ކުރިއަށް އޮތް ލޯކަލް ކައުންސިލް އިންތިހާބުގެ ކެމްޕޭން ހަރަކާތްތަށް ވަރުގަދަ ކުރުމަށް ހދ. އަތޮޅު ނެއްލައިދޫ އެމްޑީޕީ ހަރުގެ ރަސްމީކޮށް މިރޭ ހުޅުވުވުމަށް ނިންމައިފިއެވެ.

ނެއްލައިދޫ އެމްޑީޕީގެ ހަރުގެ ހުޅުވުމުގެ ޖަލްސާގައި އެމްޑީޕީގެ ނައިބް ރައީސް މުހައްމަދު ޝިފާޒާއި، ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު މުހައްމަދު ނާޒިމާއި ރައްޔިތުންގެ މަޖިލީހުގެ މުލަކު މެމްބަރު އިބްރާހިމް ނަސީރުގެ އިތުރުން އެޕާޓީގެ ގައުމީ މަޖިލީހުގެ ބައެއް މެމްބަރުން ބައިވެރިވަޑައިގަންނަވެއެވެ. ހަރުގެ ހުޅުވުމަށް ފަހު، ނެއްލަދޫ ކައުންސިލްގެ ގޮނޑިތަކަށް ކުރިމަތިލާފާއިވާ އެމްޑީޕީ ކެނޑިޑޭޓުން ތައާރަފްކުރާނެ އެވެ. އެއަށްފަހު ޕާޓީގެ އިސްވެރިން ވާހަކަ ދެއްކުވުމަށް ވަނީ ހަމަޖެހިފައެވެ.

މި ޖަލްސާގައި ނެއްލާއިދޫގައި ދިރިއުޅޭ އެމްޑީޕީގެ އާންމު މެމްބަރުންނާއި އިސްލާހަށް މަސައްކަތް ކުރާ ވީހާ ވެސް ގިނަ މެމްބަރުން ބައިވެރިވުމަށް ވަނީ ގޮވާލާފައެވެ.

އެމްޑީޕީގެ ވަފުދު މިއަދު ވަނީ އެ އަތޮޅު ނައިވާދޫ އަށް ވަޑައިގެން ކައުންސިލް އިންތިހާބުގައި ވާދަކުރާ ކެންޑިޑޭޓުންނާއި، ކެންޑިޑޭޓުންގެ ކެމްޕޭން ޓީމާ ބައްދަލުކޮށްފައެވެ. އަދި ރައްޔިތުންގެ ތާއިދު ހޯދުމަށް އެމްޑީޕީގެ ވަފުދާއި އެކު އެޕާޓީގެ ޓިކެޓްގައި ވާދަކުރާ ކެނޑިޑޭޓުން ވަނީ ދޮރުން ދޮރަށް ވެސް ހިނގާފައެވެ.

ނައިވާދޫ އެމްޑީޕީ ހަރުގޭގައި ކެންޑީޑޭޓުންނާއެކު ބޭއްވި ބައްދަލުވުމުގައި ވާހަކަ ދައްކަވަމުން އެޕާޓީގެ ނައިބް ރައީސް މުހައްމަދު ޝީފާޒް ވިދާޅުވީ މެއި މަހުގެ 6 ވަނަ ދުވަހު ބާއްވާ އިންތިހާބުގައި ވީހާ ވެސް ގިނަ ރައްޔިތުން ބައިވެރިކުރުމަށް ކެމްޕޭން ޓީމްތަކުން މަސައްކަތް ކުރަން ޖެހޭ ކަމަށެވެ.