މޯލްޑިވިއަންގެ ސީޕްލޭނެއް މަލިކުގައި

އިންޑިއާގައި ސީޕްލޭންގެ ހިދުމަތް ދިނުމަށް ސްޕައިސް ޖެޓުން ކުރަމުން އަންނަ މަސައްކަތުގެ ތެރެއިން މޯލްޑިވިއަންގެ ސީޕްލޭނެއް އަނެއްކާވެސް އިންޑިއާއަށް ގެންގޮސްފިއެވެ.

ހޯމަ ދުވަހު މޯލްޑިވިއަނުން ކޮށްފައިވާ ޓްވީޓެއްގައި ވަނީ ރާއްޖޭގެ ގައުމީ އެއާލައިން، މޯލްޑިވިއަންގެ ސީޕްލޭން އިންޑީއާގެ މަލިކަށް ގޮސްފައިވާ ކަމަށާއި އަދި މަލިކުގައި މި ސީޕްލޭން މަޑުކޮށްފައި ވަނީ ސްޕައިސް ޖެޓްގެ ޗާޓާޑް ދަތުރެއްގައި އަހުމަދުއަބާދަށް ދިއުމުގެ މަގުމަތީގައި ކަމަށެވެ. މިއީ ރާއްޖޭގެ ގައުމީ އެއާލާއިނުން މަލިކަށް ކުރި ފުރަތަމަ ދަތުރެވެ.

މޯލްޑިވިއަނުން ބުނީ ސްޕައިސް ޖެޓުން ސީޕްލޭން ޗާޓަރުކޮށްގެން ގެންދިޔައީ އެއްމަސް ދުވަހަށް ކަމަށެވެ. މި ދަތުރުގައި މޯލްޑިވިއަންގެ ސީޕްލޭން ކްރޫގެ ހަ މެންބަރުންވެސް އިންޑިއާއަށް ގޮސްފައިވާ ކަމަށް އެ ކުންފުނިން ވަނީ ބުނެފައެވެ.

އިންޑިއާގެ ބޮޑުވަޒީރު ނަރެންދުރަ މޯދީގެ ހާއްސަ ދަތުރުފުޅަކަށް ގައުމީ އެއަރލައިން މޯލްޑިވިއަންގެ ސީޕްލޭނެއް ޗާރޓަރ ކުރުމަކީ އިންޑިއާ އާއި ރާއްޖެ އާއި އެއްގައުމު އަނެއްގައުމަށް ކުރާ އިޙްތިރާމް ރަމްޒުކޮށްދޭ ކަމެއްކަމަށް ޤައުމީ އެއަރލައިން މޯލްޑިވިއަން ހިންގަމުން އަންނަ ކުންފުނި، އައިލެންޑް އޭވިއޭޝަން ޕްރައިވެޓް ލިމިޓެޑުގެ މެނޭޖިން ޑިރެކްޓަރ މުޙައްމަދު ރިޒްވީ މީގެ ކުރިން ވަނީ ވިދާޅުވެފައެވެ.

ސްޕައިސްޖެޓްގެ މިދަތުރުތަކުގެ އިތުރުން، އިންޑިއާގައި ސީޕްލޭން ފެށުމަށް ޓެކްނިކަލް ސަޕޯޓް އެގައުމުން ބޭނުންވާނަމަ އެކަން ފޯރުކޮށްދޭނެ ކަމަށާއި އެފަދަ މަޝްވަރާތަކެއް މިހާރު ވެސް ކުރިއަށްދާ ކަމަށް ރިޒްވީ ވަނީ ވިދާޅުވެފައެވެ.

އިންޑިއާގައި ސީޕްލޭންގެ ހިދުމަތް ފައްޓަވައިދެއްވީ އެ ގައުމުގެ ގައުމީ އެއްބައިވަންތަކަމުގެ ދުވަހާ ދިމާކޮށް، ބޮޑުވަޒީރު ނަރެންދްރަ މޯދީއެވެ. މި ހިދުމަތް ފަށާފައި ވަނީ އިންޑިއާގެ ގުޖުރާތުގެ އަހުމަދު އާބާދުންނެވެ. ސީޕްލޭންގެ ހިދުމަތް ފެށުމަށް އެގައުމަށް މޯލްޑިވިއަންގެ ސީޕްލޭނެއް ވަނީ ގޮސްފައެވެ. އަދި މި ހިދުމަތް ފެށީ މޯލްޑިިވިއަންގެ ސީޕްލޭންގެ ކްރޫންގެ އެހީތެރިކަމާ އެކުގައެވެ.