮށް، ދައުލަތުގެ ކޮންމެ އިދާރާއަކުން ކަނޑައަޅާފައިވާ އިންފޮމޭޝަން އޮފިސަރުގެ އިސްނެގުމުގެ މަތީން ތައްޔާރުކޮށް އިންފޮމޭޝަން ކޮމިޝަނަރަށް ފޮނުވަން ޤާނޫނު ލާޒިމްކުރާ ރިޕޯޓެއްކަމުގައި ވަނީ ސިޓީގައި ފާހަގަކޮށްފައެވެ.
އަހަރީ ރިޕޯޓް އިންފޮމޭޝަން ކޮމިޝަނަރަށް ފޮނުވުމުގެ އެންމެ ފަހު ތާރީހަކީ ޖެނުއަރީ 31ގެ މެންދުރު 2:00އެވެ.
