މައިންބަފައިންގެ ހަނދާންތަކުގެ ތެރެއިން ރައީސްގެ އެންމެ ޚާއްސަ ހަނދާން: މީހުންނަށް ހަސަދަވެރި ނުވެ، އެކީގައި އުޅުމަށް ދެއްވާ ނަސޭހަތް

މައިންބަފައިންގެ ނަސޭހަތްތަކުގެ ތެރެއިން އެންމެ ޚާއްސަ އެއް ނަސޭހަތަކީ މީހުންނަށް ޙަސަދަވެރިނުވެ، އަބަދުވެސް އެންމެންނާވެސް ގުޅިގެން އުޅުމަށް ދެއްވާ ނަސޭހަތްކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ވިދާޅުވެއްޖެއެވެ.

ދިވެހިރާއްޖޭގެ އަޑުން ކޮންމެ ދުވަހަކު ހެނދުނު ގެނެސްދޭ "ބާއްޖަވެރި ހެނދުނެއް" ޕްރޮގްރާމްގައި އަންގާރަ ދުވަހު ބައިވެރިވެވަޑައިގެން ރައީސް ވަނީ މަސައްކަތުގެ ވާހަކަތަކާއި އަމިއްލަ ޒާތީ ދިރިއުޅުއްވުމުގެ ބައެއް ވާހަކަތައް ހިއްސާ ކުރައްވާފައެވެ. އެގޮތުން މައިންބަފައިންގެ ހަނދާންތަކުގެ ތެރެއިން އެންމެ ޚާއްސަ ހަނދާނަކީ ކޮބައިތޯ ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ، އެމަނިކުފާނުގެ މައިންބަފައިން އަބަދުވެސް ދެއްވާ ނަސޭޙަތެއް ހަނދުމަ ހުންނަ ކަމަށެވެ.

ރައީސް ވިދާޅުވީ، މީހުންނަށް ޙަސަދަވެރި ނުވުމަށް މައިންބަފައިން އަބަދުވެސް ނަސޭޙަތް ދެއްވާ ކަމަށެވެ. އަދި ކޮންމެ ކަމެއްގައިވެސް ހުރިހާ އެންމެންނާވެސް ގުޅިގެން އުޅުއްވުމަށް މައިންބަފައިން އަބަދުވެސް ނަސޭޙަތް ދެއްވާކަން ފާހަގަ ކުރައްވައި ރައީސް ވިދާޅުވީ، ކިތަންމެ ވަރަކަށް ޙިޔާލު ތަފާތު ވި ނަމަވެސް ގުޅުން ބަދަހިކޮށް، ހަސަދަވެރިކަން ދުރު ކުރުމަށް އަރިހުގައި އުޅުއްވާ ބޭފުޅުންނަށްވެސް އަބަދުވެސް ހަނދާން ކޮށްދެއްވާ ކަމަށެވެ. އަދި ޚުދު އެމަނިކުފާނުވެސް އުޅުއްވުން ބައްޓަން ކުރައްވަނީ އެގޮތަށްކަން ރައީސް ފާހަގަ ކުރެއްވިއެވެ.

މި ޕްރޮގްރާމްއަށް ގުޅުއްވައި، ބައިވެރިވެވަޑައިގެން ފޮރިން މިނިސްޓަރ އަބްދުﷲ ޝާހިދުވެސް ވަނީ ރައީސްގެ ވިސްނުންތެރިކަމަށް ތައުރީފު ކުރައްވައި ވާހަކަ ދައްކަވާފައެވެ. ޝާހިދު ވިދާޅުވީ، ރައީސް އަބަދުވެސް ޤައުމުގެ މަސްލަޙަތަށް އިސްކަން ދެއްވާ ކަމަށެވެ. އަދި އެއްވެސް އިރެއްގައި ޤައުމުގެ ފައިދާ ހުރި ކަމެއް ރައީސް ނުކޮށް ދޫކޮށްނުލައްވާނެ ކަމަށް ޝާހިދު ވިދާޅުވިއެވެ.

ގުޅިފައިވާ ޕާޓީތަކުގެ ކޯލިޝަނެއްގައި އައު ސަރުކާރު އައިއިރު، އެކި ގޮތްގޮތުން ބޮޑެތި ގޮންޖެހުންތަކާ ކުރިމަތިލާން ޖެހިފައިވެއެވެ. އެހެން ނަމަވެސް، ރައީސް ސޯލިޙު އަބަދުވެސް ފެނިވަޑައިގަތީ ކެތްތެރިކަމާއި ޙިކުމަތްތެެރިކަމާއެކު އެކަންކަން ޙައްލު ކުރެއްވުމަށް މަސައްކަތް ކުރެއްވި މަންޒަރެވެ. ޙިޔާލުތަފާތުވުންތަކާ އެކުވެސް މިހާރުގެ ކޯލިޝަން ދެމެހެއްޓެވެނީ ރައީސްގެ އެ ސިފަފުޅުތަކުގެ ސަބަބުންކަމަށް ގިނަ ބަޔަކު ޤަބޫލު ކުރެއެވެ.

އޭގެ އިތުރުން، އެތައް އަހަރެއް ވަންދެން މަޖިލީހުގައި ހޭދަ ކުރެއްވިއިރުވެސް ރައީސް ފެނިގެންދިޔައީ އެމަނިކުފާނުގެ މައިންބަފައިންގެ ނަސޭޙަތުގައިވާ ފަދައިން އެންމެންނާވެސް ގުޅިގެން މަސައްކަތް ކުރެއްވި މަންޒަރެވެ.