އަލަށް ފަށާފައިވާ ޝިޕިންގެ ހިދުމަތްތައް ފެންނަނީ ވަރަށް އުއްމީދީކޮށް - އެމްޑީ ސައީދު
25 ޑިސެމްބަރު 2020 | ހުކުރު 10:25ސައީދު ވިދާޅުވީ މިކަމާއި މެދު ވަކި ހުކުމެއް ކަނޑައަޅަން އަދި އަވަސްކަމަށް
މޯލްޑިވްސް ސްޓޭޓް ޝިޕިންގ (އެމްއެސްއެސް)ގެ މެނޭޖިންގ ޑިރެކްޓަރު އަބްދުﷲ ސައީދު
މޯލްޑިވްސް ސްޓޭޓް ޝިޕިންގ (އެމްއެސްއެސް)ން އަލަށް ދޭން ފަށާފައިވާ ޝިޕިންގެ ހިދުމަތްތައް ފެންނަނީ ވަރަށް އުއްމީދީކޮށް ކަމަށް މޯލްޑިވްސް ސްޓޭޓް ޝިޕިންގ ގެ މެނޭޖިންގ ޑިރެކްޓަރު އަބްދުﷲ ސައީދު ވިދާޅުވެއްޖެއެވެ.
ރާއްޖެ އާއި އިންޑިއާ ދެމެދު ފެށި ކާގޯ ފެރީގެ ހިދުމަތާ ގުޅޭ ގޮތުން ރާއްޖެޓީވީގެ 'ފަލަސުރުހީ' ޕްރޮގްރާމްގައި ވާހަކަދައްކަވަމުން ސައީދު ވިދާޅުވީ މިކަމާއި މެދު ވަކި ހުކުމެއް ކަނޑައަޅަން އަދި އަވަސްކަމަށެވެ.
ނަމަވެސް މިކަމަށް އާންމުންގެ ފަރާތުން ބޮޑު ތަރުހީބެއް ލިބެމުން އަންނަކަން ފާހަގަކުރައްވާ ސައީދު ވިދާޅުވީ ރާއްޖޭގެ ދެކުނުގައި ބޭނުން ކުރަމުން އަންނަ ބޯޓު، 'ބޮންތި' އަނބުރާ އިންޑިއާއަށް ދާން ފުރާފައިވާއިރު ދެން ފެށޭ ދަތުރަށްވެސް ކާގޯ ލިބިފައިވާ ކަމަށެވެ.
އަދި މި ހިދުމަތް އެންމެ ފުރަތަމަ ފެށިގެން ދިއައިރު މައިގަނޑު ގޮތެއްގައި ގެނަސްފައިވަނީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)ގެ މުދާކަމަށާ އި އަމިއްލަ ފަރާތްތަކުގެ ފަރާތުން އެންމެ ފުރަތަމަ ދަތުރުގައި ލިބުނީ ވަރަށް މަދު މުދާކޮޅެއް ކަމަށް ސައީދު ވިދާޅުވިއެވެ.
އެހެން ނަމަވެސް ދެން އަންނަ ދަތުރުތަކުގައި އަމިއްލަ ވިޔަފާރި ކުރާ ފަރާތްތަކުގެ މުދާ ގެންނާނެ ކަމަށް ސައީދު ވިދާޅުވިއެވެ.
ސައީދު އިތުރަށް ވިދާޅުވީ އަމިއްލަ ފަރާތްތަކުގެ ކާގޯގެ ތެރޭގައި ކޮންސްޓްރަކްޝަންގެ ފިނިޝިންގ ކާގޯއާއި، ކާބޯތަކެތީގެ ބައެއް ބާވަތްތައް ހިމެނޭ ކަމަށެވެ. އެގޮތުން މިހާރު މި ހިދުމަތްތައް ފެންނަނީ ވަރަށް ކާމިޔާބުކޮށް ކަމަށް ވިދާޅުވެ ސައީދު ވިދާޅުވީ މި ހިދުމަތަށް ވަރަށް ބޮޑު ތަރުހީބެއް ލިބި، ރައްޔިތުން މި ހިދުމަތް ގަބޫލުކޮށްފިކަމަށެވެ.
ޑައިރެކްޓް ޝިޕިންގެ ޚިދުމަތް ރާއްޖެއަށް ފަށާފައިވާއި، ކޮޗިންއާއި ކުޅުދުއްފުށްޓާއި ދެމެދު ވަނީ ކާގޯ ފެރީގެ ޚިދުމަތްވެސް ފަށާފައެވެ. މިޚިދުމަތުގެ ސަބަބުން ރާއްޖޭގެ އުތުރާއި ދެކުނު އަތޮޅުގެ ރައްޔިތުންނަށް އަގުހެޔޮކޮށް ތަކެތި ލިބިގެންދާނެއެވެ.
