އުފަލާއި ހިތާމައިގައިވެސް ރާއްޖެއަކީ ބަދަހި ގައުމެއް: ހޯމް މިނިސްޓަރު
ސުނާމީ ކާރިސާއަށް ވަނީ 16 އަހަރު ފުރިފައި
ހޯމް މިނިސްޓަރު އިމްރާން އަބްދުﷲ
އުފަލާއި ހިތާމައިގައިވެސް ރާއްޖެއަކީ ބަދަހި ރައްޔިތުންތަކެއް އުޅޭ ގައުމެއް ކަމަށާއި، ދިވެހި އަބަދުވެސް އިސްކުރާނީ އިސްލާމް ދީނާއި ޤައުމިއްޔަތު ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ދިވެހިންގެ އެއްބައިވަންތަކަމުގެ ދުވަހާއި ގުޅިގެން މިނިސްޓަރު އިމްރާން ކުރެއްވި ޓްވީޓެއްގައި ވިދާޅުވެފައި ވަނީ، އަހަރެމެންގެ ޖަޒީރާތައް ގުޅުވާލަނީ އެއްބައިވަންތަކަމުގެ ފާލަމުން ކަމަށާއި، އުފަލާއި ހިތާމައިގައިވެސް ދިވެހިރާއްޖެއަކީ ބަދަހި ޤައުމެއް ކަމަށެވެ.
ދިވެހިންގެ އެއްބައިވަންތަކަމުގެ ދުވަހުގެ ގޮތުގައި ޑިސެންބަރު މަހުގެ 26 ވަނަ ދުވަސް ފާހަގަ ކުރަނީ ދެކުނު އޭޝިއާގެ ގިނަ ގައުމުތަކަކަށް 2004 ވަނަ އަހަރުގެ ޑިސެންބަރު 26 ވަނަ ދުވަހު އެރި ސުނާމީއާއި ގުޅިގެންނެވެ.
އިންޑޮނޭޝިއާގެ ސުމާޓްރާއަށް އައި ބާރުގަދަ ބިންހެލުމަކާއި ގުޅިގެން އުފެދުނު މި ސުނާމީގެ ސަބަބުން ރާއްޖޭގެ ބައެއް ރަށްތައް މީހުން ދިރިނޫޅެވޭ ވަރަށް ހަލާކު ވެފައިވާއިރު، އެތަކެއް ފުރާނަތަކެއް ވަނީ މި ދުނިޔެއާއި އަލްވަދާއު ކިޔާފައެވެ. އެގޮތުން މި ދުވަސް އެއްބައިވަންތަކަމުގެ ދުވަހުގެ ގޮތުގައި ފާހަގަކުރަނީ އޭރު ދިވެހިން ދެއްކި އެއްބައިވަންތަކަމާއި، އެކަމުގެ ލާމަސީލު ނަމޫނާގެ ސަބަބުންނެވެ.
މި ކާރިސާއަށް 16 އަހަރު ފުރިފައިވާއިރު، އަދިވެސް އެ ދުވަހުގެ ހަނދާންތައް ދިވެހިން އައު ކުރެއެވެ. މި ކާރިސާގައި ދުނިޔޭގެ އެކި ޤައުމުތަކަށް އެކި ވަރުގެ ގެއްލުންތައް ލިބިފައިވާއިރު، ރާއްޖެއިންވެސް 84 މީހަކު މަރުވެ، 24 މީހުން ވީނުވީއެއް ނޭނގި ގެއްލިފައިވެއެވެ.
އަދި 15،000 ދިވެހި ރައްޔިތުންގެ ގެދޮރު ގެއްލި ބިކަ ހާލުގައި ޖެހުނުއިރު، ރާއްޖޭގެ އަބާދީގެ 62 އިންސައްތަ މީހުންނަން މި ހިތްދަތި ހާދިސާގައި އެކިވަރުގެ ގެއްލުންތައް ވެފައިވެއެވެ.
