ޔޫރަޕުގެ ގައުމުތަކަށް ބޮޑު ކަންނެލި މަސް ބޮޑު އަގުގައި ވިއްކުމަށް ރާއްޖޭގެ ކުންފުނިތަކަށް ދިމާވާ އެންމެ ބޮޑު ވާދަވެރިކަމަކީ އަވަށްޓެރި ސްރީ ލަންކާއިން ޑައިރެކްޓް ފްލައިޓުގައި ޔޫރަޕުގެ ގައުމުތަކަށް މަސް އެކްސްޕޯޓު ކުރާތީ ކަމަށް ބިގްފިޝް މޯލްޑިވްސްގެ ސީއީއޯ ޝާފިން އަހުމަދު ވިދާޅުވެއްޖެއެވެ.

ރާއްޖޭގައި ބާނާ ކަންނެއްޔަށް ހަމަ އަގު ލިބުން ދަތިވެފައި، އެ މަހުގެ އަގު އެއްވަރެއްގައި ދުނިޔޭގެ ބާޒާރުގައި ހިފެހެއްޓިފައި ނެތުމުގެ ކަންބޮޑުވުމަކީ ރާއްޖޭގެ ކަންނެލި މަސްވެރިން ކުރަމުން އަންނަ ޝަކުވާއެކެވެ.

އަމިއްލަ ކުންފުނިތަކުން ބޮޑު ކަންނެލި ގަނެ ޕްރޮސެސްކޮށް އެކްސްޕޯރޓް ކުރަން ފެށުމުން، މި މަސްވެރިކަން ދޮށިން ބާނާ ކަޅުބިލަ މަހުގެ މަސްވެރިކަމާ ވަކިން ތަފާތު އިންޑަސްޓްރީއެއްގެ ގޮތުގައި ތަރައްޤީވެ، އެކްސްޕޯރޓްކޮށްގެން ރާއްޖެއަށް ވަންނަ ޑޮލަރުގެ އަދަދުވެސް ގާތްގަނޑަކަށް ކަޅުބިލަމަހުގެ އެކްސްޕޯރޓުން ލިބޭ އެއްޗަކާ އަންނަނީ އެއްވަރު ކުރަމުންނެވެ.

ނަމަވެސް އަމިއްލަ ކުންފުނިތަކަށް ވެސް މިކަމުގައި ވަނީ ގޮންޖެހުންތަކާ ކުރިމަތިވެފައެވެ. ސަބަބެއް ކަމަށް އެ ކުންފުނިތަކުން ފާހަގަކުރަނީ އަވަށްޓެރި ސްރީލަންކާއިން މަސް ބޭރު ކުރުމުގައި ގެންގުޅޭ އުސޫލެވެ. އެހެން ގޮތަކަށް ދަންނަވަނީނަމަ ލަންކާއިން ސީދާ ޔޫރަޕަށް ޑައިރެކްޓްކޮށް މަސް ބޭރު ކުރާ ނިޒާމެވެ.

ރާއްޖެޓީވީއާއި ފިޝަރީޒް މިނިސްޓްރީ ގުޅިގެން ގެނެސްދޭ "މަސްވެރިންގެ ސައްލާ" ޕްރޮގްރާމުގައި ވާހަކަ ދައްކަވަމުން ބިގް ފިޝް މޯލްޑިވްސް ސީއީއޯ ޝާފިން ވިދާޅުވީ، ކަންނެލި މަހަށް ހަމަ އަގު ލިބުމުގައި އެންމެ ބޮޑު ވާދަވެރިކަމެއް ދިމާވަނީ ލަންކާއިން މި މަސްވެރިކަން ފުޅާ ކުރަމުން އަންނާތީ ކަމަށެވެ. އެގޮތުން ލަންކާއިން ޔޫރަޕަށް މަސް އެކްސްޕޯޓު ކުރުމުގައި އެ ގައުމުގެ މަސް ކުންފުނިތަކަށް ވަރަށް ބޮޑު ލުއި ފަސޭހަތަކެއް ހުންނަ ކަމަށްވެސް އޭނާ ވިދާޅުވިއެވެ.

ޝާފިން ވިދާޅުވީ، ކަންނެލި މަސް އެންމެ ރަނގަޅު އަގުގައި ވިއްކެނީ އެއަރ ފްރެއިޓްކޮށް މަހުގެ ތާޒާކަން މަތީގައި ބޭރު ކުރެވިގެން ކަމަށެވެ. އެގޮތުން ލަންކާއިން ޑިއުޓީ ފްރީކޮށް އެހެން ގައުމުތަކަށް މަސް ބޭރުކުރުމަކީ ރާއްޖޭގެ ކުންފުނިތަކަށް އެކަމުގެ ސަބަބުން އެތައް ގެއްލުމެއް އަދި މަސްވެރިންނަށް އޭގެ ސަބަބުން ވަރަށް ބޮޑު ގެއްލުމެއް ލިބެމުންދާ ކަމެއް ކަމުގައި އޭނާ ފާހަގަކުރިއެވެ.

ބޮޑު ކަންނެއްޔަކީ ކަނޑުމަހުގެ ބާވަތްތަކުގެ ތެރެއިން 3 ވަނަ އަށް އެންމެ ބޮޑު އަގުގައި ވިއްކާލެވޭ އެއް ބާވަތެވެ. މިހެން ދަންނަވާއިރު ކަންނެލި ޕްރޮސެސްކޮށް އެކްސްޕޯރޓް ކުރާ ގޮތަކުން އަގަށް ތަފާތުވެސް އާދެއެވެ. އެންމެ ރަނގަޅު އަގު ލިބެނީ އެޗް.ޖީ. ގެ ގޮތުގައި އެކްސްޕޯރޓް ކުރެވޭ ކަންނެއްޔަށެވެ. މި ގޮތަށް ބޭރުކުރުމަށް ބޭނުން ކުރަނީ އެއްމެ ކޮލިޓީ ރަގަޅު +A ކޮލިޓީގެ ކަންނެއްޔެވެ. ރާއްޖެއިން މި ކޮލިޓީގެ މަސް ލިބޭލެއް މަދުވާހަކަ އަބަދުވެސް އެކްސްޕޯރޓް ކުރާ ކުންފުނިތަކުން ބުނެއެވެ.

ކަންނެލި މަސްވެރިކަންކުރާ ފަރާތްތަކަށް ހަމަ އަގު ހޯދައި ދިނުމަށް ރާއްޖޭގައި ކަންނެލި މަސް އެކްސްޕޯޓުކުރާ ކުންފުނިތަކުން މަސައްކަތް ކުރަމުން އަންނައިރު، އެ ކުންފުނިތަކުން ފާހަގަކުރާ އެންމެ ބޮޑު ކަންބޮޑުވުމަކީ ރާއްޖެއިން މަސް ބޭރު ކުރުމުގައި ޑިއުޓީ ނެގުމާއި، ޑައިރެކްޓްކޮށް އެއަރ ފްރެއިޓްކޮށް ގައުމުން ބޭރަށް، ހާއްސަކޮށް ޔޫރަޕުގެ މާކެޓަށް މަސް އެކްސްޕޯޓު ނުކުރެވުމެވެ.