އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ، މޮރޮކޯގެ ރަސްގެފާނު މުހައްމަދު ހަވަނަ، އިސްރާއީލަށް ދިޔުމަށް ދައުވަތު ދެއްވައިފިއެވެ.
ނަތަންޔާހޫގެ އޮފީހުން ބުނީ ހުކުރު ދުވަހު ނަތަންޔާހޫ، މޮރޮކޯގެ ރަސްގެފާނު މުހައްމަދު ދެވަނައަށް ފޯނުން ގުޅުއްވާ ދެ ގައުމުގެ ގުޅުން ބަދަހި ކުރުމާއި ގުޅޭގޮތުން ވާހަކަދައްކަވާފައިވާ ކަމަށެވެ. މީގެ އިތުރުން ނަތަންޔާހޫ ވަނީ މޮރޮކޯއިން އިސްރާއީލާއިއެކު ސިޔާސީ ގުޅުން ބަދަހި ކުރުމަށް ނިންމެވި ނިންމެވުމަށް މަރުހަބާ ދަންނަވާ ދެގައުމުން އެއްގައުމު އަނެއް ގައުމަކަށް ވެދެވެން ހުރި އެހީތަކާއި ބެހޭ ގޮތުން މަޝްވަރާ ކުރައްވައިފައެވެ. އަދި ރަސްގެފާނު މުހައްމަދު ހަވަނައަށް ފަސޭހަފުޅު ވަގުތަކު އިސްރާއީލަށް ރަސްމީ ދަތުރެއް ކުރެއްވުމަށް ވަނީ ދައުވަތު އަރުވައިފައެވެ.
އެމެރިކާ މެދުވެރިއެއްގެ ދައުރު އަދާކޮށް މޮރޮކޯއިން އިޒްރާއީލާއިއެކު ގުޅުން ގާއިމުކުރަން ނިންމާފައިވަނީ މި މަހު ކުރީކޮޅެވެ. މޮރޮކޯގެ ނިންމުމާއެކު އެ ގައުމު ހިމެނިގެން ދިޔައީ ފާއިތުވި 4 މަސްދުވަހުގެ ތެރޭގައި އިޒްރޭލާއެކު ސުލްހަ ވުމަށް ނިންމި ހަތަރުވަނަ އަރަބި ގައުމަށެވެ.
މޮރޮކޯއިން އިޒްރޭލާއެކު ގުޅުން ގާއިމް ކުރުމަށް ނިންމުމާއެކު، ދެބަސްވުން އުފެދިފައިވާ ހުޅަނގު ސަހާރާގެ ސަރައްދަކީ މޮރޮކޯގެ ބިމެއް ކަމަށް އެމެރިކާއިން ގަބޫލު ކުރުމަށް އެމެރިކާގެ ރައީސް ވަނީ ނިންމަވާފައެވެ.
ޔުނައިޓެޑް އެރަބް އެމިރޭޓްސް އާއި ބަހްރޭން އާއި ސޫދާނުންވެސް ވަނީ ފާއިތުވެ ދިޔަ ހަތަރު މަސް ދުވަހުގެ ތެރޭގައި އިޒްރޭލާއެކު ސިޔާސީ ގުޅުން ގާއިމް ކޮށްފައެވެ.
އިޒްރޭލާއެކު އަރަބި ގައުމުތަކުން ގުޅުން ބަދަހި ކުރަމުން ދިއުމާއެކު ފަލްސްތީނުން ގެންދަނީ އެކަމާ ކަންބޮޑުވުން ފާޅު ކުރަމުންނެވެ.
