ކުށާއި ދަރަނީގެ ރެކޯޑް ބެލެހެއްޓުން ޑީޖޭއޭއިން
އީމެއިލް މެދުވެރިކޮށް ވެސް ކުށުގެ ރެކޯޑް މިހާރު ބެލޭނެ
ޑިޕަރޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)- ކުށުގެ ރެކޯޑް މީގެ ކުރިންވެސް ޑީޖޭއޭއިން ބަލަހައްޓާފައިވޭ
ޝަރުއީ ދާއިރާގެ ކުށުގެ ރެކޯޑާއި ދަރަނީގެ ރެކޯޑް ބަލަހައްޓާނީ ޑިޕަރޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ކަމަށް އިއުލާނުކޮށްފިއެވެ.
ބުރާސްފަތި ދުވަހު ޑީޖޭއޭއިން ބުނީ، ޖިނާއީ އިޖުރާއަތުގެ ޤާނޫނުގެ 187 ވަނަ މާއްދާގެ (ހ) ގެ ދަށުން މަރުކަޒީކޮށް ކުށުގެ ރެކޯޑް ބަލަހައްޓާނެ އިދާރާއަކީ ޑީޖޭއޭ ކަމުގައި ބަންޑާރަނައިބް ކަނޑައަޅުއްވާފައިވާ ކަމަށެވެ. އެގޮތުން މަރުކަޒީކޮށް ކުށުގެ ރެކޯޑް ބެލެހެއްޓޭނެ ނިޒާމެއް ޤާއިމު ކުރުމުގެ އިންތިޒާމުގެ ދަށުން ޝަރުއީ ދާއިރާގެ ހުރިހާ ކޯޓުތަކުން ދެމުން ގެންދާ ކުށާއި ދަރަނީގެ ރެކޯޑް ސާފު ކުރުމުގެ ޚިދުމަތް ދެމުން ގެންދާނީ ޑީޖޭއޭއިން ކަމަށް ބުނެފައިވެއެވެ.
ޑީޖޭއޭއިން ބުނީ ޝަރުއީ ދާއިރާގެ ކުށުގެ ރެކޯޑް ނުވަތަ ދަރަނީގެ ރެކޯޑް ސާފު ކުރުމަށް ބޭނުންވާ ފަރާތްތަކުން ފޯމު ފުރުމަށްފަހު ޑިޕަރޓްމަންޓުގެ އީމެއިލްއަށް މެއިލް ކުރުމުން ރެކޯޑް ސާފު ކުރުމުގެ އިންތިޒާމު ހަމަޖެހިގެންދާނެ ކަމަށެވެ.
ކުށުގެ ރެކޯޑް ސާފުކުރުމަށް ކުރިން ރައްޔިތުން ބޮޑު ތަކުލީފެއް އުފުލަން ޖެހެއެވެ. އެގޮތުން ކުށުގެ ރެކޯޑް ސާފުކުރުމަށް ކުރިން އެކި ކޯޓުތަކަށް ވަކިވަކިން ދާންޖެހެއެވެ. އެހެންކަމުން އެކަމަށް ގިނަ ވަގުތުތަކެއް ހޭދަވެއެވެ. ޖިނާއީ އިޖުރާއަތުގެ ގާނޫނަށް ތިން ވަނަ އިސްލާހު ގެނައުމުގެ ގާނޫނަށް އަމަލުކުރަން ފެށީ މިދިޔަ ސެޕްޓެމްބަރު މަހުއެވެ.
