އާގިލް މަރާލި މައްސަލާގައި ދައުވާކުރާ ތިން މީހުން ޝަރީއަތް ނިމެންދެން ބަންދުކުރިކުރުން ދަމަހައްޓައިފި
އާގިލް މަރާލާފައިވަނީ 2018 ވަނަ އަހަރުގެ އޮގަސްޓް މަހުގެ 31 ވަނަ ދުވަހުގެ ރޭ އެމްއެމްއޭ ސަރަހައްދަށް އާގިލް ދަތުރުކުރި ލޯންޗް ކައިރިކުރިތަނުން
އާގިލްގެ މަރުގެ މައްސަލާގައި މިއަދު ކްރިމިނަލް ކޯޓުގައި ކުރިއަށް ގެންދިޔަ ޝަރީއަތް ނިމެންދެން ބަންދުކުރުމާ ގުޅޭ އަޑުއެހުމުގެ ތެރެއިން
ގދ. ފަރެސްމާތޮޑާ، ކޮކާ، އިބްރާހިމް އާގިލް (18އ) މަރާލި މައްސަލާގައި ދައުލަތުން ދައުވާކޮށްފައިވާ ތިން މީހުން، ޝަރީއަތް ނިމެންދެން ބަންދުކުރަން ނިންމާފައިވާ ނިންމުން ދަމަހައްޓައިފިއެވެ.
ޖިނާއީ އިޖުރާއަތުގެ ގާނޫނުގެ ބުނާގޮތުން، ޝަރީޢަތް ނިމެންދެން މީހަކު ބަންދުގައި ބަހައްޓަން ފަނޑިޔާރު ނިންމައިފިނަމަ، އެ ނިންމުން، ކޮންމެ 30 ދުވަހަކުން މުރާޖަޢާކުރަން ޖެހެއެވެ. އަދި، އޭނާ އިތުރަށް ބަންދުގައި ބަހައްޓަންޖެހޭ ސަބަބެއް އޮތްތޯ ބެލުމަށްޓަކައި، އޭނާ ހައްޔަރުކޮށްފައިވާ ފަރާތުން، އޭނާ ކޯޓަށް ހާޒިރުކުރަންޖެހެއެވެ. އެގޮތުގެ މަތީން، އާގިލް މާރާލި މައްސަލާގައި ދައުލަތުން ދައުވާކޮށްފައިވާ ތިން މީހުން ޝަރީއަތް ނިމެންދެން ބަންދުގައި ބަހައްޓަން މައްސަލަ ބައްލަވާ ފަނޑިޔާރު ނިންމާފައިވާތީ، ބުރާސްފަތި ދުވަހުގެ އަޑުއެހުމަކީ މުރާޖައާ ކުރަން ބޭއްވި އަޑުއެހުމެކެވެ.
ބުރާސްފަތި ދުވަހު ކްރިމިނަލް ކޯޓުގައި ބޭއްވި މި އަޑުއެހުން ކުރިއަށް ގެންދިޔައީ މިމައްސަލަ ބައްލަވާ ގާޒީ ޗުއްޓީގައި ހުންނެވުމުން ގާޒީ އިސްމާއީލް ރަޝީދުއެވެ.
މި އަޑުއެހުމުގައި ދައުލަތުގެ ގާނޫނީ ވަކީލު ވިދާޅުވީ، ޝަރީއަތް ނިމެންދެން ދައުވާ ލިބޭ ތިން މީހުންގެ ބަންދުގައި ބެހައްޓުމަށް އެދޭ ކަމަށެވެ. އަދި ޝަރީއަތް ނިމެންދެން އެ މީހުން ބަންދު ކުރުމަށް ނިންމިނިންމުން އަދިވެސް އެގޮތުގައި އެބައޮތްކަމަށްވެސް ދައުލަތުގެ ވަކީލު ވިދާޅުވި އެވެ.
އާގިލް މަރާލި މައްސަލާގައި ދައުލަތުން ދައުވާ ކޮށްފައިވާ ތިން މީހުންނަކީ، ލ. ފޮނަދޫ، ހިޔާ، ހަމްދޫން ހަމްޒަތާއި ސ. ހިތަދޫ، ސްވޭހުހީނާގެ، މިޖުވާދު މާލިކު އިބްރާހީމްގެ އިތުރުން، ހއ. ދިއްދޫ، ސްނޯބާޑް، އިބްރާހީމް ވިޝާމްގެ މައްޗަށެވެ.
އާގިލް މަރާލި މައްސަލާގައި، ހަމްދޫން ހަމްޒަތާއި މިޖުވާދު މާލިކުގެ މައްޗަށް އުފުލާގައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ. އިބްރާހީމް ވިޝާމްގެ މައްޗަށް އުފުލާފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މެރުމުގައި އެހީތެރިވުުގެ ކުށުގެ ދައުވާއެވެ.
ވިޝާމުގެ މައްޗަށް ގަސްތުގައި މީހަކު މެރުމުގައި އެހީތެރިވުުގެ ކުށުގެ ދައުވާ އުފުލާފައިވަނީ، ވ. ފުލިދޫން މާލެއަށް އާގިލްއައި ލޯންޗު ހަމަޖައްސައިދީ އެ ދަތުރުގެ މައުލޫމާތު އެދެ މީހުންނަށް ފޯރުކޮށްދިނުމުންނެވެ.
އާގިލް މަރާލާފައިވަނީ 2018 ވަނަ އަހަރުގެ އޮގަސްޓް މަހުގެ 31 ވަނަ ދުވަހުގެ ރޭ އެމްއެމްއޭ ސަރަހައްދަށް އާގިލް ދަތުރުކުރި ލޯންޗް ކައިރިކުރިތަނުންނެވެ.
އާގިލަށް ފަރުވާދިނުމަށް ގެންދިޔަ އޭޑީކޭ އޮސްޕިޓަލުން އޭރު ބުނެފައިވާ ގޮތުގައި އާގިލް އެ ހޮސްޕިޓަލަށް ގެނައީ އެ ރޭގެ 7:30 ހާއިރުއެވެ. އަދި އޭނާ ހޮސްޕިޓަލަށް ގެނައިއިރުވެސް މަރުވެފައިވާ ކަމަށް އޭޑީކޭ ހޮސްޕިޓަލުން ބުނެފައިވެއެވެ.
އާގިލްގެ މަރުގެ އިތުރުން، 2018 ވަނަ އަހަރުގެ އޮކްޓޯބަރު މަހުގެ 11ވަނަ ދުވަހުގެ ދަންވަރުގެ ވަގުތެއްގައި، ށ. ފޭދޫ ހީނާމާގެ އިސްމާއިލް ޝައްފާން ޝަރީފް މަރާލީ ގޭންގް މާރާމާރީތަކުގައި ކަމަށް ފުލުހުން ބުނެފައިވެއެވެ.
އަދިއެނޫންވެސް ގިނަ މާރާމާރީތަކާއި ތޫނު އެއްޗެއް ބޭނުންކޮށްގެން މީހުން މެރުމުގެ ގިނަ މައްސަލަތަކެއް ކުރީގެ ރައީސް އަބްދުﷲ ޔާމީންގެ ވެރިކަމުގައި ހިނގައިގެންދިޔަ އެވެ. އަދި ރައީސް ޔާމީންގެ ސަރުކާރުގެ ބައެއް އިސްވެރިން ގޭންގްތަކާއި ގުޅުން އޮންނަކަމުގެ ތުހުމަތުތަކާއެކު މަރުގެ ބައެއް މައްސަލަތަކާއި ބޮޑެތި ޖަރީމާތައް ހިންގަމުންދާކަމަށް ރައީސް ޔާމީންގެ ސަރުކާރުގެ ބައެއް އިސްވެރިންގެ މައްޗަށް ވެސް ތުހުމަތު ކުރެވިފައިވެއެވެ.
