ފަރުމަހުގެ މަސްވެރިކަން މެނޭޖްކުރުމުގެ ޕްލޭން އާންމުކޮށްފި
26 ޑިސެމްބަރު 2020 | ހޮނިހިރު 08:20މި ޕްލޭން އާންމުކޮށްފައި ވަނީ ޑިސެމްބަރ 24 ގައި
ރާއްޖޭގެ މަސްވެރިން ބާނާފައިވާ މަސް
މަސްވެރިކަމުގެ ގާނޫނުގައި ބަޔާންކޮށްފައިވާ މަސްވެރިކަން ރާވައި، ހިންގައި، ބެލެހެއްޓުމުގެ ޕްލޭންގެ ދަށުން ރާއްޖޭގެ ފަރުމަހުގެ މަސްވެރިކަން މެނޭޖްކުރުމުގެ ޕްލޭން އާންމުކޮށްފިއެވެ.
އެގޮތުން ފަރުމަހުގެ މަސްވެރިކަމުގައި އާއްމުކޮށް ހިފާ އެންމެހައި ބާވަތްތަކާއި އެ ބާވަތްތަކަށް އަމާޒުކޮށް ކުރެވޭ މަސްވެރިކަމުގައި ހިފޭ، ބޭނޭ ނުވަތަ ނެގޭ ކަނޑުގެ އެހެނިހެން ދިރުންތައް މެނޭޖްކުރެވޭނެއެވެ. ރާއްޖޭގައި ހިންގާ، ފަރުމަހުގެ ބާވަތްތަކަށް އަސަރުކޮށްފާނެ އެންމެހައި ހަރަކާތްތަކަށް މި ޕްލޭން ހިނގާއިރު، އޭގެތެރޭގައި، ފަރުމަހުގެ މަސްވެރިކަން ކުރުމާއި، މަސްވެރިކަމާ ގުޅުންހުރި ހަރަކާތްތައް ހިންގުމާއި، ޕްރޮސެސް ކުރުމާއި، ގަނެވިއްކުމާއި، ރާއްޖއިން ފަރުމަހުގެ އުފެއްދުންތައް އެކްސްޕޯޓު ކުރުން ހިމެނެއެވެ.
އަދި މި ޕްލޭންގެ ދާއިރާގައި ހިމެނޭ ހަރަކާތެއް ނުވަތަ އެފަދަ ހަރަކާތަކާ ގުޅުންހުރި ހަރަކާތެއް ހިންގާ މީހުންނަށާއި، އުޅަނދުފަހަރަށާއި، ޕްރޮސެސް ކުރާ އަދި އެކްސްޕޯޓު ކުރާ ތަންތަނަށްވެސް މި ޕްލޭން ހިނގާނެއެވެ.
ފަރުތަކުގެ ވަސީލަތްތަކުގެ ތެރެއިން މައިކަށި ނެތް ދިރުންތައް އަދި މުނިފޫހި ފިލުވުމުގެ ގޮތުން ކުރާ މަސްވެރިކަމުގެ ތެރެއިން ފަރުމަހުގެ ވަސީލަތްތަކަށް އަމާޒުކޮށްގެން ކުރާ މަސްވެރިކަމުގެ ހަރަކާތްތައް މެނޭޖްކުރާނީ އެކަންކަމަށް ޚާއްޞަ މެނޭޖްމަންޓް ޕްލޭންތަކެއްގެ ދަށުން ކަމުން މައިކަށި ނެތް ދިރުންތަކާއި މުނިފޫހި ފިލުވުމުގެ ގޮތުން ކުރާ މަސްވެރިކަމުގެ ހަރަކާތްތައް މެނޭޖްކުރުމުގެ ފިޔަވަޅުތަކެއް މި ޕްލޭންގައި ހިމަނައިފައެއް ނުވެއެވެ.
ފަރުމަހުގެ މަސްވެރިކަން މެނޭޖްކުރުމު ގެ ޕްލޭންގެ ދަށުން ސައިންޓިފިކް ގޮތުން ފުރިހަމަ ޔަޤީންކަން ލިބިފައިނެތްނަމަވެސް، މާޙައުލީ ނިޒާމުތައް ރައްކާކޮށް، މާޙައުލީ ނިޒާމުތަކަށް ލިބިދާނެ އިއާދަނުކުރެވޭ ފަދަ ގެއްލުންތައް ހުއްޓުވުމަށް އެވަގުތަކު އަޅަންޖެހޭ އަދި ޚަރަދާ އެކަށީގެންވާ ފިޔަވަޅުތައް އަޅާނެއެެވެ.
މި ޕްލޭންގެ ދަށުން ވަކި ކަންކަމަށާއި ، ބާވަތްތަކަށާއި، މާޙައުލީ ނިޒާމުގެ ޚިދުމަތްތަކަށް ވަކި ވަކިން ބެލުމުގެ ަދަލުގައި، މާޙައުލީ ނިޒާމުތަކުގައި ހިމެނޭ އަދި ގުޅިލާމެހިފައިވާ އެކި ވައްތަރުގެ ގުޅުންތަކަށް ބެލާނެއެވެ. މީގެ ތެރޭގައި އިންސާނުންގެ ހަރަކާތްތަކުން މާޙައުލީ ނިޒާމަށް ކުރާ އަސަރުތަކަށްވެސް ރިޢާޔަތްކުރާނެއެވެ.
މީގެ އިތުރުން ޤައުމީ ފެންވަރުގައި އަޅާ ފިޔަވަޅުތައް ބައިނަލްއަޤުވާމީ ފެންވަރުގައި ކުރާ މަސައްކަތްތަކާ އެއްހަމަކުރުމިުގެ ގޮތުން ޙަޔަވީ ސިންދަފާތު ޙިމާޔަތްކުރުމަށްޓަކައި ކުރެވޭ މަސައްކަތްތަކުގެ ތެރެއިން ކަނޑުގެ ޤުދުރަތީ ވަސީލަތްތައް ބެލެހެއްޓުމާއި، ދެމެހެއްޓެނވި ގޮތެއްގައި ބޭނުންކުރުމަށް ބައިނަލްއަޤުވާމީ ގޮތުން ކުރާ މަސައްކަތްތަކަށް ރިޢާޔަތްކޮށް ޤައުމީ ފެންވަރުގެ ސިޔާސަތުތައް ކަނޑައަޅާނެއެވެ. އަދި މަސްވެރިކަން ތަރައްޤީކުރުމުގައި މުސްތަޤްބަލުގެ ޖީލްތަކަށް ވަސީލަތްތަކުން މަންފާ ލިބިގަތުމަށް ހުރަސް ނޭޅޭނޭގޮތުގެމަތީން މިއަދުގެ ޖީލްތަކުގެ ބޭނުންތައް ފުއްދޭގޮތަށް ތަރައްޤީ ކުރުމަށްވެސް ވަނީ ޕްލޭންގައި ހިމަނާފައެވެ.
ދެފުށް ފެންނަގޮތަށް ޢަމަލުކުރުމާއި، ޤާނޫނާއެއްގޮތަށް ޢަމަލުކުރުމާއި، އެންމެން ޝާމިލްވާގޮތަށް ޢަމަލުކުރުމާއި، ކުރާ ކަމަކަށް ޒިންމާނެގުމާއި، ލާމަރުކަޒީ އުސޫލުތައް ތަޠުބީޤުކޮށްގެން، ވަސީލަތްތަކަކީ އެންމެންގެ ހިއްސާ އެކުލެވޭ އާންމު މުދަލެއްކަމުގައި ދެކިގެން، ވަސީލަތްތަކުގެ ބޭނުންކޮށްގެން ލިބޭ މަންފާ އެންމެންނަށް އިންސާފުވެރިކޮށް ލިބިދޭނެހެން ހަމަހަމަ ކަމާއިއެކު މަސައްކަތްކުރުމަށް ޕްލޭންގައި އެކުލަވާލާފައިވާއިރު، ކަންކަން ނިންމުމުގައި ވީހާވެސް ބޮޑަށް އިއްތިފާޤުން ނަތީޖާ ނެރުމަށް ބާރު އެޅުމުގެގޮތުންނާއި، ކަންކަން ނިންމުމުގައި ކަމާގުޅޭ އެންމެންގެ ޝާމިލްވުން ކަށަވަރުކުރުމުގެ ގޮތުން، ކަމާގުޅޭ އެންމެން، ޚާއްޞަ ކޮށް، ސިޔާސަތެއްގެ ނުވަތަ ފިޔަވަޅެއްގެ ސަބަބުން ސީދާ އަސަރުކުރާ ފަރާތްތައް ބައިވެރިކުރުމަށްވެސް ޕްލޭންގައި ވަނީ ހިމަނާފައެވެ.
ރާއްޖޭގައި ކުރެވޭ ފަރުމަހުގެ މަސްވެރިކަން ރާވައި، ހިންގުމުގެ އިންތިޒާމެއް ޤާއިމުކޮށް، ޒިންމާދާރު ގޮތެއްގައި ފަރުމަހުގެ މަސްވެރިކަން ބަލަހައްޓައި، ފަރުމަހުގެ ބާވަތްތަކަށް އަސަރުކޮށްފާނެ ހަރަކާތްތައް މެނޭޖްކޮށް، މި މަސްވެރިކަމުގެ ފައިދާ ދިގު މުއްދަތަކަށް ދިވެހި ރައްޔިތުންނަށް ލިއްބައިދިނުމުގެ މަގްސަދުގައި އެކުލަވާލާފައިވާ މި ޕްލޭން އާންމުކޮށްފައި ވަނީ ޑިސެމްބަރ 24 ގައިއެވެ.
މި ޕްލޭނުން ފަރުމަހުގެ މަސްވެރިކަމާއި ވިޔަފާރި ދެމެހެއްޓެނިވި ގޮތެއްގައި ތަރައްގީކުރުމުގައި ޝާމިލްވާ ދައުލަތުގެ އިދާރާތަކާއި އެންމެހައި މަޞްލަޙަތުވެރިންނަށް މަގުދައްކައިދޭނެއެވެ.
