އިއުލާން ކުރުމެއް ނެތި އަދި ނޭޝަނަލް ޓެންޑަރ ބޯޑަށް ހުށަހެޅުމެއް ނެތި 11 މިލިއަނަށްވުރެ ގިނަ ރުފިޔާއަށް އައިޖީއެމްއެޗްގެ ނިއުމެޓިކް ޝޫޓްގެ މަސައްކަތް ކުރުމަށް 2017 ވަނަ އަހަރު ކުންފުންޏަކަށް ދީފައިވާ ކަމަށް ހެލްތް މިނިސްޓްރީގެ 2017 ވަނަ އަހަރުގެ އޮޑިޓް ރިޕޯޓުން ހާމަވެއްޖެއެވެ.

ދައުލަތުގެ މާލިއްޔަތު ގަވާއިދުގެ 8.25 ވަނަ މާއްދާގެ (ހ) ގައި ބުނެފައިވަނީ މަސައްކަތުގެ އަގު (ތަކެތީގެ އަގާއި އެކު) 1,500,000 (އެއް މިލިއަން ފަސް ސަތޭކަ ހާސް) ރުފިޔާއިން ފެށިގެން މަތީގެ މަސައްކަތްތައް ހަވާލުކުރާނެ ފަރާތެއް ހޯދާނީ، އެމަސައްކަތާބެހޭ ކުރެހުންތަކާއި ތަފްޞީލުތައް، ނޭޝަނަލް ޓެންޑަރ ބޯޑަށް ހުށަހަޅަންޖެހޭ ކަމަށެވެ.

ނަމަވެސް އައިޖީއެމްއެޗުގައި ނިއުމެޓިކް ޝޫޓް ހަރުކުރުމުގެ މަސައްކަތަށް 11,912,952 (އެގާރަ މިލިޔަން ނުވަ ސަތޭކަ ބާރަ ހާސް ނުވަ ސަތޭކަ ފަންސާސް ދޭއް) ރުފިޔާ ހޭދަކޮށްފައިވީ ނަމަވެސް، އެ މަސައްކަތް ހަވާލުކޮށްފައިވަނީ ނޭޝަނަލް ޓެންޑަރ ބޯޑަށް ހުށަހަޅައިގެން ނޫންކަމަށް އޮޑިޓް ރިޕޯޓުގައި ބުނެފައިވެއެވެ. އަދި އެ މަސައްކަތް ކޮށްދޭނެ ފަރާތެއް ހޯދަން އިޢުލާނުވެސް ކޮށްފައި ނުވާކަމަށް މި ރިޕޯޓުގައި ބުނެއެވެ.

އޮޑިޓް ރިޕޯޓުގައި ބުނެފައިވަނީ އިޢުލާނު ނުކޮށް އެ މަސައްކަތް ހަވާލުކޮށްފައިވަނީ މިނިސްޓްރީ އޮފް ފިނޭންސް ގެ ހުއްދަ ހޯދައިގެންނެވެ. ނަމަވެސް އިޢުލާނު ނުކުރާނަމަ މަސައްކަތްކުރުމަށް ޝައުގުވެރިވާ ފަރާތްތަކަށް ހަމަހަމަ ފުރުސަތެއް ނުލިބޭނެ ކަމަށެވެ.

މި މައްސަލަ އިސްލާހުކުރުމަށް އޮޑިޓަރ ޖެނެރަލް ލަފާ ދެއްވާފައިވަނީ މަސައްކަތުގެ އަގު 35,000 (ތިރީސް ފަސް ހާސް) ދިވެހި ރުފިޔާއަށްވުރެ ބޮޑު ނަމަ މާލިއްޔަތުގެ ގަވާއިދުގެ 10.31 ވަނަ މާއްދާގައި ބަޔާންކޮށްފައިވާގޮތަށް އާންމުކޮށް އިޢުލާނުކުރަމަށް އަންގާ ކަމަށެވެ. އަދި އެގަވާއިދުގެ ޖަދުވަލު 1 ގެ 4 ގައި ބަޔާންކޮށްފައިވާގޮތަށް ޕްރޮކިއުމަންޓެއްގެ އަގު 5,000,000 (ފަސް މިލިޔަން) ދިވެހި ރުފިޔާއަށްވުރެ ބޮޑުނަމަ، އެކަމެއް ކުރުމުގެ ހުއްދަ ހޯދުމަށް ނޭޝަނަލް ޓެންޑަރ ބޯޑަށް ހުށަހަޅައި، އެ ބޯޑުގެ ނިންމުމާ އެއްގޮތަށް ކުރިއަށްގެންދިއުމަށް އަންގާފައިވެއެވެ.

މީގެ އިތުރުން މިކަމާގުޅިގެން އަޅަންޖެހޭ ފިޔަވަޅުތައް އެޅުމަށްޓަކައި، ދައުލަތުގެ މާލިއްޔަތުގެ ގަވާއިދުގެ 17.04 ވަނަ މާއްދާގައި ބަޔާންކޮށްފައިވާ ގޮތަށް "މާލިއްޔަތުގެ މައްސަލަ ބަލާ ކޮމިޓީ" އަށް ހުށަހެޅުމަށް އަންގާފައިވެއެވެ.