މިއީ ގަދަ ހަތަރެއްގެ ޖާގަ ކަށަވަރުކުރަން މުހިންމު މޮޅެއް:ނިޒާމްބެ

އީގަލްސް އަތުން ލިބުނު މި މޮޅަކީ މާލޭ ލީގުގެ ގަދަ ހަތަރެއްގެ ޖާގަ ކަށަވަރުކުރުމަށް ލިބުނު މުހިންމު މޮޅެއް ކަމަށް ޓީސީގެ ކޯޗު މުހައްމަދު ނިޒާމް (ނިޒާމްބެ) ބުނެފި އެވެ.

މެޗަށް ފަހު ނޫސްވެރިންނަށް މައުލޫމާތު ދެމުން ނިޒާމްބެ ބުނީ މެޗުގައި ބޭނުންވީ ތިން ޕޮއިންޓް ކަމަށާއި، ލިބުނު ފުރުސަތުގެ ބޭނުން ނުހިފުމުގެ ވާހަކަ ތިން ޕޮއިންޓް ލިބުމުން ދެއްކުމުގެ ބޭނުމެއް ނެތް ކަމަށެވެ.

އެހެން ނަމަވެސް އޭނާ ބުނީ ފުރަތަމަ ހާފްގައިވެސް ޓީސީ އަށް ލަނޑު ޖަހަން ފުރުސަތު ލިބުނު ކަމަށާއި، ދެވަނަ ހާފްގައި ވަކިން ގިނަ އިން ލިބުނު ކަމަށެވެ. އެގޮތުން އެ ފުރުސަތުތައް ކޮންވާޓްކުރަން ނުކުޅެދުނު ނަމަވެސް އެއީ ޕާފޯމެންސްގެ މައްސަލައެއް ނޫން ކަމަށް ނިޒާމްބެ ބުންޏެވެ.

މެޗުގެ ފަހު 15 މިނެޓަށް އެރުވި ޓީސީގެ އަލީ ނަސޫހު ރަޝީދުއާ ބެހޭގޮތުން ނިޒާމްބެ ބުނީ އޭނާ އީގަލްސްއާ ދެކޮޅަށް ދެއްކި ކުޅުން އެހެން މެޗުތަކާ އަޅާއިރު ދަށް ކަމަށާއި، ބައެއް ފަހަރު އެންމެ ރަނގަޅު ކުޅުންވެސް ނުދެއްކިދާނެ ކަމަށެވެ.

ނިޒާމްބެ ބުނީ ޓީމަށް އަލަށް އަރުވާ ކުޅުންތެރިންގެ ފަރާތުން ރަނގަޅު ކުޅުމެއް ފެނިގެންދާ ކަމަށާއި، ޓީމަށް ރަނގަޅު ކުރިއެރުމެއް އަންނަމުންދާ ކަމަށް ފާހަގަކުރެވޭ ކަމަށެވެ.

ޓީސީ ވަނީ ކުޅުނު ފަސް މެޗުގެ ތެރެއިން ތިން މެޗު ކާމިޔާބުކޮށް، އެއް މެޗުން ބަލިވެފައެވެ. އަނެއް މެޗު ނިމުނީ އެއްވަރުވެގެންނެވެ.