އެމެރިކާއިން ފުރަތަމަ ފަހަރަށް ކޮވިޑުގެ އައު ވޭރިއަންޓު ފެނިއްޖެ

ކޮވިޑް-19 ގެ އެންމެ ގިނަ ކޭސްތައް ފެނިފައިވާ އެމެރިކާއިންވެސް ކޮވިޑް-19 ގެ އައު ވޭރިއަންޓް ފެނިއްޖެއެވެ.

ބީބީސީގައި ރިޕޯޓް ކޮށްފައިވާ ގޮތުން އެމެރިކާގެ ސްޓޭޓް އޮފް ކޮލޮރާޑޯއިން މި ވޭރިއަންޓް ފެނިފައިވަނީ އުމުރުން 20 އަހަރުގެ ޒުވާނެއްގެ ގައިންނެވެ. އޭނާއަކީ އެއްވެސް ޓްރެވަލް ހިސްޓަރީއެއްވެސް ނެތް މީހެއް ކަމަށް ރިޕޯޓުތައް ބުނެއެވެ. އަދި އޭނާ މިވަގުތު ހުރީ އައިސޮލޭޝަންގައެވެ.

ކޮލޮރާޑޯގެ ސްޓޭޓް ޑިޕާރޓްމަންޓުން މިވަގުތު ގެންދަނީ ކޮވިޑުގެ މި އައު ވޭރިއަންޓު ފެނުނު ޒުވާނާގެ ކޮންޓެކްޓް ޓްރޭސިންގ ގެ މަސައްކަތް ކުރަމުންނެވެ. އެހެންނަމަވެސް، މިހާތަނަށް އަދި ކޮންޓެކްޓުންގެ ތެރެއިން މީހަކު ޕޮޒިޓިވްވެފައި ނުވާކަމަށް ކޮލޮރާޑޯގެ ސިއްޙީ އޮފިޝަލުން ބުނެއެވެ.

އެމެރިކާއިން މިހާތަނަށް 19 މިލިއަނަށްވުރެ ގިނަ މީހުން ކޮވިޑް-19 އަށް ޕޮޒިޓިވްވެފައިވެއެވެ. އަދި 337،000 މީހުން ވައިރަސް ޖެހިގެން މަރުވެފައިވެއެވެ. އެއާއެކު އެމެރިކާ ވެގެންގޮސްފައިވަނީ އެންމެ ގިނަ މީހުންނަށް ކޮވިޑް ޖެހިގެން ރިޕޯޓް ކުރި ޤައުމުގެ އިތުރުން، އެންމެ ގިނަ މީހުން މި ބަލީގައި މަރުވި ޤައުމަށްވެސް މެއެވެ.

އެމެރިކާގައި މިހާރު ވެކްސިން ދިނުމުގެ ޕްރޮގްރާމްވެސް ފަށާފައިވާއިރު، މޮޑާނާ ގެ ވެކްސިންގެ އިތުރުން، ފައިޒާގެ ވެކްސިން އެ ޤައުމުގައި ދަނީ ބޭނުން ކުރަމުންނެވެ. އަދި މިހިނގާ ޑިސެމްބަރު މަހުގެ ނިޔަލަށް އެމެރިކާގެ 20 މިލިއަން މީހުންނަށް ވެކްސިން ޖެހުމަށް އެ ޤައުމުން ވަނީ އަމާޒު ހިފާފައެވެ.

ތަޖުރިބާކާރުންނާ ޙަވާލާދީ ބީބީސީގައި ރިޕޯޓް ކޮށްފައިވާ ގޮތުން ކޮވިޑުގެ އައު ވޭރިއަންޓު ފެތުރޭ ނިސްބަތް އަވަހެވެ. އެހެންނަމަވެސް، މި ވޭރިއަންޓް ކޮވިޑް-19 އަށްވުރެ ނުރައްކާތެރިކަން ނުވަތަ ނޫންކަން އަދި ކަށަވަރު ކުރެވިފައެއް ނުވެއެވެ.