ރާއްޖެޓީވީ ދެ މިލިޔަން ރުފިޔާއިން ކުރި ޖޫރިމަނާ ބޭއިންސާފު ކަމަށް ބްރޯޑްކާސްޓިންގ ކޮމިޝަނުން ނިންމައިފިއެވެ.
މި މައްސަލައަކީ ރާއްޖެޓީވީން ފޮނުވި ކޮންޓެންޓަކާ ގުޅިގެން ކަމަށް ބުނެ، ބްރޯޑްކާސްޓިންގ ކޮމިޝަނުގެ މެންބަރުންގެ ގޮތުގައި އައިސްތިބި އެއިރުގެ ވެރިކަންކުރާ ޕާޓީގެ މެންބަރުން ކުރި ނުހައްގު ޖޫރިމަނާއެކެވެ.
އެފަހަރު ޖުރިމާނާކުރިކަން ރާއްޖެޓީވީއަށް އެންގުމުގެ ކުރިން އެހެން މީޑިއާތަކަށް އެ ޚަބަރު ވަނީ އަރާފައެވެ. ރާއްޖެޓީވީން 2018 މާޗް 16 ވަނަ ދުވަހުގެރޭ 23:24 ން 23:35 ށް ބްރޯޑްކާސްޓްކުރި މުޒާހަރާގެ ލައިވް ކަވަރޭޖް ޕްރޮގްރާމުގައި ގައުމުގެ އަމަންއަމާންކަން ނަގާލައި، ރައީސުލްޖުމްހޫރިއްޔާ ޢަބްދުﷲ ޔާމިން ޢަބްދުލް ޤައްޔޫމުގެ އަބުރު ގެއްލޭފަދަ ކޮންޓެންޓް ބްރޯޑްކާސްޓް ކޮށްފައިވާ ކަމަށް ބެލެވޭ ކަމަށް ބުނެ މައްސަލަ ބެލިއެވެ. އަދި ޖޫރިމާނާ 30 ދުވަސް ތެރޭގައި ދެއްކުމަށް އެންގިއެވެ.
މިއީ ރާއްޖެޓީވީ ޖުރިމާނާކުރި ހަތަރުވަނަ ފަހަރެވެ. އޭގެ ކުރިން ރާއްޖެޓީވީ 200،000 ރުފިޔާ، 500،000 ރުފިޔާ އަދި އެއް މިލިޔަން ރުފިޔާއިން ޖޫރިމަނާކުރިއެވެ. ހަތަރުވަނަ ފަހަރުގެ ޖޫރިމަނާއާއެކު ޖުމްލަ 3.7 މިލިޔަން ރުފިޔާއިން ޖޫރިމަނާކުރިއެވެ.
މި މައްސަލަ ދެ ފަހަރެއްގެ މަތިން ބްރޯޑްކާސްޓިންގ ކޮމިޝަނަށް ހުށަހަޅައިގެން އެ ކޮމިޝަނުން އެފަދަ މައްސަލަތައް ބަލާނެ އުސޫލެއް އެކުލަވާލައި، މައްސަލަ ރިވިއު ކުރުމަށްފަހު މިހާރު ވަނީ ގޮތެއް ނިންމާފައެވެ. އެ މައްސަލައިގެ ނިންމާފައިވަނީ ރާއްޖެޓީވީއާ އެއްކޮޅަށެވެ. އެގޮތުން ރާއްޖެޓީވީ ނުހައްގުން ކުރި އެންމެ ބޮޑު ޖޫރިމަނާގެ ދެ މިލިޔަން ރުފިޔާއަކީ ބޭއިންސާފުން ކުރި ޖޫރިމަނާއެއް ކަމަށް މައްސަލަ ރިވިއުކުރުމަށްފަހު ބްރޯޑްކާސްޓިންގ ކޮމިޝަނުން ވަނީ ނިންމާފައެވެ.
މިގޮތަށް މައްސަލަ ނިމުމާއެކު ރާއްޖެޓީވީގެ މެނޭޖްމަންޓުން ވަނީ އެ ފައިސާ ރާއްޖެޓީވީން ބޭނުން ނުކުރުމަށް ނިންމާފައެވެ. އަދި އެ ފައިސާ ކުޑަކުދިންގެ ހިޔާއަށް ހަދިޔާ ކުރުމަށްވެސް ވަނީ ނިންމާފައެވެ. ރާއްޖެޓީވީގެ މެނޭޖްމަންޓުން ބުނެފައިވަނީ ސްޓޭޝަނަށް މުހިންމީ އިންސާފު ކަމަށާއި، އެކަން ވެއްޖެ ކަމަށެވެ.
މި މައްސަލައާ ގުޅޭގޮތުން ރާއްޖެޓީވީގެ ވަކީލު މުއައްވިޒު ރަޝީދު ވިދާޅުވީ މައްސަލަ ރިވިއު ކޮށްދިނުމަށް އެދި ފުރަތަމަ ފަހަރު ހުށަހެޅުމުން އެ މައްސަލަ ނުބެލޭނެ ކަމަށް ނިންމި ނަމަވެސް، ދެވަނަ ފަހަރަށްވެސް މައްސަލަ ރިވިއުކުރުރުމަށް އެދިފައިވާ ކަމަށެވެ. އަދި އެފަދަ މައްސަލަތައް ރިވިއުކުރާނެ އުސޫލެއް އެކުލަވާލައި، މައްސަލަ ބެލުމަށްފަހު އެ މައްސަލަ ރާއްޖެޓީވީއާ އެއްކޮޅަށް ނިމިފައިވާ ކަމަށެވެ.
