ރާއްޖެއިން ހުށަހެޅި މޫސުމަށް އަންނަ ބަދަލުތަކުގެ އެކްޝަން ޕްލޭނަށް ތަޢުރީފު
5 ޖެނުއަރީ 2021 | އަންގާރަ 08:23މޫސުމަށް އަންނަ ބަދަލުތަކުން ލިބޭ ގެއްލުން ކުޑަކުރުމަށް އިތުރު މަސައްކަތްތަކެއް ކުރާނެ ކަމަށް ސަރުކާރުން ބުނޭ
މިނިސްޓަރ އޮފް އެންވަޔަރަންމަންޓް ޑރ. ޙުސައިން ރަޝީދު ޙަސަން
ރާއްޖޭގެ މޫސުމަށް އަންނަ ބަދަލުތަކުގެ އެކްޝަން ޕްލޭން ނުވަތަ ނޭޝަނަލީ ޑިޓަރމައިންޑް ކޮންޓްރިބިއުޝަން (އެން.ޑީ.ސީ.) އަށް އ.ދ. ގެ މޫސުމަށް އަންނަ ބަދަލުތަކުގެ މުޢާހަދާގެ އެގްޒެކެޓިވް ސެކްރެޓަރީ ޕެޓްރީސިއާ އެސްޕިނޯސާ ތަޢުރީފު ކުރައްވައިފިއެވެ.
މިކަން އެކަމަނާ ފާހަގަ ކުރައްވާފައިވަނީ، ރާއްޖޭގެ އެން.ޑީ.ސީ ހުށަހެޅުމާއި ގުޅިގެން މިނިސްޓަރ އޮފް އެންވަޔަރަންމަންޓް ޑރ. ޙުސައިން ރަޝީދު ޙަސަނަށް ފޮނުއްވި ސިޓީފުޅެއްގައި ކަމަށް އެންވަޔަރަމެންޓް މިނިސްޓްރީން ބުނެއެވެ.
މިގޮތުން، ކޮވިޑް 19 ގެ ގޮންޖެހުންތަކާއެކު ވެސް ކަނޑައެޅިފައިވާ މުއްދަތަށް ރާއްޖޭގެ އެން.ޑީ.ސީ. އަދާހަމަކޮށް (އަޕްޑޭޓްކޮށް) ހުށަހެޅުމަކީ ފަހާގަކޮށްލެވޭ ކަމެއްކަމަށް އެކަމަނާ ހާމަ ކުރައްވާފައިވާ ކަމަށާއި ވަކިން ޚާއްސަކޮށް ރާއްޖެއިން، ޖައްވަށް ދޫކުރާ ވިހަ ގޭސް މަދު ކުރުމަށް ކުރިޔަށްވުރެ ބޮޑަށް މަސައްކަތް ކުރުމަށް ހުށަހަޅާފައިވުމާއި އަދި ވަސީލަތްތައް ތަނަވަސް ވެއްޖެނަމަ 2030 ވަނަ އަހަރުގެ ނިޔަލަށް "ނެޓް ޒީރޯ" ޙާސިލްކުރުމުގެ ޢަޒުމުގައި ތިބުމަކީ ވަކިން ޚާއްސަކޮށް ފާހަގަކޮށްލެވޭ ކަމެއް ކަމަށް ވިދާޅުވެފައިވާ ކަމަށް މިނިސްޓްރީން ބުންޏެވެ.
މީގެ އިތުރުން، މޫސުމަށް އަންނަ ބަދަލުތަކަށް ހޭނުމަށް ހަރުދަނާ ގިނަ މަސައްކަތްތަކެއް ކުރުމަށް ރާއްޖެއިން ހުށަހެޅުމާއި، މީގެ ތެރޭގައި ކާރިސީ ހިރާސް އިތުރު ކުރުމާއި، މިދާއިރާ އިން ވެސް މަސައްކަތްތަކެއް ކުރުމަށް ނިންމާފައިވުމަކީ، ރާއްޖެފަދަ މޫސުމަށް އަންނަ ބަދަލުތަކުގެ ނާޒުކު ކަމަށް އެންމެ ބޮޑަށް ހުށަހެޅިފައިވާ ޤައުމަކުން ހުށަހަޅާ ވަރަށް މުހިންމު ކަމެއްކަމަށްވެސް އެކަމަނާ ފާހަގަ ކުރެއްވިއެވެ.
ރާއްޖެއިން، މޫސުމަށް އަންނަ ބަދަލުތަކުން ލިބޭ ގެއްލުން ކުޑަކުރުމަށް އިތުރު މަސައްކަތްތަކެއް ކުރައްވާނެ ކަމަށް ރައީސުލްޖުމްހޫރިއްޔާ ވަނީ ގިނަ މުނާސަބަތުތަކުގައި ފާހަގަ ކުރައްވާފައެވެ. ވަކިން ޚާއްސަކޮށް 2030 ގެ ނިޔަލަށް "ނެޓް ޒީރޯ" އެ މިޝަން ޙާސިލުކުރެއްވުމަށް މަސައްކަތް ކުރައްވާ ކަމަށް އެމަނިކުފާނު ވަނީ ވިދާޅުވެފައެވެ. އަދި މިކަމާއި ގުޅިގެން ގިނަ މަސައްކަތްތަކެއް މިނިސްޓްރީގެ ފަރާތުން ކަމާ ގުޅުން ހުރި ދާއިރާތަކާއި ގުޅިގެން ކުރިއަށް ގެންދާ ކަމަށް އެންވަޔަރަމެންޓް މިނިސްޓްރީން ބުނެއެވެ.
