ފްރެންޗް ލީގުގެ އެންމެ ފަހުގެ ޗެމްޕިއަން ޓީމު ކަމަށްވާ ޕީއެސްޖީގެ ކޯޗުގެ މަގާމުން ތޯމަސް ޓުޗެލް ވަކިކޮށްފިއެވެ.
މީގެ ކުރިންވެސް މީޑިއާގައި ވަނީ ޓުޗެލް ވަކިކޮށް، ޕީއެސްޖީގެ ކޯޗަކަށް ޓޮޓެންހަމް ހޮޓްސްޕާގެ ކުރީގެ ކޯޗު މައުރީސިއޯ ޕޮޗެޓީނޯ ގެނައުމަށް އެ ޓީމުން ނިންމާފައިވާ ކަމަށް ރިޕޯޓުކޮށްފައެވެ.
ޕީއެސްޖީން އަންގާރަ ދުވަހު ނެރުނު ބަޔާނެއްގައި ވަނީ އެ ކުލަބުގެ ކޯޗުގެ މަގާމުން ޓުޗެލް ރަސްމީކޮށް ވަކިކުރިކަން ހާމަކޮށްފައެވެ. އެ ކުލަބުގެ ރައީސް ގަތަރުގެ ވިޔަފާރިވެރިޔާ ނާސިރު އެލް-ޚެއްލާފީ ވަނީ ޕީއެސްޖީއަށް ޓުޗެލް ކޮށްދިން ޚިދުމަތަށް ހާއްސަ ޝުކުރެއް އަދާކުރައްވާފައެވެ. ޓުޗެލް އަކީ 2011 ވަނަ އަހަރަށްފަހު ސީޒަނެއްގެ މެދުތެރެއިން ޕީއެސްޖީން ވަކިކުރި ފުރަތަމަ ކޯޗެވެ.
ކުރިން ބޮރޫޝިއާ ޑޯޓްމުންޑަށް ކޯޗުކޮށްދިން އުމުރުން 47 އަހަރުގެ ޓުޗެލް ޕީއެސްޖީއާ ހަވާލުވީ 2018 ވަނަ އަހަރު ދެ އަހަރުގެ އެއްބަސްވުމެއްގެ ދަށުންނެވެ. ޓުޗެލްއާއެކު ޕީއެސްޖީން ފްރެންޗް ލީގު ދެ ފަހަރު ކާމިޔާބުކުރިއިރު، މިދިޔަ ސީޒަނުގައި ޓުޗެލްގެ ކޯޗުކަމުގައި ޕީއެސްޖީން ވަނީ ޔުއެފާ ޗެމްޕިއަންސް ލީގުގެ ފައިނަލުގައިވެސް ކުޅެފައެވެ. އެއީ އެ ކުލަބުގެ ތާރީޚުގައި ކުޅުނު ފުރަތަމަ ޗެމްޕިއަންސް ލީގު ފައިނަލެވެ. އެކަމަކު އެ ފައިނަލުން ބަލިވިތާ ހަތަރު މަހެއްހާ ދުވަސް ފަހުން ޕީއެސްޖީން ޓުޗެލް ވަކިކުރީ މި ސީޒަނުގައި އެ ޓީމުގެ ނަތީޖާ އެންމެ ރަނގަޅު ނޫން ކަމަށް ބެލުމަށްފަހުއެވެ.
ޕީއެސްޖީން ޓުޗެލް މަގާމުން ވަކިކުރިއިރު، އަވަސް މުސްތަގުބަލެއްގައި އެ ޓީމުގެ ކޯޗުގެ މަގާމާ ޕޮޗެޓީނޯ ހަވާލުވާނެ ކަމަށް ރިޕޯޓުތައް ބުނެއެވެ. މިދިޔަ އަހަރުގެ ނޮވެންބަރު މަހު ޓޮޓެންހަމުގެ ކޯޗުގެ މަގާމުން ވަކިކުރި ޕޮޗެޓީނޯ އަދި ޓީމަކާ ހަވާލުވެފައެއް ނުވެއެވެ. ޕޮޗެޓީނޯ ޓޮޓެންހަމުގެ ކޯޗުގެ މަގާމުން ވަކިކޮށްފައިވަނީ ފަސް އަހަރަށް ފަހުއެވެ. އޭނާ ވަނީ އެ ޓީމުގައި ކާމިޔާބު މަސައްކަތްތަކެއް ކޮށްފައެވެ. އެގޮތުން އެ ޓީމަށް އަލަށް ޔުއެފާ ޗެމްޕިއަންސް ލީގުގެ ފައިނަލުން ފުރުސަތު ހޯދައިދީ ރަނގަޅު ޓީމެއް އެކުލަވާލިއެވެ.
ރިޕޯޓުތައް ބުނާގޮތުން ޕީއެސްޖީން ފިނި މޫސުމުގެ ބްރޭކަށްފަހު ޖެނުއަރީ މަހުގެ ތިންވަނަ ދުވަހު އަލުން ފަރިތަކުރުންތައް ފަށާނީ ޕޮޗެޓީނޯއާ އެކުގައެވެ.
