ސައުދީ އަރަބިއްޔާގެ ވަލީއަހުދު ކޮވިޑް ވެކްސިން ޖައްސަވައިފި

ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާން ކޮވިޑް-19 ވެކްސިން ޖައްސަވައިފިއެވެ.

ސައުދީ އަރަބިއްޔާއިން މިކަން ހާމަކޮށްފައިވާއިރު އެގައުމުގެ ދައުލަތުގެ މީޑިއާއިން ވަނީ ވަލީއަހުދު މުހައްމަދު ބިން ސަލްމާނަށް ވެކްސިން ދޭ ވީޑިއޯއެއް އާއްމުކޮށްފައެވެ.

ސައުދީ ވަލީއަހުދުގެ ކޮވިޑް-19 ވެކްސިން ޖައްސަވާފައިވާއިރު މި ވެކްސިން ޖެއްސެވި ދުނިޔޭގެ އެހެން ލީޑަރުންގެ ތެރޭގައި އެމެރިކާގެ އިންތިހާބީ ރައީސް ޖޯ ބައިޑަން ގެ އިތުރުން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހިމެނެއެވެ.

އެމެރިކާގެ ފާމަސޫޓިކަލް ކުންފުނި ފައިޒަރ އަދި ޖަރުމަނުގެ ކުންފުނި ބައޯއެންޓެކް އިން ކޮވިޑް-19 އަށް އުފައްދާފައިވާ ވެކްސިންނަށް ސައުދީ އިިން ހުއްދަދީފައިވާއިރު، އެގައުމުގައި ރައްޔިތުންނަށް ވެކްސިން ދޭން ފަށާފައިވަނީ މި ޑިސެމްބަރު މަހުގައެވެ.

ތިން މަރުހަލާއަކަށް ބަހާލައިގެން ސައުދީގައި ވެކްސިން ދިނުމުގެ ކަންތައްތައް ކުރިއަށް ގެންދިއުމަށް ހަމަޖެހިފައިވާއިރު، ފުރަތަމަ މަރުހަލާގެ ދަށުން ވެކްސިން ދިނުމުގައި އިސްކަން ދޭނީ ހައިރިސްކް ކެޓަގަރީގެ މީހުންނާއި އުމުރުން 65 އަހަރުން މަތީގެ މީހުންގެ އިތުރުން އުމުރުން 40 އަހަރުން މަތީގެ މީހުންގެ ތެރެއިން ބޮޑީ މާސް އިންޑެކްސް މަތި މީހުންނާއި ބަރުދަން އިތުރުވުމުގެ މައްސަލަ ދިމާވެފައިވާ މީހުން އަދި ފްރަންޓްލައިންގައި މަސައްކަތްކުރާ ފަރާތްތަކަށް ކަމަށް ސައުދީ ސަރުކާރުން ބުނެއެވެ.