މޯލްޑިވިއަންގެ ކުރޫއަކަށް އިންޒާރުދިން މައްސަލައެއްގައި ތިންމީހަކު ހައްޔަރު ކޮށްފި

ހުކުރު ދުވަހުގެ ރޭ މޯލްޑިވިއަންއިން ދަތުރުކުރި ފްލައިޓެއްގެ ކުރޫއަކަށް އިންޒާރުދިން މައްސަލައެއް ފުލުހުން ބަލަން ފަށައިފިއެވެ.

ފުލުހުންގެ މީޑިއާ އޮފިޝަލް ރާއްޖެ އެމްވީއަށް ވިދާޅުވީ މިމައްސަލާގައި ފުލުހުންގެ ބެލުމުގެ ދަށަށް ތިންމީހުން ގެނެސްފައިވާ ކަމަށެވެ. ހައްޔަރު ކޮށްފައިވަނީ ތިން ފިރިހެނުން ކަމަށާއި އެތިންމީހުންގެ އުމުރަކީ 27 އަހަރާއި 30 އަހަރާއި 31 އަހަރުކަމަށް ފުލުހުން ބުނެއެވެ. ތިން މީހުން ވެސް ހައްޔަރު ކޮށްފައިވަނީ ލ. ކައްދޫއިން ކަމަށާއި އެމީހުން މިހާރު ތިބީ ކައްދޫ ޕޮލިސް ސްޓޭޝަންގައި ފުލުހުންގެ ބެލުމުގެ ދަށުގައި ކަމަށް މައުލޫމާތު ލިބިފައިވެއެވެ.

ހުކުރު ދުވަހުގެރޭ މާލެއިން ލ. ކައްދޫއަށް ދަތުރުކުރި މޯލްޑިވިއަންގެ މަތިންދާބޯޓުގައި ދަތުރު ކުރި މީހަކު ބުނީ އެބޯޓުގެ ކެބިން ކްރޫއަކާ ހުތުރު ބަހުން މުއާމަލާތްކޮން އިންޒާރުދީފައިވާ ކަމަށެވެ.

މި ހާދިސާއާ ބެހޭ ތަފުސީލެއް މޯލްޑިވިއަން އިން އަދި ހާމައެއް ނުކުރެއެވެ.