ރޫޓް އައްޑޫ ފިހާރައިން ވައްކަންކުރީ ސީލިންގައި ބާގަނޑެއް ހަދައިގެން، ދޮޅު ލައްކަ ރުފިޔާ ވަނީ ނަގާފައި
ވައްކަމުގެ އަމަލު ހިންގާފައިވަނީ ފަތިހުގެ ވަގުތެއްގައި
އައްޑޫ ރޫޓް ފިހާރައިގެ ސީލިން ފަޅާލާފައި
ދުންފަތުގެ ބާވަތްތައް ވިއްކަމުންދާ އައްޑޫ ސިޓީ މަރަދޫ ރޫޓް ފިހާރައިން ހޮނިހިރު ދުވަހު ވައްކަން ކޮށްފިއެވެ.
"ރާއްޖެ.އެމްވީ" އަށް މައުލޫމާތުދެމުން ރޫޓުގެ މެނޭޖުމަންޓުން ބުނެފައިވަނީ ތިން މީހަކު ހިމެނޭ ގޮތަށް އެ ފިހާރައިން ވައްކަން ކޮށްފައިވަނީ ސީލިންގައި ބާގަނޑެއް ހަދައިގެން ކަމަށެވެ. އަދި ފަތިހު ހިންގި މި ވައްކަމުގައި ދޮޅު ލައްކަ ރުފިޔާ ވަގަށް ނަގާފައިވާ ކަމަށްވެސް ވަނީ މައުލޫމާތުދީފައެވެ.
އަދި ވައްކަންކުރި ތިން މީހުންވެސް ތިބީ ކަޅުކުލައިގެ އަތްދިގު ހެދުމުގައި ކަމަށާއި، އެ މީހުން ސީސީޓީވީ ކެމެރާއަށް އަރާފައިވީ ނަމަވެސް، މޫނު ނިވާކޮށްގެން ތިބުމުން އެއީ ކޮން ބައެއްކަން ނޭނގޭ ކަމަށްވެސް ވަނީ ބުނެފައެވެ. މީގެ އިތުރުން ދެ މީހަކު މާސްކާއެކު ހެލްމެޓުވެސް އަޅައިގެން ހުރި ކަމަށްވެސް ރޫޓުން ބުންޏެވެ.
އަދި ގްރައުންޑް ފްލޯގައި ހުންނަ މި ފިހާރައިގެ ފުރާޅުގައި ހުރި ޓިނުތައް ނައްޓާލުމަށްފަހު ސީލިންގައި ހެދި ބާގަނޑުން އެތެރެއަށް ވަތް ކަމަށާއި، އެންމެ ފުރަތަމަވެސް ފިހާރައިގެ ތެރެއަށް ވަދެ، އެ ތިން މީހުން ސީސީޓީވީ ކެމެރާތައް ހަލާކުކޮށްލާފައިވާ ކަމަށް ރޫޓުގެ މެނޭޖުމަންޓުން މައުލޫމާތުދެއެވެ. އަދި އެއަށްފަހު ފައިސާތަކުގެ އިތުރުން ފިހާރައިގައި ހުރި ލައިޓަރު ތަކެއްވެސް އެމީހުން ނަގާފައިވާ ކަމަށް ވަނީ ބުނެފައެވެ.
ރޫޓުގެ މެނޭޖުމަންޓުން އިތުރަށް ބުނީ ފިހާރައިން ފައިސާތައް ވަގަށް ނަގާފައިވީ ނަމަވެސް ޗެކުތައް ބަހައްޓާފައިވާ ކަމަށެވެ. އަދި އެ މީހުން ފިހާރައިން ނިކުމެފައިވަނީ ސިނގިރޭޓު ފޮށިތަކެއް ހިފައިގެން ކަމަށާއި، މިހާރު ވަގަށް ނަގާފައިވާ ފައިސާގެ އިތުރުން ފިހާރައިން ނެގި މުދާތަކަކީ ކޮބައިތޯ ދެނެގަތުމުގެ މަސައްކަތް ކުރަމުން އަންނަ ކަމަށްވެސް ރޫޓުން ބުނެއެވެ.
މި ވައްކަމުގެ މައްސަލައާ ގުޅޭގޮތުން "ރާއްޖެ.އެމްވީ" އަށް މައުލޫމާތުދެމުން ފުލުހުން ބުނީ ރޫޓް ފިހާރައިން ގިނަ އަދަދެއްގެ ފައިސާ އާއި ތަކެތި ވަގަށް ނަގާފައިވާ ކަމަށް ފުލުހުންނަށް ހުށަހަޅާފައިވާ ކަމަށެވެ. އަދި މި މައްސަލަ ފުލުހުން އިތުރަށް ތަހުގީގުކުރަމުންދާ ކަމަށްވެސް ވަނީ ބުނެފައެވެ.
އައްޑޫ ސިޓީ މަރަދޫ ރޫޓް ފިހާރައިން ވައްކަން ކުރިއިރު، މިދިޔަ އަހަރުގެ އޮކްޓޯބަރު މަހުގެ ފަސްވަނަ ދުވަހު މާލޭގެ ރޫޓް ފިހާރައިގެ ފަރާތުން ބޭންކް އޮފް ސިލޯނަށް ޖަމާކުރުމަށްޓަކައި ގެންދިޔަ ހަތަރު މިލިޔަނަށްވުރެ ގިނަ ފައިސާ ފޭރުނު މައްސަލައިގައި ތުހުމަތު ކުރެވޭ މީހުންނަށް ދާދި ފަހުން ޕްރޮސެކިއުޓަރ ޖެނެރަލް ވަނީ ދައުވާ އުފުލާފައެވެ.
