ޕާކުކޮށްފައި އޮތް މޯލްޑިވިއަންގެ ދެ ބޯޓަކަށް ގެއްލުން ވެއްޖެ

ވިއްސާރައާ ގުޅިގެން ވެލާނާ އިންޓަނޭޝަނަލް އެއާޕޯޓް (ވީއައިއޭ)ގައި ޕާކުކޮށްފައި އޮތް، މޯލްޑިވިއަންގެ ދެ ބޯޓަކަށް ގެއްލުން ވެއްޖެއެވެ.

ހުކުރު ދުވަހުގެ މެންދުރުފަހު އެ ހާދިސާ ހިނގާފައި ވަނީ ކައިރިކައިރީގައި ޕާކުކޮށްފައި އޮތް ދެ ބޯޓެއްގެ ތެެރެއިން ބޯޓެއްގެ ކަނާއަތް ފަރާތު ފިޔަގަނޑު އެހެން ފްލައިޓެއްގައި ޖެހިގެންނެވެ.

މޯލްޑިވިއަން އޮޕަރޭޓު ކުރާ އައިލެންޑް އޭވިއޭޝަންގެ މެނޭޖިން ޑިރެކްޓަރު އަބްދުލް ހާރިސް "ރާއްޖެއެމްވީ"އަށް ވިދާޅުވީ މޫސުން ގޯސްވުމުގެ ސަބަބުން ހިނގި އެ ހާދިސާގައި ގެއްލުންވެފައި ވަނީ އެންމެ ފްލައިޓަކަށް ކަމަށެވެ. އެގޮތުން ޕާކުކޮށްފައި އޮތް ޕްލައިޓެއްގެ ފަހަތު ފިޔަގަނޑުގެ ރަޑާއަށް ގެއްލުންވެ، މަރަމާތު ކުރަން ޖެހުނު ކަމަށް ހާރިސް ވިދާޅުވިއެވެ.

އިއްޔެ ހިނގި ހާދިސާ: މޯލްޑިވިއަނުން ބުނީ އެ ހާދިސާ ހިނގީ ވިއްސާރައާ ގުޅިގެން ކަމަށް

އެ ހާދިސާއާ ހިނގާފައި ވަނިކޮށް ނަގާފައިވާ ފޮޓޯތަކެއް ރާއްޖެއެމްވީއަށް ވަނީ ލިބިފައެވެ. އެ ފޮޓޯތަކުން ފެންނަ ގޮތުގައި އެ ހާދިސާގައި ދެ ބޯޓަށް ވެސް ގެއްލުންތަކެއް ވެފައިވާ ކަން ފާހަގަ ވެއެވެ.

އެ ހާދިސާއާ ގުޅިގެން، އިއްޔެ މެންދުރުފަހު ވެލާނާ އިންޓަނޭޝަނަލް އެއާޕޯޓުން ފުރަން ޝެޑިއުލް ކޮށްފައި އޮތް ބައެއް ފްލައިޓުތަކުގެ ދަތުރުތަކަށް ބުރޫއެރިއެވެ.