އޯލެވެލް ހަދާ ދަރިވަރުންނަށް ސެންޓަރު ބަދަލުކުރުމުގެ ފުރުސަތު ދެނީ
ސެންޓަރ ބަދަލުކުރުމަށް ހުޅުވާލާ މުއްދަތުގެ ފަހުން ސްކޫލް ބަދަލުވާ ދަރިވަރުންނަށް އެފުރުސަތު ލިބިގެން ނުދާނެ
އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ މުހައްމަދު އިހްސާން
ކޮވިޑް-19 ގެ ސަބަބުން ކިޔަވަމުން ދިޔަ ސްކޫލް ބަދަލުކުރަން ޖެހުނު ދަރިވަރުންގެ ތެރެއިން އޯލެވެލް އިމްތިހާނު ހަދާ ދަރިވަރުންނަށް އެދަރިވަރުން މިހާރު ރަޖިސްޓްރީވެފައިވާ ސެންޓަރު ބަދަލުކުރުމުުގެ ފުރުސަތު ވަރަށް އަވަހަށް ހުޅުވާލާނެ ކަމަށް އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ މުހައްމަދު އިހްސާން ވިދާޅުވެއްޖެއެވެ.
މިހާރު ދަރިވަރުން ތައުލީމު ހާސިލުކުރަމުން ދިޔަ ސްކޫލެއްގެ ނަމުގައި އިމްތިހާނު ހަދަން ރެޖިސްޓްރީވެފައިވާކަން ފާހަގަކުރައްވައި ރާއްޖެޓީވީގެ 'ފަލަސުރުހީ' ޕްރޮގްރާމްގައި ވާހަކަދައްކަވަމުން އިހްސާން ވަނީ ހާލަތުގެ ސަބަބުން ސްކޫލް ބަދަލުކުރަން ޖެހުނު ދަރިވަރުންނަށް އިމްތިހާނު ހަދާ ސެންޓަރު ބަދަލުކުރުމުގެ ފުރުސަތު ދެ ހަފްތާގެ މުއްދަތަކަށް ހުޅުވާލާނެ ކަމަށް ވިދާޅުވެފައެވެ.
އެގޮތުން ކައިރި މުސްތަގުބަލެއްގައި މިކަމަށް އިއުލާނު ކުރާނެ ކަމަށާއި އިއުލާނު ކުރުމާއި އެކު އެ މުއްދަތުގައި ސެންޓަރު ބަދަލުކުރުމުގެ ފުރުސަތު ދަރިވަރުންނަށް ލިބިގެންދާނެ ކަމަށް އިހުސާން ވިދާޅުވިއެވެ. އެހެންނަމަވެސް އެ މުއްދަތުގެ ފަހުން ސްކޫލް ބަދަލުވާ ދަރިވަރުންނަށް އެފުރުސަތު ނުލިބޭނެ ކަމަށް އޭނާ ވިދާޅުވިއެވެ.
ޕްރޮގްރާމްގައި ވާހަކަދައްކަވަމުން އިހްސާން ވިދާޅުވީ އިނގިރޭސިވިލާތުގައި ކޮވިޑްގެ ހާލަތު އިތުރަށް ގޯސްވެގެން ދިއުމާއި އެކު އެގައުމުގައި ކުރިއަށްދާ ޖީސީއީ، ޖީސީއޯ އަދި އެޑެކްސެލް އިމްތިހާނުތަކަށް ބަދަލުތަކެއް އަންނާނެ ކަމަށް އިއުލާނުކޮށްފައި އެބައޮތް ކަމަށާއި އެހެން ނަމަވެސް އިންޓަނޭޝަނަލް ސެންޓަރުތަކުގައި ކުރިއަށްދާ އިމްތިހާނުތައް ޝެޑިއުލްކުރެވިފައި އޮތް ގޮތަށް ކުރިއަށް ދާނެ ކަމަށް އަންގާފައިވާ ކަމަށެވެ. އެހެން ކަމުން ރާއްޖޭގައި ތާވާލުކުރެވިފައިވާ ގޮތަށް އިމްތިހާނުތައް ކުރިއަށް ދާނެ ކަމަށް އިހްސާނު ވިދާޅުވިއެވެ.
އިހްސާން ވަނީ މިވަގުތަކީ އޯ ލެވެލް އިމްތިހާނުގައި ބައިވެރިވާ ދަރިވަރުންނަށް ލޭޓް އެންޓްރީއަށް ހުޅުވާލެވިފައިވާ ވަގުތުކަން ފާހަގަކުރައްވައި އޯ ލެވެލް އިމްތިހާނުގައި އިށީންނަށް ބޭނުންވާ އެއްވެސް ފަރާތެއް ވާނަމަ މި ހަފްތާގެ ނިޔަލަށް ފޯމު ހުށައަޅައި ރަޖިސްޓްރީވުމަށް ހުޅުވާލާފައިވާނެ ކަމަށް ވިދާޅުވެފައެވެ.
