އެތެރޭގެ އުދުހުންތަކުގައި މުއްދަތު ހަމަވެފައިވާ އައިޑީ ކާޑު ދެން ބަލައެއް ނުގަންނާނެ
2 ޖެނުއަރީ 2021 | ހޮނިހިރު 12:27މުއްދަތު ހަމަވެފައިވާ އައިޑީ ކާޑުތައް ބަލައިގެންފައިވަނީ މިދިޔަ މަހުގެ 31 ވަނަ ދުވަހުގެ ނިޔަލަށް
އައިޑީ ކާޑުތަކެއްގެ ފޮޓޯ: އެތެރޭގެ އުދުހުންތަކުގައި މުއްދަތު ހަމަވެފައިވާ އައިޑީ ކާޑު ދެން ބަލައި ނުގަންނާނެ
ރާއްޖޭގެ އެއަރޕޯޓުތަކުގައި ސެކިއުރިޓީންގެ ގޮތުގައި ތިބޭ އޭވިއޭޝަން ސެކިރިޓީ އޮފިސަރުން، އެތެރޭގެ އުދުހުންތަކުގައި ދަތުރުވެރިންގެ މުއްދަތު ހަމަވެފައިވާ އައިޑީ ކާޑު ދެން ބަލައި ނުގަންނާނެ ކަމަށް ބުނެފިއެވެ.
އޭވިއޭޝަން ސެކިރިޓީން އާދިއްތަ ދުވަހު ބުނީ ސެކިއުރިޓީ ޗެކް ޕޮއިންޓުތަކުން މުއްދަތު ހަމަވެފައިވާ އައިޑީ ކާޑު، ޕާސްޕޯޓް ނުވަތަ ޑްރައިވިންގ ލައިސަންސް ދެން ބަލައި ނުގަންނާނެ ކަމަށެވެ.
ކޮވިޑް-19 ގެ ބަލިމަޑުކަން ފެތުރެމުންދާ ދުވަސްވަރުގައި، ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް) ގެ އުސޫލުތަކުގައިވާ ގޮތަށް އެއަރޕޯޓުގެ ސެކިއުރިޓީ ޕޮއިންޓުތަކުން މުއްދަތު ހަމަވެފައިވާ ދިވެހިންގެ އައިޑީ ކާޑުތައް ވެރިފިކޭޝަނުގެ ގޮތުގައި ބަލައިގެންފައިވަނީ މިދިޔަ ޑިސެމްބަރު މަހުގެ 31 ވަނަ ދުވަހުގެ ނިޔަލަށެވެ.
ކޮވިޑް-19 އާ ގުޅިގެން އެންމެ ފުރަތަމަ މުއްދަތު ހަމަވެފައިވާ އައިޑީ ކާޑުތައް ބަލައިގަތުމަށް ނިންމީ މިދިޔަ އަހަރުގެ ޖޫން މަހުގެ ނިޔަލަށެވެ. އަދި އެ އަހަރުގެ ޖުލައި މަހުގެ ނިޔަލަށް ތާރީޚު ބަދަލުކުރިއެވެ. މިގޮތަށް ގޮސް މިދިޔަ އަހަރުގެ ޑިސެމްބަރު މަހުގެ ނިޔަލަށް އެ މުއްދަތު އިތުރުކޮށްފައިވެއެވެ.
ކޮވިޑް-19 އިން ރައްކާތެރިވުމުގެ ގޮތުން އަޅާފައިވާ ފިޔަވަޅުތަކަށް ލުއި ދިނުމާއެކު އައިޑީ ކާޑު ހެއްދުމާއި އައު ކޮށްދިނުމުގެ ޚިދުމަތަށް އޮންލައިންކޮށް ހުށަހެޅޭނެ ގޮތަށް ވަނީ ހަމަޖައްސައިދީފައެވެ.
ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން، ޑީއެންއާރުން ބުނެފައިވަނީ އައިޑީ ކާޑު ހެދުމަށް އެދޭ ފަރާތްތަކުގެ ފަސޭހަ އާއި ރައްކާތެރިކަމަށްޓަކައި އައިޑީ ކާޑު ހެއްދުމަށް އެދި އެ އިދާރާގެ ވެބްސައިޓު (www.dnr.gov.mv) އިން ހުށަހެޅޭނެ ކަމަށެވެ.
ކޮވިޑާ ގުޅިގެން ސަރުކާރުގެ ގިނަ ވުޒާރާތަކުން ޚިދުމަތްދެމުން ދަނީ އޮންލައިންކޮށެވެ.
