ކ. މާލެ
|
11 ޖެނުއަރީ 2021 | ހޯމަ 18:21
ޔޮކޮހަމާ އެފްސީއަށް ކުޅެމުން އަންނަ އުމުރުން 53 އަހަރުގެ ކަޒުޔޯޝީ މިއުރާ
ޔޮކޮހަމާ އެފްސީއަށް ކުޅެމުން އަންނަ އުމުރުން 53 އަހަރުގެ ކަޒުޔޯޝީ މިއުރާ
އޭއެފްޕީ
މިއުރާ އެއްބަސްވުން އާކުރުން
ޔޮކޮހަމާގެ އެއްބަސްވުން 53 އަހަރުގެ މިއުރާ އާކޮށްފި
 
ޖޭ ލީގު ފަށާއިރު މިއުރާއަށް 54 އަހަރު ފުރޭނެ
 
ޔޮކޮހަމާގެ އެއްބަސްވުން މި އަހަރުގެ ނިޔަލަށް މިއުރާ ވަނީ އާކޮށްފައި

ޖަޕާނުގެ ފުރަތަމަ ޑިވިޝަން (ޖޭ ލީގު) ގައި ވާދަކުރަމުން އަންނަ ޔޮކޮހަމާ އެފްސީގެ އެއްބަސްވުން އުމުރުން 53 އަހަރުގެ ކަޒުޔޯޝީ މިއުރާ އާކޮށްފިއެވެ.

ޖަޕާނުގެ ފުޓުބޯޅައިގެ ރަސްގެފާނު އަދި ޖޭ ލީގުގައި މިހާތަނަށް ކުޅުނު އެންމެ ދުވަސްވީ ކުޅުންތެރިޔާގެ ޝަރަފު އޮންނަ މިއުރާ ވަނީ މި އަހަރުގެ ސީޒަނުގެ ނިޔަލަށް ޔޮކޮހަމާގެ އެއްބަސްވުން އާކޮށްފައެވެ. ފެބްރުއަރީ މަހުގެ 26 ވަނަ ދުވަހު މިއުރާއަށް 54 އަހަރު ފުރޭއިރު، ޖޭ ލީގުގެ ކުޅުން ފެށުމަށް ތާވަލުކޮށްފައިވަނީ އޭގެ އެއް ދުވަސް ފަހުން ފެބްރުއަރީ މަހުގެ 27 ވަނަ ދުވަހުއެވެ. އަދި ލީގު ނިންމަން ތާވަލުކޮށްފައިވަނީ ޑިސެމްބަރު މަހުގެ ހަތަރުވަނަ ދުވަހަށެވެ.

ޖޭ ލީގުގައި ލަނޑެއް ޖެހި އެންމެ ދުވަސްވީ ކުޅުންތެރިޔާގެ ޝަރަފުވެސް އޮތް މިއުރާ އެއްބަސްވުން އާކުރުމަށްފަހު ބުނީ ފުޓްބޯޅައަށް އޮތް ޝައުގުވެރިކަން ދުވަހެއް ދުވަހަކަށް އިތުރުވަމުން އަންނަ ކަމަށާއި، ބޭނުމަކީ މި ސީޒަނުގައިވެސް ރަނގަޅު ކުޅުމެއް ދައްކާ ކާމިޔާބީ ހޯދުން ކަމަށެވެ.

އުމުރުން އެންމެ 15 އަހަރުގައި ފުޓްބޯޅަ ކެރިއަރެއް ފެށުމަށް ޖަޕާން ދޫކޮށް ބްރެޒިލަށް ދިޔަ މިއުރާ ވަނީ ސައޯ ޕޯލޯގެ ޔޫތު ޓީމެއް ކަމަށްވާ ޔުވެންޓަސްއިން ލިބުނު ފުރުސަތުގެ ބޭނުން ހިފާފައެވެ. އޭގެ ފަހުން އެނބުރި ޖަޕާނަށް އައިސް އޭނާގެ ސީނިއާ ކެރިއަރު ފަށާފައިވަނީ 1990 ވަނަ އަހަރު ފުރަތަމަ ޑިވިޝަނުގެ ޓީމެއް ކަމަށްވާ ޔޮމިއުރީންނެވެ. އަދި އޭގެ ފަހުން 1993 ވަނަ އަހަރު ޖޭ ލީގު ތައާރަފުކުރިއިރު، މުޅި ލީގުގައިވެސް ކުޅުނު އެންމެ އަގުބޮޑު ކުޅުންތެރިއަކަށް މިއުރާ ވަނީ ވެފައެވެ.

މީގެ ކުރިން އިޓާލިއަން ލީގުގައި ވާދަކުރަމުން އަންނަ ޖެނޯއާއަށްވެސް ކުޅުނު މިއުރާ ޔޮކޮހަމާއާ ގުޅިފައިވަނީ އެ ޓީމު ދެވަނަ ޑިވިޝަނުގައި އޮތްއިރު 2005 ވަނަ އަހަރުއެވެ. އަދި މިއުރާ ވަނީ މިހާތަނަށް ޔޮކޮހަމާގައި 16 އަހަރު ހޭދަކޮށްފައެވެ.

ކުލަބު ކެރިއަރުގައި މިހާތަނަށް 763 މެޗު ކުޅެފައިވާ މިއުރާ މީގެ ކުރިން ވަނީ ޖަޕާނުގެ ގައުމީ ފުޓްބޯޅަ ޓީމަށް 89 މެޗު ކުޅެދީ 55 ލަނޑު ކާމިޔާބުކޮށްފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
67%
33%
0%
0%
0%
0%
ކޮމެންޓް