ތިލަފުށީގެ މާސްޓަރ ޕްލޭން މިހާރު ފެށިފައިވާ ކަމަށާއި، މި ޕްލޭން އަންނަ އަހަރުގެ މާޗު މަހަށް ނިންމުމަށް މަސައްކަތް ކުރަމުން އަންނަ ކަމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވެއްޖެއެވެ.
ރާއްޖެޓީވީގެ "ފަލަ ސުރުހީ" ޕްރޮގްރާމްގައި ވާހަކަދައްކަވަމުން ސުހައިލް ވިދާޅުވީ މާލޭ ސަރަހައްދުގެ ތަރައްގީގެ މަސައްކަތްތަކުގެ ޕްލޭން ހަދަމުން އަންނަ ކަމަށާއި، އެގޮތުން ގުޅީފަޅުގެ މާސްޓަރ ޕްލޭން މިނިސްޓްރީ އޮފް ނޭޝަނަލް ޕްލޭނިންގ އެންޑް ހައުސިންގ އިންފްރާސްޓަކްޗަރ އިން ހަދަމުން އަންނައިރު، ތިލަފުށީގެ މާސްޓަރ ޕްލޭން އެޗްޑީސީއިން ހަދަމުން އަންނަ ކަމަށެވެ.
ސުހައިލް ވިދާޅުވީ ތިލަފުށީގެ މާސްޓަރ ޕްލޭންގެ ފުރަތަމަ ކޮންސެޕްޓް މިހާރު ނިމިފައިވާ ކަމަށާއި، މި މަސައްކަތް މާޗު މަހަށް ނިންމުމަށް މަސައްކަތް ކުރަމުން އަންނަ ކަމަށެވެ. ސުހައިލް ވިދާޅުވީ ތިލަފުށްޓަށް ބަލާލާނަމަ 140 ހެކްޓަރު ބިން ހިއްކެން އެބައޮތް ކަމަށެވެ. އެހެން ކަމުން އަންނަ އަހަރުތެރޭގައި ތިލަފުށީގެ ބިން ހިއްކުމުގެ މަޝްރޫއު ފެށިގެންދާނެ ކަމަށާއި، އެއާއިއެކު ވަރަށް ގިނަ ސިނާއީ ކަންކަމަށް ބިން ދޫކުރެވިގެންދާނެ ކަމަށެވެ.
ތިލަފުށީ މާސްޓަރ ޕްލޭންގެ މަސައްކަތް މިހާރު ވާނީ ފެށިފައި. އަޅުގަނޑުމެންގެ އަމާޒަކީ މި މަސައްކަތް އަންނަ އަހަރުގެ މާޗު މަހަށް ނިންމުން. މީގެ އިތުރުން ތިލަފުށީގައި އިތުރަށް 140 ހެކްޓަރު ބިން ހިއްކެން އެބައޮތް. އެހެންކަމުން މި މަޝްރޫއު އަންނަ އަހަރުގެތެރޭގައި ފެށިގެންދާނެ. މިއާއިއެކު ސިނާއީ ގިނަ މަސައްކަތްތަކަކަށް ތިލަފުށިން ބިން ދޫކުރެވިގެންދާނެ.އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު
މި ސަރުކާރުގެ އެންމެ ބޮޑު އެއް އަމާޒަކީ މާލޭގައި ކުރަމުން އަންނަ ސިނާއީ މަސައްކަތްތައް ތިލަފުށްޓަށް ބަދަލުކުރުން ކަމަށް ހައުސިންގ މިނިސްޓަރ މުހައްމަދު އަސްލަމް ވަނީ ވިދާޅުވެފައެވެ. އަދި ސަރުކާރުގެ މި ފަސް އަހަރު ނިމުމުގެ ކުރިން ސިނާއީ މަސައްކަތް ކުރުމަށް ތަލަފުށިން ބިން ހަމަޖައްސައިދޭނެ ކަމަށްވެސް ވަނީ ވިދާޅުވެފައެވެ.
