ފުވައްމުލަކުގައި ގެނބުނު ކުއްޖާ ފެނިއްޖެ، ހާލު ސީރިއަސް
ކުއްޖާ ފެނުނީ ހޯދާތާ ގަޑިއެއްހާއިރު ފަހުން
ޏ. ފުވައްމުލައް، އެ ކުއްޖާ ފެނުނީ ނެރާ ދިމާލުން ބޭރުގައި އަޑީގައި އޮއްވާ
ފުވައްމުލަކުގައި މޫދަށް އެރި އުޅެނިކޮށް ގެއްލުނު ކުޑަކުއްޖާ ފެނިއްޖެއެވެ.
ފުލުހުން ބުނީ އެ ކުއްޖާ ގެއްލިގެން އުޅޭ ކަމުގެ ރިޕޯޓު ލިބިފައި ވަނީ މިއަދު ހަވީރު 4:45 ހާއިރު ކަމަށެވެ. މިއީ 17 އަހަރުގެ ފިރިހެން ކުއްޖެއް ކަމަށް މައުލޫމާތުލިބެއެވެ.
ފުވައްމުލަކު ސިޓީ ކައުންސިލް އިން ރާއްޖެ އެމްވީ އަށް ބުނީ އެ ކުއްޖާ ގެއްލުނީ އެރަށުގެ އިރުވައި ކޮޅުން ކުރީ ޒަމާނުގައި ނެރެއްގެ ގޮތުގައި ބޭނުން ކުރި ދިމާލަށް މޫދަށް އެރި އުޅެނިކޮށް އޮޔާ ދަމައިގެން ކަމަށެވެ. ގެނބުނީ އާއިލާ ކުދިންކޮޅަކާ އެކު މޫދަށް ގޮސް އުޅެނިކޮށް އެއް ކުއްޖަކު ގެނބުމުން ސަލާމަތްކުރަން ދެން ދިޔަ ކުއްޖާ ކަމަށެވެ.
ކައުންސިލް އިން ބުނީ އެ ކުއްޖާ ފެނުނީ ނެރާ ދިމާލުން ބޭރުގައި އަޑީގައި އޮއްވާ ކަމަށެވެ. ކުއްޖާ ފެނިފައިވަނީ ހޯދަމުން ދިޔަތާ ގާތްގަނޑަކަށް ގަޑިއެއްހާއިރު ފަހުންނެވެ. އަދި ފެނުނު އިރު ކުއްޖާ ހޭ ވެސް ނެތް ކަމަށް ބުންޏެވެ. ކައުންސިލުން ބުނީ ކުއްޖާ އަށް ފަރުވާ ދިނުމަށް އެ ރަށު ހޮސްޕިޓަލަށް ގެންގޮސްފައިވާ ކަމަށާއި އަދި ކުއްޖާގެ ހާލަތާ ގުޅޭ އިތުރު މައުލޫމާތެއް ލިބިފައި ނުވާ ކަމަށެވެ.
އެރަށުން އެ ސަރަހައްދުގައި އުޅުނު ބައެއް އާންމުން ރާއްޖެ އެމްވީއަށް މައުލޫމާތު ދިން ގޮތުގައި އެ ކުއްޖާގެ ހާލު ވަރަށް ދެރައެވެ.
ފުވައްމުލަކުގައި ކުޑަ ކުއްޖަކު މޫދަށް އެރި ގެއްލުނު ސަރަހައްދަކީ ވެސް ޒަމާނުއްސުރެއް އެފަދަ ހާދިސާތަކުގެ ތާރީހެއް އޮންނަ ސަރަހައްދެކެވެ. ރަށުގެ ދުވަސްވީ މީހުން ބުނާގޮތުގައި އެ ސަރަހައްދު މޫދުން ގެއްލުނު މީހަކު މަދު ފަހަރެއްގައި ނޫނީ ފެނިފައި ނުވެއެވެ. އެ ސަރަހައްދަކީ އޮއެ ގަދަ ރާޅު ބޮޑު ސަރަހައްދެކެވެ.
