އަހަރުގެ މިހާތަނަށް ދައުލަތުން 26.8 ބިލިއަން ރުފިޔާ ހަރަދުކޮށްފި

ޑިސެމްބަރ މަހުގެ 24 ވަނަ ދުވަހުގެ ނިޔަލަށް ސަރުކާރުން 26.8 ބިލިއަން ރުފިޔާ ހަރަދުކޮށްފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީ އިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން މި އަހަރުގެ ޑިސެމްބަރ މަހުގެ 24 ވަނަ ދުވަހުގެ ނިޔަލަށް ސަރުކާރުން ވަނީ 26,826.1 މިލިއަން ރުފިޔާ ހަރަދުކޮށްފައެވެ. ފާއިތުވި އަހަރުގެ މި މުއްދަތުގައި ސަރުކާރުން ހަރަދުކޮށްފައި ވަނީ 27,272.8 މިލިއަން ރުފިޔާއެވެ.

Advertisement

ފިނޭންސްގެ ތަފާސްހިސާބުތައް ދައްކާ ގޮތުން ސަރުކާރުން ރިކަރެންޓް އެކްސްޕެންޑިޗަރގެ ގޮތުގައި 20,242.6 މިލިއަން ރުފިޔާ ފާއިތުވި އަހަރު ކުރިއިރު، މިއަހަރުގެ މި މުއްދަތުގައި ހަރަދުކޮށްފައި ވަނީ 18,915.2 މިލިއަން ރުފިޔާއެވެ.

އެގޮތުން މުސާރަ އާއި އިނާޔަތްތައް ދިނުމަށް 4,414.6 މިލިއަން ރުފިޔާ ހަރަދު ކޮށްފައިވާ އިރު، މުވައްޒަފުންގެ އެލަވަންސް އަށް 3,840.5 މިލިއަން ރުފިޔާ ހަރަދު ކޮށްފައިވާ ކަމަށް ތަފާސްހިސާބުތައް ދައްކައެވެ. އަދި ޕެންޝަނަށް 1,106.1 މިލިއަން ރުފިޔާ ހަރަދު ކޮށްފައިވާ އިރު، ރިޓަޔަމެންޓް ބެނެފިޓްގެ ގޮތުގައި 458.7 މިލިއަން ރުފިޔާ ވަނީ ހަރަދު ކޮށްފައެވެ. އެޑްމިނިސްޓްރޭޓިވް އަދި އޮޕަރޭޝަނަލް އެކްސްޕެންސްގެ ގޮތުގައި 8,910.9 މިލިއަން ރުފިޔާ ވަނީ ހަރަދު ކޮށްފައެވެ.

މީގެ އިތުރުން، ކެޕިޓަލް އެކްސްޕެންޑިޗަރގެ ގޮތުގައި 7,910.9 މިލިއަން ރުފިޔާ މި އަހަރުގެ ޑިސެމްބަރ މަހުގެ 24 ވަނަ ދުވަހުގެ ނިޔަލަށް ހޭދަ ކޮށްފައިވާ އިރު، ފާއިތުވި އަހަރުގެ މި މުއްދަތުގައި ހޭދަ ކޮށްފައި ވަނީ 7,030.2 މިލިއަން ރުފިޔާއެވެ.

ފިނޭންސްގެ ތަފާސްހިސާބުތައް ދައްކާގޮތުން ކެޕިޓަލް އިކުއިޕްމެންޓަށް 314.2 މިލިއަން ރުފިޔާ ހަރަދުކޮށްފައިވާ އިރު، އިންފްރާސްޓްރަކްޗަރ އެސެޓްސް އަށް ހަރަދުކޮށްފައި ވަނީ 4,049.3 މިލިއަން ރުފިޔާއެވެ. އަދި ޑިވެލޮޕްމެންޓް ޕްރޮޖެކްޓްސް އާއި އިންވެސްޓްމެންޓް އައުޓްލޭސް އަށް 2,517.4 މިލިއަން ރުފިޔާ ވަނީ ހަރަދުކޮށްފައެވެ.

ކޮވިޑް-19 ގެ ސަބަބުން އިގްތިސާދަށް އައި ލޮޅުމާއިއެކު ދައުލަތުގެ ހަރަދު ކުޑަކުރި ނަމަވެސް ޕީއެސްއައިޕީ މަޝްރޫއުތަށް ސަރުކާރުން ހުއްޓާލާފައެއް ނުވެއެވެ. އަދި ކޮވިޑް-19 އާއި ގުޅުން ހުރި ގިނަ ހަރަދުތަކެއްވެސް ސަރުކާރުން ވަނީ ކޮށްފައެވެ.