ސްޕެއިނުގެ ފޯވާޑް ކޮސްޓާ ވުލްވްސްއަށް؟
5 ޖެނުއަރީ 2021 | އަންގާރަ 14:00ކޮސްޓާގެ އެދުމުގެ މަތިން އެތުލެޓިކޯއިން ވަނީ އެއްބަސްވުން އުވާލާފައި
އެތުލެޓިކޯ މެޑްރިޑަށް ކުޅެމުން އައި ސްޕެއިންގެ ފޯވާޑް ޑިއޭގޯ ކޮސްޓާ
އެތުލެޓިކޯ މެޑްރިޑުގެ އެއްބަސްވުން އުވާލާފައިވާ ސްޕެއިންގެ ފޯވާޑް ޑިއޭގޯ ކޮސްޓާގެ ސޮއި ހޯދުމުގެ ރޭހުގައި އުޅެނީ ވުލްވްސް ކަމަށް މީޑިއާ ރިޕޯޓުތައް ބުނެފިއެވެ.
އެތުލެޓިކޯއާއެކު ކޮސްޓާ ހަދާފައި އޮތް އެއްބަސްވުން އަންނަ އަހަރުގެ ހޫނު މޫސުމުގައި ހަމަވަން އޮތް ނަމަވެސް، ދާދި ފަހުން ކޮސްޓާ ވަނީ އަމިއްލައަށް އެއްބަސްވުން އުވާލުމަށް އެ ކުލަބުގައި އެދިފައެވެ. އެއާއެކު މިދިޔަ ޑިސެމްބަރު މަހުގެ 29 ވަނަ ދުވަހުގެ އެތުލެޓިކޯއިން ވަނީ ކޮސްޓާގެ އެދުމުގެ މަތިން އޭނާގެ އެއްބަސްވުން އުވާލާފައިވާކަން ހާމަކޮށްފައެވެ. ރިޕޯޓުތައް ބުނާ ގޮތުން އުމުރުން 32 އަހަރުގެ ކޮސްޓާ އާއި އެތުލެޓިކޯގެ ކޯޗިން ސްޓާފަކާ މައްސަލަޖެހި، އޭނާ އެ ޓީމު ދޫކޮށްލަން ނިންމީ އެ ޓީމާއެކު ހަދާފައިވާ އެއްބަސްވުމުގައި ބާކީ އޮތް ހަ މަސް ދުވަހަށް އެއްވެސް ބަދަލެއް ހޯދުމެއް ނެތިއެވެ.
ދާދި ފަހުން ކޮސްޓާ ވަނީ މި މަހުގެ ޓްރާންސްފާގައި އަލުން އަނބުރާ އިނގިރޭސި ޕްރިމިއާ ލީގުގެ ކުލަބަކަށް ބަދަލުވާން ބޭނުންވާ ކަމަށް ބުނެފައެވެ. އެގޮތުން ކޮސްޓާ ހޯދުމަށް އާސެނަލާއި ވުލްވްސްއިން މަސައްކަތް ކުރަމުން އަންނަ ކަމަށް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ. މީގެ ތެރެއިން ކޮސްޓާ ބަދަލުވުން އެންމެ ގާތީ ވުލްވްސްއަށެވެ. އެގޮތުން ވުލްވްސްގެ އެއްވަނަ ފޯވާޑް ރައުލް ހިމެނޭޒުގެ ބޮލަށް ލިބުނު ސީރިއަސް އަނިޔާއަކާ ގުޅިގެން އޭނާއަށް އެނބުރި ކުޅުމުގެ ތެރެއަށް އާދެވޭނެ ދުވަހެއް ސީދާ ނޭނގޭއިރު، ވުލްވްސްއިން ފޯވާޑެއް ގެންނަން ބޭނުންވާ ކަމަށް އެ ޓީމުގެ ކޯޗު ނޫނޯ އެސްޕިރީޓޯ ސަންޓޯވެސް ވަނީ ބުނެފައެވެ. ރިޕޯޓުތައް ބުނާގޮތުން ވުލްވްސްއިން އޮތީ ކުރު މުއްދަތުގެ އެއްބަސްވުމެއްގައި ބޮޑު މުސާރައެއް ދޭ ގޮތަށްވެސް ކޮސްޓާ ގެންނަން ތައްޔާރަށެވެ.
އަލުން އަނބުރާ ޕްރިމިއާ ލީގުގެ ކުލަބަކާ ގުޅެން ކޮސްޓާ ބޭނުންވާއިރު، މީގެ ކުރިން ޗެލްސީއަށްވެސް ކުޅުނު ކޮސްޓާ ވަނީ އެ ޓީމާއެކު ޕްރިމިއާ ލީގުގައި ގިނަ ކާމިޔާބީތަކެއް ހޯދާފައެވެ. އެގޮތުން ޗެލްސީއަށް ކުޅެދިން 120 މެޗުން 59 ލަނޑު ޖަހައިދިން ކޮސްޓާ ވަނީ އެ ޓީމާއެކު އިނގިރޭސި ޕްރިމިއާ ލީގު ދެ ފަހަރު އަދި އިނގިރޭސި ލީގު ކަޕް އެއް ފަހަރު ކާމިޔާބުކޮށްފައެވެ.
