އެމްޓީސީސީގެ 40 އަހަރުގެ ތާރީހުގައި އެންމެ ގިނަ ޕްރޮޖެކްޓް ނިންމި އަހަރަކީ 2020 ވަނަ އަހަރު
އެމްޓީސީސީގެ ދިގު ތާރީހުގައި ނުހޯދާހާ ކާމިޔާބު ނިމިދިޔަ 2020 ވަަނަ އަހަރު ވަނީ ހޯދާފައި
އެމްޓީސީސީ އޮފީސް އިމާރާތް، އެކުންފުނީގެ ތާރީހުގައި އެންމެ ގިނަ މަސައްކަތް ނިންމާފައިވަނީ ނިމިދިޔަ 2020 ވަނަ އަހަރުގައި
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީގެ) 40 އަހަރު ދުވަހުގެ ދިގު ތާރީހުގައި އެންމެ ގިނަ ޕްރޮޖެކްޓް ނިންމި އަހަރަކީ 2020 ވަނަ އަހަރު ކަމަށް އެ ކުންފުނިން ބުނެފިއެވެ.
އެމްޓީސީސީގެ ސީއީއޯ އާދަމް އާޒިމް ވިދާޅުވީ ކުންފުނީގެ 40 އަހަރު ދުވަހުގެ ތާރީހުގައި އެމްޓީސީސީއިން ނުހޯދާ ކާމިޔާބު ފާއިތުވެދިޔަ 2020 ވަނަ އަހަރު ހޯދާފައިވާ ކަމަށާއި، އެގޮތުން ނިމިދިޔަ 2020 ވަނަ އަހަރަކީ ކުންފުނީގެ ތާރީހުގައި އެންމެ ގިނަ ޕްރޮޖެކްޓް ނިންމި އަހަރު ކަމަށެވެ.
އެމްޓީސީސީއިން ވަނީ ނިމިދިޔަ 2020 ވަނަ އަހަރު 34 ޕްރޮޖެކްޓްގެ މަސައްކަތް ނިންމާފައެވެ.
އާޒިމް ވިދާޅުވީ މިހާ ގިނަ ޕްރޮޖެކްޓް އަހަރު ދުވަހުގެ ތެރޭގައި ނިންމުނީ އެމްޓީސީސީގެ ސްޓާފުންގެ ހިތްވަރުން ކަމަށާއި، އެހެންކަމުން އެމްޓީސީސީގެ ހީވާގި ސްޓާފުންނަށް ޝުކުރުއަދާކުރާ ކަމަށެވެ.
މީގެ ކުރިން ތިނަދޫ ސަރަހައްދީ ބަނދަރު ހެދުމުގެ މަޝްރޫއާއި އެމްޓީސީސީއިން ހަވާލުވުމަށް ބޭއްވި ރަސްމިއްޔާތުގައި ވާހަކަދައްކަވަމުން އާޒިމް ވިދާޅުވީ، އެމްޓީސީސީގެ މަސައްކަތްތައް މިހާރު ބައްޓަން ކޮށްފައިވަނީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ބޭނުންފުޅުވާނެހެން ވީހާވެސް އަވަހަކަށް ތަރައްގީގެ މަޝްރޫއުތައް ނިންމުމަށް ކަމަށެވެ. އެގޮތުން އެމްޓީސީސީއިން ހަވާލުވާ މަސައްކަތްތަކުގެ އަމަލީ މަސައްކަތް ފަށަނީ މަސައްކަތް ކުރުމަށް ބޭނުންވާ ހުރިހާ ސާމާނަކާއިއެކު ކަމަށް އާޒިމް ވިދާޅުވިއެވެ.
