އިދިކޮޅު އިހުތިޖާޖުން ހައްޔަރުކުރި އެންމެންވެސް ދޫކޮށްލައިފި

ކުރީގެ ރައީސް އަބްދުﷲ ޔާމީނުގެ މައްޗަށް އުފުލާފައިވާ ރިޝްވަތާއި މަނީ ލޯންޑަރިންގެ އަޑުއެހުމެއް ކްރިމިނަލް ކޯޓުގައި ކުރިއަށްދިޔައިރު، އެ ސަރަޙައްދަށް އެއްވެ އިހުތިޖާޖުކުރި މީހުންގެ ތެރެއިން ހައްޔަރުކުރި އެންމެން ދޫކޮށްލައިފިއެވެ.

ބުރާސްފަތި ދުވަހު ކްރިމިނަލް ކޯޓުގައި ކުރިއަށްދިޔަ މި އަޑުއެހުމަކީ ރ ފުއްގިރި ޙިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނުގެ މައްޗަށް އުފުލާފައިވާ ރިޝްވަތާއި މަނީ ލޯންޑަރިން ގެ ދައުވާ އިއްވުމަށް ބޭއްވި އަޑުއެހުމެކެވެ. މި އަޑުއެހުން ކުރިއަށްދިޔައިރު ކްރިމިނަލް ކޯޓު ސަރަޙައްދުގައި ރައީސް އަބްދުﷲ ޔާމީނުގެ ސަޕޯޓަރުން އެއްވެ އިހުތިޖާޖު ކޮށްފައިވާއިރު، ފުލުހުންގެ އަމުރަށް ނުކިޔަމަންތެރިވި 5 މީހަކު ހައްޔަރު ކުރިއެވެ.

އޭގެ ތެރޭގައި ޕާޓީގެ އާންމު މެމްބަރުންނާއި، ކައުންސިލުގެ 2 މެމްބަރަކު ހިމެނޭކަމަށް ރާއްޖެއެމްވީއާ ވާހަކަ ދައްކަވަމުން އިދިކޮޅުގެ ތަރުޖަމާނު ހީނާ ވަލީދު ވިދާޅުވިއެވެ. އެހެން ނަމަވެސް، ހުކުރު ދުވަހު މިވަނީ އެ އެންމެންވެސް ހައްޔަރުން ދޫކޮށްލާފައެވެ.

ބުރާސްފަތި ދުވަހު އޮތް އަޑުއެހުމުގައި ދައުލަތުން ދައުވާ އިއްވާފައިވާއިރު، ޔާމީނުގެ ފަރާތުން ވަނީ ދައުވާއަށް ޖަވާބުދާރީވުމަށް ވަގުތުކޮޅެއް ބޭނުންވާކަމަށް ވިދާޅުވެފައެވެ. އެއާއެކު މައްސަލަ ބައްލަވާ ފަނޑިޔާރު ވަނީ މި މައްސަލައިގައި ދިފާއަށް ޖަވާބުދާރީވާން ފުރުސަތު ދިނުމަށް ބޭއްވޭ އަޑުއެހުން މިހިނގާ ޖެނުއަރީ މަހުގެ 31 ވަނަ ދުވަހު އޮންނާނެކަމަށް ވިދާޅުވެފައެވެ.

އައު އަހަރު އެންމެ އިސްކަމެއް ދޭނީ ރައީސް ޔާމީން މިނިވަން ކުރުމަށް ކަމަށް އިދިކޮޅު ކޯލިޝަނުން ވަނީ ބުނެފައެވެ.

އިދިކޮޅު ކޯލިޝަނުން ބުނެފައި ވަނީ ނިމިގެންދިޔަ 2020 ވަނަ އަހަރަކީ ރައީސް ޔާމީން ޖަލުން މިނިވަން ކުރުމަށް ގިނަގުނަ މަސައްކަތްތަކެއް ކުރި އަހަރެއް ކަމަށެވެ. އެގޮތުން ފާއިތުވި އަހަރު ކުރީގެ ރައީސް ޔާމީން މިނިވަންކުރުމަށް ކުރަމުންދިޔަ މަސައްކަތުގެ ތެރެއިން ސިޔާސީ ޙަރަކާތްތައް އިތުރަށް ވަރުގަދަވެ، މެމްބަރުން އިތުރުވެ، ގިނަ ބައެއްގެ އެއްބާރުލުމާއި އެހީތެރިކަމާއެކު ސިޔާސީ ޙަރަކާތްތައް ފުޅާވެ ވަރުގަދަވެގެން ދިޔަ ކަމަށް އިދިކޮޅު ކޯލިޝަނުން ބުނެއެވެ.