ރިހެބިލިޓޭޝަން ސެންޓަރުގައި ތިބި ފަރާތްތަކަށް ދަރުސް ދެއްވާނެ ބޭފުޅުން ހޯދަނީ

ނޭޝަނަލް ޑްރަގް އޭޖެންސީ (އެންޑީއޭ) ހިންގަމުން އަންނަ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރުތަކުގައި ތިބި ފަރާތްތަކަށް ދީނީ ދަރުސް ދެއްވާނެ ބޭފުޅުން ހޯދުމަށް އިއުލާން ކޮށްފިއެވެ.

އެންޑީއޭއިން ކޮށްފައިވާ އިއުލާނެއްގައި ބުނެފައިވަނީ، އެ އެޖޭންސީން ކ. ހިންމަފުށީގައާއި ޏ. ފުވައްމުލަކުގައި ހިންގަމުންދާ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރަށް ކޮންޓެރެކްޓް އުސޫލުން ދީނީ ފެސިލިޓޭޓަރުން ހޯދަން ބޭނުންވާ ކަމަށެވެ.

އެގޮތުން، ކްލާސް ހިންގާ ގަޑިއިރަކަށް އަމިއްލަ މެޓީރިއަލްގައި ފެސިލިޓޭޓްކުރާ ފަރާތްތަކަށް 250ރގެ ރޭޓުން، އަދި އެ އެޖެންސީން މެޓީރިއަލްސް ހަމަޖައްސައިދިނުމުން ފެސިލިޓޭޓްކުރާ ފަރާތްތަކަށް 150ރގެ ރޭޓުން އުޖޫރަ ދިނުމަށް ހަމަޖައްސާފައިވާ ކަމަށެވެ.

ވަޒީފާގެ އަދާކުރަންޖެހޭ މައިގަނޑު މަސްއޫލިއްޔަތުތަކީ، ދީނީ ދަރުސް ދިނުމާއި، އިސްލާމް ކިޔަވައިދިނުމާއި ކީރިތި ޤުރްއާން ކިޔަވައި ދިނުމެވެ. މީގެއިތުރުން، ލިޔަންކިޔަން ދަސްކޮށްދިނުމާއި ހިނައި ތާހިރުވާން ދަސްކޮށްދިނުމުގެ އިތުރުން ނަމާދު ކުރަން ދަސްކޮށްދިނުން ހިމެނެއެވެ.

އެ ވަޒީފާއަށް ޝައުގުވެރިވާ ފަރާތްތަކުން އަންނަ ޖެނުއަރީ މަހުގެ ހަތަރުވަނަ ދުވަހުގެ 13:00ގެ ކުރިން އެރަށެއްގައި ހުންނަ (ހިންމަފުއްޓާއި ފުވައްމުލަކުގައި ހުންނަ) ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރަށް ނުވަތަ ނޭޝަނަލް ޑްރަގް އޭޖެންސީގެ މައި އިދާރާއަށް ހުށަހެޅުމަށް ބުނެފައިވެއެވެ.