2021 ގެ މެއި/ޖޫންގެ ކެމްބްރިޖް އަދި އެޑެކްސެލް އިމްތިހާން ބާއްވާނެ - އެޑިއުކޭޝަން މިނިސްޓްރީ
6 ޖެނުއަރީ 2021 | ބުދަ 18:57ފާއިތުވި އަހަރު އޭ ލެވެލް އިމްތިހާނުތައް ކުރިއަށް ގެންގޮސްފައި ވަނީ ރައްކާތެރިކަމުގެ ގިނަ ފިޔަވަޅުތަކަކާއި އެކު
ސީއެޗްއެސްސީ ގެ ދަރިވަރުން އިމްތިހާނު ހޯލުގައި
މި އަހަރުގެ މެއި/ޖޫންގައި ބޭއްވުމަށް ހަމަޖެހިފައިވާ ކެމްބްރިޖް އަދި އެޑެކްސެލްގެ އިމްތިހާނުތައް ތާވަލުކޮށްފައިވާ ގޮތަށް ރާއްޖޭގައި ކުރިޔަށް ދާނެ ކަމަށް އެޑިއުކޭޝަން މިނިސްޓްރީން ބުނެފިއެވެ.
އެޑިއުކޭޝަން މިނިސްޓްރީން މިގޮތަށް ބުނެފައިވާއިރު ކޮވިޑް-19 ގެ ސަބަބުން 2020 ވަނަ އަހަރުގެ މެއި/ޖޫންގައި ބާއްވަން ހަމަޖެހިފައި އޮތް އޭ ލެވެލް އިމްތިހާނުތައް ބާއްވާފައި ވަނީ ރައްކާތެރިކަމުގެ ގޮތުން އަޅަންޖެހޭ ގިނަ ފިޔަވަޅުތަކަކާއި އެކުއެވެ.
ފާއިތުވި އަހަރު އެޑިއުކޭޝަން މިނިސްޓަރ ޑރ. އައިޝަތު އަލީ ވަނީ 2020 ވަނަ އަހަރުގެ އޯ ލެވެލް އިމްތިހާނުތައް ކެންސަލްކޮށް ދަރިވަރުންނަށް ދެން އިމްތިހާނުތައް ހެދޭނީ 2021 ވަނަ އަހަރު ކަމަށް ވިދާޅުވެފައެވެ.
އެގޮތުން ކޮވިޑް-19 ސަބަބުން ދަރިވަރުންގެ އިމްތިހާނުތައް ފަސްކުރެވުނު ނަމަވެސް މިނިސްޓްރީގެ ވިސްނުމަކީ މެދުނުކެނޑި ކިޔެވުން ކުރިޔަށް ގެންދިޔުން ކަމަށް މީގެ ކުރިން މިނިސްޓަރ ވަނީ ވިދާޅުވެފައެވެ. އެޑިއުކޭޝަން މިނިސްޓްރީން ވަނީ ބަލިމަޑުކަމުގެ ސަބަބުން ސްކޫލްތައް ބަންދުކުރަން ޖެހުމުން އޮންލައިންކޮށް ދަރިވަރުންގެ ކުލާސްތައް ކުރިއަށް ގެންގޮސްފައެވެ. އަދި ކޭސްތައް މަދު ވުމާއިއެކު ސާނަވީ އަދި މަތީ ސާނަވީއަށް ކިޔަވާ ދަރިވަރުންނަށް ގިނަ ފިޔަވަޅުތަކަކާއި އެކު ސްކޫލަށް ގެންގޮސް ކިޔަވާދޭން ފަށާފައެވެ.
ޖެނުއަރީ މަހުގެ 10 ވަނަ ދުވަހު 2020-2021 ދިރާސީ އަހަރުގެ ދެވަނަ ޓާމުގެ ކިޔެވުން ފަށާނެ ކަމަށް އެޑިއުކޭޝަން މިނިސްޓްރީން ބުނެފައިވާއިރު، ނާސަރީ އަދި ބޭބީ ނާސަރީގެ ދަރިވަރުންނުނާއި އޭ ލެވެލް އަށް ކިޔަވާ ދަރިވަރުންގެ ކިޔެވުން 10 ވަނަ ދުވަހު ފެށޭނެއެވެ.
