ރެއާލުގެ ކެޕްޓަން ރާމޯސްއަށް ސިޓީން ފާރަލަނީ

ރެއާލް މެޑްރިޑުގެ ކެޕްޓަން ސާޖިއޯ ރާމޯސްއަށް މެންޗެސްޓާ ސިޓީން ފާރަލަމުން އަންނަ ކަމަށް ރިޕޯޓުތައް ބުނެފިއެވެ.

ސްޕެއިނުގެ ގައުމީ ފުޓްބޯޅަ ޓީމުގެ ކެޕްޓަންގެ މަގާމުވެސް އަދާކުރަމުން އަންނަ އުމުރުން 34 އަހަރުގެ ރާމޯސް ރެއާލާއެކު ހަދާފައިވާ އެއްބެސްވުން މި އަހަރުގެ ހޫނު މޫސުމުގައި ހަމަވާނެއެވެ. އަދި މިހާތަނަށް ރެއާލުގެ އެއްބަސްވުން އާކުރުމާ މެދު ރާމޯސް ގޮތެއް ނިންމާފައި ނުވާއިރު، އޭނާއަށް ސިޓީގެ ކޯޗު ޕެޕް ގާޑިއޯލާ ޝައުގުވެރިވާ ކަމަށް ރިޕޯޓުތައް ބުނެއެވެ. އެހެންކަމުން ގާޑިއޯލާގެ އެދުމުގެ މަތިން ރާމޯސްއަށް ސިޓީން މިހާރު ފާރަލަމުން އަންނަ ކަމަށްވެސް "އީއެސްޕީއެން" އިން ވަނީ ރިޕޯޓުކޮށްފައެވެ.

މި އަހަރުގެ ހޫނު މޫސުމުގައި ރާމޯސްގެ އެއްބަސްވުން ހަމަވާއިރު، 2019 ވަނަ އަހަރު ރެއާލުގެ ރައީސް ފްލޮރެންޓީނޯ ޕެރޭޒް ވަނީ ހިލޭ ޓްރާންސްފާއެއްގައި ޗައިނާގެ ކުލަބަކަށް ބަދަލުވާން ރާމޯސް ބޭނުންވާ ކަމަށް ވިދާޅުވެފައެވެ. އެ ފަހަރު ޕެރޭޒް ވިދާޅުވީ ރާމޯސް މިހާރު ބޭނުންވަނީ ޗައިނީސް ސުޕަ ލީގުގެ ކުލަބަކަށް ކުޅެން ކަމަށް އޭނާ ގާތު ރާމޯސް ބުނެފައިވާ ކަމަށާއި، ޗައިނާގެ ކުލަބުން ރާމޯސްގެ އޭޖެންޓަށް މީގެ ކުރިން ވަރަށް ރަނގަޅު ހުށަހެޅުމެއް ލިބުނު ކަމަށްވެސް ރާމޯސް ބުނި ކަމަށެވެ.

ރާމޯސް އަކީ ރެއާލަށް މިހާތަނަށް ހަތަރުވަނައަށް އެންމެ ގިނަ މެޗު ކުޅެދީފައިވާ ކުޅުންތެރިޔާއެވެ. ސެވިއްޔާ ދޫކޮށް 2005 ވަނަ އަހަރު ރެއާލާ ގުޅުނު ފަހުން އޭނާ ވަނީ އެ ކުލަބަށް ކުޅުނު 666 މެޗުގައި 100 ލަނޑު ކާމިޔާބުކޮށްދީފައެވެ. އަދި އޭނާ ވަނީ ރެއާލާއެކު ސްޕެނިޝް ލީގު ފަސް ފަހަރު އަދި ޔުއެފާ ޗެމްޕިއަންސް ލީގު ހަތަރު ފަހަރު ކާމިޔާބުކޮށްފައެވެ.

ސިޓީން ރާމޯސްއަށް ފާރަލަމުން އަންނައިރު، މި އަހަރުގެ ހޫނު މޫސުމުގައި ހިލޭ ޓްރާންސްފާއެއްގެ ދަށުން ބާސެލޯނާގެ ކެޕްޓަން ލިއޮނެލް މެސީ ހޯދަންވެސް އެ ކުލަބުން އަންނަނީ މަސައްކަތް ކުރަމުންނެވެ. އަދި ހަމަ މި ދެ ކުޅުންތެރިން ހޯދުމަށް ފްރާންސްގެ ޗެމްޕިއަން ޕީއެސްޖީންވެސް އަންނަނީ މަސައްކަތް ކުރަމުންނެވެ.